فوائد سودو كريم للبشره

صباحو يوم مشرق وزاهي ع بنوتاتي ومداماتي الحلوات

حبيباتي ح نتكلم ع فوائد سودو كريم طبعاً معروفه متوفره ف كل الصيدليات وتستعمل للكبار والاطفال وحتي سعرها رخيص مايفوت 10دينار ليبي بس فيها فوائد هلبا ح نتكلم عليها ولكن بنقوللكم لوصفه اتبيض الايدين والرجلين الناس الي مهلوكه ايديها ورجليها من الشمس سودو كريم وزيت للوز الحلو حلك النهائي ب اذن لله؛؛

  • بنقوللكم ع مكونتها الرئيسيه الي خالي من الكرتيزون يعني لما نقول كريم تركيبته خاليه من كرتيزون معناها مافيها ردة فعل عكسيه لو وقفتي عليها وعادي تستعملوها بدون استشارة دكتور تتكون من:-
    اللانولين هيبوالرجينيك للمساعدة في توفير خصائص المطريات.
    أكسيد الزنك هو قابض مما يقلل من فقدان السوائل الأنسجة.
    بنزوات البنزيل وبنزيل سينامات هي من بين المكونات بيرو بلسم      المعترف بها لتضميد الجراح.
    البنزيل الكحول هو مخدر موضعي ضعيف الذي يعمل على تخفيف الألم الموضعي والاحمرار وهو يعمل أيضا كمطهرومضاد للجراثيم المسؤولة عن الحماية من الملوثات البكتيرية الشائعة.؛؛
  • استعمالتها:-
  1. تستعمل للجروح تسكنها وتلم الجرح.
  2. تستعمل للحروق طفيفة اي الحروق السطحيه تعالجها وتخفف اثرها.
  3. تستعمل لقروح الفراش الناس الكبيره ف السن او الي امداير عمليه مايقدر يتحرك من الفراش وعنده طياب او قروح جلديه تعالجها تماماً.
  4. تورم الأصابع لو عندك صوابع ايديك او رجليك متورم تعالجها وتهدي التورم.
  5. حب الشباب عندي صديقتي جربتها لحب الشباب فعلاً خففت هلبا الحب لانها هي زي المضاد ومطهر للبكتيريا.
  6. تعالج الاكزيميا سواء عند الصغار او الكبار لما يكون الجلد شديد الجفاف وحساس تهديه وترطبه البشره تماما.
  7. تعالج حروق الشمس الي ايديها او رجليها او وجهها انصهد من الشمس وسببلها قشره خارجيه ع الجلد ترطب الجلد وترجع البشره لونها الاساسي.
  8. علاج طفح الحفاضات للبيبي يعني لو عندك بيبي عنده طياب من البامبرز استعمليه ليه بدون تردد تعالج الحرار ع طول.
  9. تستعمل لتهدئة الوجه بعد نزع الشعر بكل الطرق يعني لما تحولي شعر وجهك ب الحلوه او بشمعه او ب الفتله تحطي من الكريم هذا بعد غسل وجهك وح يهدي كل الالتهابات استعمليها لمدة اسبوع او لين تهدا بشرتك ع حسب استجابة كل جسم.؛؛
  • امتي تستعملوها تكون ف لليل لان ما تبيش شمس لعدم توفر نسبة حماية الشمس فيها ,,وفترة الاستعمال تكون فترة لعلاج الجلد يعني ماتنفع ك مرطب يومي نستعملوها لما يبدا عندنا التهاب او حرق او واحده من الحالات الي ذكرتهم بعد ما يتعالج الجلد توقفو عليها لانها هي كريم معالج وليس مرطب يومي يعني ركزو الي ماعندها شي ماتستعملهاش؛؛
  • اما طريقة تبيض الايدين وترطيبهم وطبعاً جربتها شخصياً وحتي بنت خالتي استمرت عليها اعطتها نتيجه رهيبه لان ايديها محروقات من الشمس وجافات ف الطريقه ساهله جدا,,
    ـ تاخدي زوز كواشيك كبار من سودو كريم وكاشيك كبير زيت للوز الحلو تخلطيهم مع بعض ف حكه نظيفه وفاضيه واستعمليها لترطيب ايديك ورجليك يومياً قبل النوم ف لليل وح تشوفي نتيجه خيال بعد ما تستعمليها لإيديك البسي قوانطي طبي او الي زي امتاع الصبغه وللرجلين ادهنيهم والبسي شخشير ممتاز جداً الخلطه هادي تبيض وتنعم الايدين والرجلين تخليهم زي البيبي جربوها وادعولي وزي ما قلت ف لليل فقط مش تدهني بيها ف النهار وتطلعي ردو بالكم تحرقكم لان مافيهاش واقي شمس؛؛

وبس حبيباتي اتمني الافاده للجميع اوووهبكم هلبا….

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!