مقشر+قناع للبشره

صباحكم ورد بنوتاتي ومداماتي الحلوات،،
حبيبات قلبي انتم عارفين لما اندير اي ماسك او مقشر طبيعي ع طول نذكر فيكم لان ماعنديش غيركم طبعاً مانحبش نبخل ب ولا معلومه عليكم وتوا ح تقولو علاش جود ديما تنزل ماسكات طبيعيه وتستخدم فيها لان انا من الناس الي نحب الحاجات الطبيعه ع المنتجات التجاريه وفايدتها كبيره ع بشرتي يعني نخش للمطبخ نقدر اندير مقشر وقناع طبيعي يكون مفيد للبشره طبعاً؛؛

11210484_829623830418968_7701573422322668727_n

  • مكونات السكراب يعني تقشير للبشره وف نفس الوقت قناع للوجه وللجسم مكونات بسيطه موجوده ف كل بيت وغير مكلفه ولكن مفيده جداً ف توحيد لون البشره وتصفيتها رهيب رهيب؛؛
  • مكونات هما قهوة نسكافيه+كاكاو+سكر+شوفان+قطرات من زيت للوز الحلو لو مش متوفر ديري بدله قطرات زيت زيتون+قطرات مية ورد المقادير ع حسب انتي الكميه الي تبيها انا درت بعيني والي يلزمني يعني تقريباً كاشيك كاشيك من كل حاجه تخلطيهم مع بعض زي ما تشوفو الخليط يكون متماسك مش سائل هلبا لان بديري بيه تقشير وبعدها بتخليه نص ساعه ع وجهك ك ماسك مغدي ومفيد جداً؛؛
  • طريقة الاستعمال يكون وجهك نظيف وتغسلي بميه دافيه باش تفتحي المسام و بشرتك تستقبل الماسك بسرعه وتحركيه بحركه دائريه من فوق لتحت حتي للرقبه وبعدها تخليه يجف ع وجهك تحسي كله يتشحط 30دقيقه واغسلي مناسب لجميع انواع البشره لان مافيه اي مواد تحسس البشره ولا تهيجها وتقدري تقشري بيه جسمك خليه 5دقايق واغسلي عادي بعده طبعاً يكون مره واحده فقط ف الاسبوع لان مقشر قوي شويه؛؛
  • انا درت كميه تكفيني 4مرات وحطيت باقيه ف حكه نظيفه فاضيه وبنخليه ف الحمام امتاعي مش ح يفسد لان مافي اي مواد حمضيه ولا مواد تتحلل؛؛
  • ع فكره لو عندكم شكولاته نوتيلا تقدرو اديرو بيها ماسك بروحها للبشره ممتازه ف توحيد لون الوجه ويكون ف علمكم ف ماسكات تجاريه تبيع فيه ماسك الشكولاتة جاهز ولكن تقدرو اديرو بروحكم ولا مصاريف زايده وطبيعيه ع عينكم؛؛
  • ملاحظه اخيره تعرفو علاش انزل ف كل ماسك او مقشر اندير باش انشجعكم اديرو وتهتموا ب بشرتكم بشكل مستمر حبيباتي الاهتمام ب البشره يبي استمرار لو تبي تشوفي نتائج حلوه وترضيك الصراحه انا اهتمامي بنفسي يخليني راضيه ع شكلي ومرتاحه نفسياً فلهذا عمركم ماتبخلو ع بشرتكم بحاجه ع طول اهتمو،،

وبس حبيباتي اتمني الافاده للجميع دومتم بود اوهبكم امووووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!