مسائكم ورد اخر لليل بنوتاتي ومداماتي الغزولات،،
حبيبات قلبي بوست خفيف ع اهم نصائح صيفيه تتبعيها لبشره صحيه ونظره،،
- قبل مانبدآ ف البوست بنقول لاي واحده عندها مشاكل عميقه ف البشره سواء كلف حب شباب او تصبغات شديده ننصحها اتابع عند دكتور جلديه كويس والاهم من هذا انك تسئليه بعد ما تاخدي علاجك وتكمليه شني الروتين الي تمشي عليه باش ماترجع بشرتك الي ماكانت عليه بعد ماتوقفي ع علاجي هاذي اهم نقطه ضروري تستفسرو منها الدكتور المتابع لحالتك؛؛
- نصائحي ليكم خفيفه وهي ارحموا بشرتكم من المكياج اليومي ارجوووكم لان المكياج بشكل يومي دمار شامل للبشره بالاخص توا ف الصيف الشمس عموديه بزياده وكل ماكان مكياج ع وجهك وانتي متعرضه للشمس كل ماكانت الكوارث اكبر لبشرتك نحكي مع طالبات الجامعه واي بنوته او مدام تشتغل ومتعرضه للشمس بشكل كبير عزيزتي ارحمي بشرتك خليها تتنفس وتشم الهواء راهو زي ما انتي مرات تحسي روحك مخنوقه ف مكان ضيق وتبي تستنشقي هواء زي ما يصير لبشرتك لما كل يوم اديري ف مكياج تغمي تغمي تغمي فيها ب الاساس والباودر وتتعرضي للشمس البشره تنحرق وينسدو المسام يسببلك كلف وتصبغات ونمش وحتي حبوب ورؤس بيضاء ردو بالكم مهما كانت من ماركات مكياج غاليه او رخيصه استعماله بشكل يومي يدمر البشره خاصة الاساس،،
- تاني شي حاولو تبتعدو ع كريم الاساس الثقيل بشكل يومي يسبب انسداد للمسام الي تمكيج تستخدم بي بي كريم هو عباره عن كريم ترطيب بلون خفيف ينفع للاستخدام الصباحي وافضل من استخدام الاساس بشكل يومي؛؛
- في حالة بديرو واقي شمس ضروري تجددوه كل ساعتين والا ح يقلب معاك بنتيجه عكسيه اذا الواقي ماينفعش تحطي فوقه مكياج يعني الواقي يناسب الناس الي ما تحطش ف مكياج يومي؛؛
- الناس الي تحط ف مكياج افضلها تستخدم كريم ترطيب نهاري او زي ماقلت بي بي او سي سي كريم هي عباره عن كريم ترطيب بلون خفيف وفيه نسبة حماية من الشمس؛؛
- ديما قبل ما تحطو الواقي او كريم الترطيب حاولو تمررو مكعب ثلج ع وجهكم ك قابض طبيعي ويقلل نسبة افراز زيوت البشره ويثبت المكياج او كريم الترطيب مايخليهاش تتآكسد مع جو السخون والشمس؛؛
- اشرو بخاخ الميه المعدنيه الطبيه زي بخاخ آفين او لاروشيه بوسي او يورياج متوفر ف اغلب الصيدليات سعرهم ف حدود 10 دينار ليبي وظيفتهم انه يخففو احمرار البشره وتهيجها بسبب الشمس او الحراره وتقدرو تستخدموه فوق المكياج وبدون مكياج بعد ما تبخيه ع وجهك تحسي ب انتعاش وترطيب لبشرتك؛؛
- واخر نصيحه والي ديما نكرر فيها افضل علاج طبيعي لحروق الشمس هي الزبادي الساده بدون نكهه بعد ماتروحي من الشغل او القرايه امسحي وجهك بمية الورد واغسليه وبعدها حطي ع وجهك زبادي لمدة 15 دقيقه ح تشوفي كيف يمتص كل الصهد والحراره من وجهك ممتاز جداً خلوه ف روتينكم اليومي مايسبب اي مشاكل بالعكس مفيد للبشره ومفتح طبيعي للبشره بدون اثار سلبيه؛؛
وبس برنسيساتي اتمني الافاده للجميع دومتم متآلقات اووووهبكم ااامووووواااااه..
