[ماسك+بخار]
[قناع للكلف+لتصبغات البشره+للهالات+ إسمرار الشفايف]
مسائكم ورد بنوتاتي ومداماتي الطرفونات،،
حبيبات قلبي بوست مهم للجميع بدون استتناء وح تحتاجوه ف الصيف بكثره يالله كلكم اذان صاغيه،،
- قبل كل شي انا اليوم درت بخار لوجهي لفتح المسام وتنظيف البشره من الزيوت والاتربه ويساعد ف تنظيف المسام بشكل كبير انا عندي ماكينة بخار وفي حالة مش متوفره عادي مافيش مشكله تقدرو اديرو نفس الطريقه بالطنجره العاديه هي تصبو فيها ميه وتحطو فيها الي يعجبكم من الخضروات كلها مفيده للبشره انا حطيت فيها عرقين نعناع+نصف ليمونه كامله عصرتها وبعدها قشرتها وحطيتها طريقة الاستعمال انك تاخدي فوطه تحطيها ع راسك وتنزلي راسك ع ماكينة البخار من 5/10 دقايق بس خودي نفس مره مره قيمي راسك فوق بعدها وجهك ح يعرق خودي قطنه امسحي كل العرق الي طلع من وجهك وح تشوفي القطنه كيف ولت كحله لان ترسبات البشره تحولت منها بعدها حطي قناعك انا درت قناع البطاطه؛؛
- ملاحظة البخار يستعمل مره ف الشهر للبشره العاديه والجافه ومرتين للبشره المختلطه والدهنيه وحاجه تانيه اليوم الي بديرو فيه البخار تكونو ف قاعدين ف البيت مش ح تطلعوا تتعرضو للشمس ولا ح تحطو مكياج بعد البخار؛؛
- انجو لموضوعنا الاساسي والي ح يكون القناع هذا مرافقكم طول فصل الصيف علاش قلت هكي لان اكيد بتمشو للبحر واكيد البشره بتتعب من الشمس بتسمر وبتنحرق احمرار وافراز زيوت اكثر من الشتاء اذا حلكم هو ماسك البطاطه؛؛
- الماسك هذا مفيد للكلف والتصبغات وحروق الشمس والهالات درجه اولي علاش لان البطاطه فوائدها لا تعد ولا تحصي هي مضاده للآكسده وفيها فيتامين سي غير انه فيها إنزيم اسمه (كاتشولس) هذا تلقوه ف اغلب كريمات التجميليه الي تساعد ع تفتيح او علاج تصبغات البشره الناس الي ع طول هالكتني اسئله ع تفتيح البشره وتوحيد لونها هذا حلك وفي نفس الوقت مايضر البشره،،
- طريقه سهله وبسيطه وغير مكلفه وتقدرو اضيفو معاها كدا حاجه بس انا اليوم خديت طرف بطاطه وسلقتها وبعدها هرستها وخلطتها مع الحليب الباكو وقعدت نهرس فيها كويس ولت زي العجينه نفس صورة البوست بعدها تحطوها ع كامل وجهكم حتي تحت وفوق العيون والرقبه من 20/25 دقيقه لين تجف وبعدها اغسلوا وجهكم بميه دافيه وغسولكم المعتاد وبعدها ع طول بميه مصقعه باش تسكري المسام وااكيد ماتنسيش الترطيب انا ح نرطب بكريم بيبانتين الي خطه ازرق؛؛
- ع فكره الناس الي عندها كلف وتصبغات هلبا تقدرو اضيفو للبطاطه كاشيك دقيق وزبادي ساده وحليب؛؛
- يستخدم الماسك هذا للبشره المهلوكه من حروق الشمس والتصبغات والكلف 3مرات ف الاسبوع اما الي بشرتها تبي بس تعطيها نظاره وشد يكفيها مره ف الاسبوع؛؛
- استمرو عليها في الصيف كله وادعولي ح تشوفو بشرتكم كيف ح تتغير وكيف تعالجوا حروق الشمس كلها وتتوحد لون البشره وتخف الهالات الي سببها الارهاق؛؛
وبس برنسيساتي دومتم متآلقات اااوهبكم ااامووواه..
