صباحكم حب وزها خاطر بنوتاتي ومداماتي الطرفونات،،
حبيبات قلبي ح نحكيلكم اليوم ع المزيلات العرق الطبيه لان الحكايه صيف والجو سخون فلهذا ع طول نهتموا بنظافتنا الشخصيه واهم شي تكون ريحتنا منعشه ونظافه تشع من بعيد البوست هذا انطلب مني من كدا عضوه تبي تعرف احسن انواع مزيل العرق ماركات طبيه وعلاش نختارو الماركات الطبيه مش التجاريه؛؛
- اول حاجه ح نحكيلكم علاش يفضل يكون مزيل العرق طبي مش تجاري خاصةً للبشره الحساسه وتتآثر بسرعه ننصحها تستعمل مزيل عرق طبي خالي من الكحول والألمونيم الي يسبب تحسس للابط واسوداده خاصةً مزيلات العرق التجاريه كلها فيها كحول والالمونيم بنسبه كبيره هذا علاش لما تستعملوا مزيل عرق يسبب اسوداد الابط وديما لما تختارو مزيل عرق يكون بدون ريحه لان خلوها قاعده عندكم كل مازادت ريحة المزيل معناها فيه نسبة كحول كبيره فلهذا خليكم ع المزيلات الطبيه او الطبيعيه الي تتكون من الاعشاب الطبيعيه بدون اي مواد كيميائيه؛؛
- تاني شي بنحكيلكم ع مزيل ماركة بيوكست الي صورته ف البوست هادي ماركة مكونتها وتركيبتها اعشاب طبيعيه 100% مزيل عرق ممتاز وفيه ميزه انه يبيض الابط والميزه التانيه والاهم انه يخفف نمو شعر الابط مع الاستعمال اليومي بعد الدوش تستعملي منه تحت الابط ريحته خفيفه يستمر معاك 24ساعه حمايه وما يلبزش حوايجك مايخليكش تعرقي وتطلع الميه ع الملابس وف نفس الوقت خالي تماماً من الكحول والالمونيم المزيل هذا وظيفته يحميك من التعرق وف نفس الوقت يآثر مباشرة ع جذور الشعر يساعد ع تقليل كمية وسماكة الشعر بمعني اربعه فوائد ف منتج واحد
ـ 89% يقلل عددالشعر
ـ 69% يقلل من سماكة الشعر
ـ 95%يقلل من طول الشعر
ـ 100% مزيل عرق
بجد ممتاز حلو ف استعماله والماركة هادي بيوكست ف كل منتجاتها ممتازه ومتكلمه عليها فيما سبق ع كريمة تخفيف نمو شعر الوجه روعه وفيها حتي علاج للشعر شامبو وحقن ممتازات انا مستعمله منها شامبو كويس جداً خفف تساقط وفيها شامبوات لجميع انواع الشعر بجد ننصحكم بيها الماركه هادي؛؛
- ماركة بيوكست متوفره ف صيدلية ذات الصواري وكدا صيدليه معروفه وع فكره سعر المزيل ما يتعدا تقريباً 15دينار ليبي؛؛
- طبعاً ف كدا ماركة ممتازه طبيعيه وطبيه منها:
فشي. أس في أر. بودي شوب. فكتوريا سكرت. كلينك. كلارنس. بزلين. وكدا ماركة ممتازه فيها مزيل عرق طبي كويس ما يضر البشره ولا يسود الابط؛؛
- اما الناس الي تحب الطبيعي وانا الي الان مازالت نستعمل فيه هو لليمون شرحت فيما سبق عليه كيف يستعمل ك مزيل عرق طبيعي؛؛
- واخيراً ضروري نهتمو بنظافتنا ونغسلو يومياً وماتفكري تستعملي مزيل وانتي عارقه او يكون الابط مش نظيف ح يزيد الوضع سوء يسمر المنطقه ويدير ريحه مش حلوه ابداً فلهذا انتبهوا من الموضوع هذا؛؛
وبس حبيباتي اتمني بوست مفيد للجميع اوهبكم اموووواه..
