‏روتين رمضان [للبشره+شعر]

[ رمضان كريم ]

ياريت تضغطوا ع صورة و اديرو مشاركة للبوست باش يستفيد اكبر عدد ممكن؛؛

مسائكم ورد بنوتاتي و مداماتي المزموزات؛؛
حبيبات قلبي البوست هذا يستنو فيه معظم العضوات لان نطلب مني هو كيف انحافظو ع بشرتنا ف رمضان او نمشو بسستم معين يساعدنا انظمو فيه وقتنا لان الوقت بيتلخبط شوي بس ح نفيدكم ب البوست هذا تنظموا افكاركم والي بنديره بنشاركم بيه؛؛

341

  • بنقوللكم ما تلخبطو روحكم هو شهر وح يفوت ع الخير الصراحه الشهر هذا يكون اعتكاف لعبادة الخالق بزياده ويكون الاهتمام ب بشرتنا اكثر ومكثف علاش مكثف لان الشهر هذا بتفقدي فيه كمية سوائل ف الجسم ف نعوضوها ب الماسكات اول شي قررو تختارو ماسك اسبوعي الي يناسب بشرتكم عن نفسي بنشدها ع ماسك البطاطه المطبوخه مع الزبادي الساده بما اني شهر اجازه والصراحه فرحانه بنرقد ف الحوش ف بنستمر ع ماسك البطاطه المطبوخه والزبادي مره ف الاسبوع لان بشرتي صافيه ما تحتاج اكثر يعني قررو باش تنظمو وقتكم وطبعاً ماتنسوش المقشر الاسبوعي اديرو سكراب لبشرتكم نهاية الاسبوع عن نفسي مقشر القهوه هو الاساسي ف روتين امتاعي؛؛؛
  • به الوقت قصير اما بنرطبو بشرتنا وكيف بنظموا وبنقسموا الوقت بنقوللكم الشهر هذا خلو الترطيب مره واحده ف اليوم الي هو وقت بعد صلاة الفجر وبتخشي ترقدي رطبي بشرتك ح تاخدي مده كافيه لترطيب بشرتك؛؛
  • وبنقوللكم ع مرهم ميبو بيكون رفيق دربكم ف الشهر الفضيل المرهم هذا زي الي ف الصوره علاش قلت رفيق دربكم وضروري يكون متوفر ف كل بيت لان الناس الفالحه الي بتجهز الفطور اكيد ح تحصلي حرقه ولا اتنين من الزيت او الكوشه او صهد الغاز يسببلك احمرار ف وجهك المرهم هذا مممممممتاز جداً للحروق وجروح السكر وااااامن جداً مكوناته طبيعيه هي:
    ـ زيت السمسم ، وشمع العسل ، والأعشاب الصالحة للأكل الأخرى والي توفر سيتوستيرول الأحماض الأمينية الطبيعية والأحماض الدهنية الأساسيه و فيتامين e والسكريات وتقدرو تستعملوه للصغار وللكبار يستعمل للتقرحات وجروح الاوله والتانيه والثالثه ولحروق الشمس يستخدم المرهم ف جميع انحاء العالم وممممتاز جداً يعني لاقدر الله لو تنطر عليك زيت او نحرقتي من باب الكوشه ع طول جري تحطي المرهم عليه مثلاً وجهك انصهد من الغاز بعد ما تكملي تطيبك تغسلي وجهك وتحطي شويه ع وجهك يهدي الوضع وسعره رخيص مايفوتش تقريباً 10دينار ليبي ننصحكم بيه وبقوه؛؛
  • والحاجه التانيه تكون رفيقة دربكم ف شهر الفضيل هي تونر او بخاخ منعش للوجه ضروري منه
