مسائكم ورد بنوتاتي ومداماتي الطرفونات،،
حبيبات قلبي بوست مفيد للناس الي تبي ادير ليزر لازالة شعر الجسم او الوجه؛؛
- اول شي بنقول لآي واحده تبي ادير ليزر تختار دكتور متمكن ومتخصص ف لليزر ويكون جهاز الليزر كويس واصدار جديد وطبعاً بدير تحليل هرمونات وبتتآكد انه ماعندهاش تكيسات مبياض لان الي عندها تكيسات راهو لو بديرب ليزر مافيش فايده غير تخسري ف فلوسك فلهذا عالجي نفسك وبعدين ديري ليزر؛؛
- تاني شي لليزر يستخدم لجميع الاعمار عادي يعني من 18 فما فوق وأشعة لليزر لإزالة الشعر مش مؤذيه وماتسببش سرطان الجلد يعني ما يخوفش ولكن زي ماقلت اختارو دكتور وجهاز اصداره عالي؛؛
- ثالث شي انه مش ح تتريح من الشعر ف يوم وليله لا اكيد بيكون ع جلسات حسب ما يقررلك الدكتور؛؛
- رابع شيً اكثر حالات الي بتستفاد هما الي بشرتهم بيضاء وشعر جسمهم يكون اسود وغليظ هادو اكثر ناس يجيب الليزر معاهم نتيجه فعاله؛؛
- خامس شي يستخدم جهاز الليزر لكل اماكن الجسم عادي بدون استتثناء مايسبب اي مشاكل؛؛
- سادس شي ما ينصحوش الدكاتره انكم تستخدمو لليزر للشعر الوبري (الخفيف) لان لو استعملتوه للشعر الخفيف بيعطيكم نتيجة عكسيه وهو بدل ما ينقص يزيدلك الدبل خاصة ف منطقة الرقبه وهذا يصير مع جميع انواع اجهزة الليزر؛؛
- سابع شي جهاز الليزر ما يزيل الشعر 100% هو يضرب ف خلايا الشعر ويخفف من نموها تدريجياً؛؛
- ثامن شي كل حاله تحتاج لكدا جلسة من 4/10 جلسات ع حسب الحاله وشني يقررلها الدكتور ومابين الجلسه والجلسه من 20يوم لشهر ع حسب مايقول الدكتور؛؛
- تاسع شي الليزر غير فعال اطلاقاً ف ازالة الشعر الآبيض حتي لو كان شعر جسمك اشقر مش لازم اديريه بدل مابينقص انتي بتزيده؛؛
- عاشر شي فوائد الليزر الفعليه هي انه الشعره السوداء مع لليزر يتغير لونها وتولي شقراء والشعره الغليظه تولي اقل كثافه وخفيفه واكيد الميزه الاهم انه الشعر يبدآ يعطل مايطلعش بسرعه يبي اسابيع باش يطلعلك تاني؛؛
- ملاحظة مهمه هي وقت اديرو جلسات ليزر يمنع مانعاً باتاً انكم تحولو شعر بالحلوه او الشمعه بس تقدرو تحولو الشعر بماكينة الحلاقه لان ماكينة الحلاقه ماتحولش الشعر من الجذور عكس الحلوه والشمعه فلهذا عادي تقدرو تستخدموها؛؛
- وملاحظة تانيه وقت جلسات الليزر ما تتعرضوش للشمس مباشرة وتستخدمو واقي شمس حتي ف البيت واكيد حتي المكياج بتوقفو عليه هذا ف حالة بديرو جلسات ليزر للوجه؛؛
وبس غالياتي اتمني الافاده للجميع دومتم متآلقات ااوووهبكم اموووواه..
