مساؤ ورد بنوتاتي ومداماتي الطرفونات،،
حبيبات قلبي بوست ح يكون مفيد لعروساتي الي يبو يجهزو روحهم وبياخدو مكياج ح نقوللكم ترتيبات تمشوا بيها لان ح تساعدكم لما بتشرو؛؛
- اول شي لما تبي تطلعي تشري مكياج ضروري تحددي ميزانيتك يعني تشوفي كم فلوسك باش تحددي الماركات الي بتشريها اما تكون ماركات درق ستوري الي تكون اسعارها رخيصه ومحدوده او ماركات هاي اند الي هي تكون غاليه باش تعرفي وين تمشي من محلات باش مادوخيش ودوخي الناس الي بتمشي معاك؛؛
- وتاني شي ما ديروش ف بالكم انه الماركات متوسط السعر ماتنفعش لا حبيباتي واي واحده تقول هكي اعرفوا انها ماتفهم ف الماركات لان حتي الماركات الرخيصه من افضل الماركات العالميه وفيها منتجات ممتازه وتتقارن بالمنتجات الغاليه واصلاً هي نفس الشركات المصنعه للماركات الغاليه؛؛
- ثالث شي اعرفي نوع بشرتك اذا كانت جافه او دهنيه او متخلطه او عاديه او حساسه باش تعرفي شني تاخدي لبشرتك كان بشرتك جافه تاخدي منتجات الي يكون فيها ترطيب عالي اذا كانت دهنيه تاخدي منتجات تكون خاليه من الزيوت وحتي المختلطه نفس الشي اما اذا كانت حساسه تاخدي منتجات تاخدي خاليه من العطور والكحول يعني الافضل ماركات طبيه اما البشره العاديه تتآقلم مع اغلب المنتجات؛؛
- رابع شي انكم ما تشرو باالهلبا لان هذا مكياج وليه صلاحيه معينه غير انه يطلع كل شهر موديل جديد فلهذا اشرو حدود المعقول وحاجتك وتاخدي الاساسيات؛؛
- خامس شي اساسيات مشتريات المكياج
- اكيد تشرو غسول ومقشر وتونر الي هو القابض ومنظف مكياج الي يناسب نوع بشرتك؛؛
- تاخدي كريم الترطيب الي يناسب نوع بشرتك؛؛
- تاخدي بيس او برايمر الي يناسب نوع بشرتك وظيفته انه يخلي ملمس بشرتك مخملي ويخفف من مسام ويثبت المكياج ومايخليش الاساس يشقق او يخطط معاك؛؛
- اخدي كريم اساس وباودر الي تناسب نوع بشرتك ويكون نفس درجة بشرتك وحددو نوع الاساس اذا كنتي تبيها ثقيله او وسط او خفيفه اما بالنسبه للباودر الافضل تاخدوها شفافه بدون لون وخودها بودره حره الي هي سائبه افضل ليكم؛؛
- تاخدي خافي عيوب يناسب درجة بشرتك ونوعها والاهم اذا كانت عندك تصبغات او هالات هلبا خودي مصحح لون يجي لونه برتقالي الي ينحط تحت الخافي باش مايقلب اللون معاك ع رمادي او موف؛؛
- تاخدي باليت احمر خدود الي هو باكو يجي فيه كدا لون يكون درجاته ترابي و وردي وفوشيا باش يبدا عندك كدا درجة لون+ تاخدي اما باليت ارواج فيه كدا درجة لون او تاخدي ارواج فرديه حاولي تاخدي الالوان الرئيسيه هي الاحمر الفوشيا الترابي واكيد ليك حرية الاختيار في باقي الدرجات؛؛
- تاخدي هايلايتر الي هو اضاءه للوجه اذا كنتي بشرتك بيضاء خوديها ف درجات اللؤلؤئ والفضي اما اذا كنتي سمراء خوديها درجات البرونز والذهبي„„ واكيد بتاخدي كونتور الي هو ظل الي بتحددي بيه اماكن الوجه؛؛
- تاخدي باليت الي هو الباكو يجي فيه كدا لون من ظلال العيون واختارو الوان مطفيه وبلمعه باش يكون عندك كدا درجة لون ؛؛
- تاخدي ايلاينر اسود ضروري منه وتاخدي قلم كحل اسود ولو تبي تاخدي كدا درجة لون هذا شي اختياري ليك؛؛
- تاخدي مسكرة رموش واحده تكون ثقيله للمناسبات والتانيه تكون خفيفه للطلعات اليوميه؛؛
- تاخدي قلم او جل او باودر للحواجب ع حسب راحتك واختيارك وخوديه افتح من لون شعرك بدرجتين ردي بالك تاخدي اسود؛؛
- تاخدي ست فرش يكون فيه فرش للوجه وللعيون واكيد اسفنجة مكياج للدمج؛؛
وبس برنسيساتي ذكرت قائمة يكون فيها اساسيات المكياج وح نحطلكم روابط من موقعي ح تفيدكم من ناحية ماركات المكياج دومتم متآلقات اووووهبكم اموووواه؛؛
- كوني اكثر ذكاء لتسوق مكياجك”عالم الماركات”
- افضل ماركات المكياج من الرخيص للغالي
- ماركات المكياج الطبيه
- قائمة مشتريات العروس بالكامل
