مكعبات ثلج الخيار [افضل مرطب ومنعش للبشره طبيعي]

صحه فطوركم بنوتاتي ومداماتي المزموزات،،
حبيبات قلبي بوست هذا مفيد للكل لان اكيد بشرتكم مستحقه نظاره وانتعاش ف الجو السخون وخاصة الي عندها حروق شمس ونمش ومسامات بنقوللها تابعي البوست؛؛

خيار

  • نبي نقوللكم ع اهمية الخيار للبشره والجسم خيار فيه اهم فيتامينات الي تفيد البشره والجسم الي هي A,B,C وفيه ألياف و مواد قلويه تساعد ف علاج البشره ومشاكل الامعاء وحصي الكلي وطبعا فوائده للبشره لاتعد ولا تحصي لان فيه اهم عنصر الي ينشط ف خلايا وانسجة الجلد هو الكبريت الي يزيد ف نظارة البشره وترطيبها وفيه مركبات كلوسايدس الي تغدي عضلات بشرة الوجه وتطهير وترطيب جميع انواع البشره؛؛
  • الي ديما يعلقولي ويشكو من المسام بنقولكم الخيار اقوي خضره طبيعيه لقبض المسام والتقليل منها غير انه يعطي نظاره رهيبه للبشره الي بشرتها فيها شحوب ننصحها بيه هلبا وطبعاً يعالج حروق الشمس وخاصةً شهر رمضان صهد الغاز والكوشه اكيد مآثر ع بشرتكم ف الخيار يرطب بشرتك ويخفف من الاحمرار والتهيج؛؛
  • الي عندها هالات بسبب الارق والارهاق وانتفاخ تحت العين ااااكيد معجبات ثلج الخيار مفيده ليك هلبا هلبات؛؛
  • واكيد يخفف من حب الشباب لان فيه مادة الكبريت الي هي مضاد ممتاز لحب الشباب؛؛
  • طبعاً في كدا طريقه وطريقه تقدرو تستخدمو ك عصير الخيار وتصفوه وتحطوه ف بخاخ ويستخدم ك تونر قابض ومنعش طبيعي للبشره؛؛
  • بس انا اليوم اخترت اسهل طريقه غير متعبه ولا مكلفه هي تاخدي خيار انا خديت زوز خيارات قصيتهم حلقات نفس صورة البوست وحطيتهم ف كيس التبريد واكيد طول بتحطيه ف الفريز تخليه لين يتجمد يولي مكعبات ثلج الخيار؛؛
  • تقدري تستخدمي كل يوم 2مكعبات ثلج الخيار لوجهك ورقبتك اكيد ع بشره نظيفه يعني تاخدو معكب ثلج خيار وتمرروه ع كل الوجه والرقبه ولو تبو تخلوه شويه تحت العين ممتاز جداً؛؛
  • استمرو ع مكعبات ثلج الخيار خلال شهر رمضان واكيد ح اشوفو نظاره واشراقه حلوه لبشرتكم؛؛
  • ع فكره تقدرو تاخدو مكعبات ثلج الخيار وتحطوه ف مالقي ميه وتشربوه كويس للجسم وتنظيف الكلي وينظف سموم الجسم يعني مفيد جداً لجسمكم خاصةً خلال شهر رمضان مستحقين لعنايه لبشرتكم وجسمكم؛؛

وبس جميلاتي اتمني الافاده للجميع دومتم متآلقات اوووهبكم اااموووااااه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Integration by Acurax Wordpress Developers
error: Content is protected !!