    ـ بخاخ او تونر للبشره الدهنيه قابض للمسام يمنع الحبوب ويخلي وجهك منعش خاصةً الجو سخون ومع صهد االغاز بيزيد الوضع هو عباره عن مغلي شاهي اخضر+زيت ليمون متوفر ف العطريات تغلي الشاهي عادي من اول غليه لان بتبخيه ع وجهك صفيه وضيفي معاه قطرات زيت ليمون يقبض المسام ويتحكم ف دهون البشره وافرازاتها ويمنع ظهور الحب بسبب افرازات الزيوت بعد ما تجهزوه تخلو يبرد الشاهي بعدين صبوه ف بخاخ وتحطوه ف باب الثلاجه وكل ما تحسي ب الضغظ بخي ع وجهك بختين تنعشك وتنعش بشرتك وتبرد عليك بعد ما تبخي اطبطبي بقطنه ع وجهك وع فكره تقدرو اديرو بالمكونات مكعبات ثلج بس مره واحده تستعملوا مكعب ثلج ع وجهكم عكس البخاخ؛؛
    ـ بخاخ او تونر للبشره الجافه هي مية ورد+ زيت جلسرين ف حالة كانت بشرتك تتحسس من مية الورد خفيفها بالميه العاديه تمشي الامور تصبيها ف شيشه بخاخ واضفي قطرات زيت جلسرين لترطيب البشره وعدم جفافها لان بشرتك جافه وتحطيها ف باب الثلاجه تبخي وجهك كل ما تحسي بضغط وحراره يخفف ويهدي الحراره ويرطبها يخليها منعشه وتقدرو اديرو بالمكونات مكعبات ثلج وطبعاً تستعملوا مكعب ثلج واحد ف اليوم ع وجهكم؛؛
    ـ اما البشره العاديه تستعمل الاتنين مافيش مشكله وانا بشرتي عاديه نستعمل ف الاتنين اندير ف مغلي شاهي اخضر مع مية الورد؛؛
  • الحاجه الثالثه الي بتخلوها ف تحضيراتكم هو الزبادي الطبيعي بدون نكهه تاخدو الزبادي وتحطوه ف شاش تصفوه من الميه يولي معاكم زي الكريمه تقدرو تدهنو منه وجهكم ك ماسك اسبوعي كويس هلبا يمتص الحراره ويعالج حروق الشمس وصهد الغاز انا شخصياً استعملته لما وليت من الشمس زي بابا سنفور بصراحه نتيجه رهيبه خفف عليا الآلم وحروق الشمس من البحر؛؛
  • اكيد زي ما بنهتمو ب بشرتنا بنهتمو بشعرنا حتي هو اختارو ماسك اسبوعي معين ب الي يريحكم انا عن نفسي بنشدها ع زيت الثومه ك ماسك اسبوعي لشعري وبنقوللكم ع افضل انواع المحفزه لنمو شعر و وقف التساقط وكثافته هي
    ـ “زيت الخردل؛زيت جوزالهندالعضوي؛ زيت الصبار؛ زيت السمسم؛زيت اكليل الجبل؛ زيت الثومه؛ زيت جدايل الاصلي متوفر عند عبدالصمد القريشي هادي تعتبر افضل زيوت محفزه؛؛ بنضيفلكم معلومه صغيره هو اي زيت شعر او كريم او شامبو تستعملو فيه ضيفو معاه فيتامينe متوفر ف الصيدليات يعني تاخدو من 4/5 حبات تنقبوهم وطلعو الزيت تخلطوه مع الشامبو او زيت او كريم وتحطو قشرة الحبه ما تلوحوها ممتاز للشعر يحفز نمو ويكثف ويمنع تساقط ويعطي لمعه صحيه لشعركم ننصحكم بالحركه هادي ممتازه جداً؛؛

وبس حبيباتي بوست مفصل ع اهتمامكم ف رمضان تعرفو ترتبو وقتكم وافكاركم تمشوا عليه اتمني الافاده للجميع دومتم متآلقات ااوووهبكم اااموووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Widget by Acurax Small Business Website Designers
error: Content is protected !!