مساؤ شوكولا وحلويات بنوتاتي ومداماتي الحلوات
حبيباتي البوست هذا للعضوات الي طلبوا مني طريقة ماسك الشوكولا طبعاً ماتخافوش مش وصفة كيكه ههههه بس صورة البوست لذيذه؛؛
- القناع هذا من اشهر الاقنعه ف العالم واغلاهم ف السعر ماسك الشوكولا او الكاكاو مشهور جداً ف اوروبا والمنتجعات المعروفه ب انه ماسك لتوحيد لون البشره يعطي الوجه صفاء واشراقه رهيبه والبنات الي جربوه من البوست السابق يرايت يذكرو تجربتهم لان قالولي شافو نتائج حلوه طبعاً هو ف جاهز ماسك الشوكولا ف كدا ماركه وتلقوه سعره اغلا قناع ينباع ولكن ليش الاسراف الزايد ماهو انديروه بروحنا ولا صرف فلوس ع الفاضي ونفس النتيجه اشراقه وصفاء ونقاء وتوحيد لون البشره؛؛؛
- المكونات ساهله جداً ومتوفره ف كل بيت او كل محل جنبك هي شوكولاته خام الي تكون ساده بدون اي اضافات امتاع الحلويات مايوصل سعرها 4دينار ليبي+ نسكافيه ولو ماعندكش مش لازم لان مكون مخير ليك ماهو اساسي+مية الورد؛؛
- الطريقه تاخدو زوز مربعات من الشوكولا ودقدقيهم ب الموس لو عندك ميكرويف تحطيها دقيقه واحده فقط ماتخليها تنحرق منك اما لو ماعندك ذوبيها ف حمام مائي ع البخار كآنك بديري شوكولاته للكيكه بعد ما تسيح كلها تاخدي شوكه او مضرب امتاع حلويات افضل وخلطوها تزيد تندمج كويس بدون تكتلات بعدها لو بضيفي النسكافيه تاخدي كاشيك كبير قهوة نسكافيه وتحطيها مع الشوكولا وتخلطي كويس كويس لين تندمج المكونات ف بعض بعدها زيدي عليها مية الورد وحركي حركي لو جمدت منك تزيدها شويه مية سخونه وحركي كويس ف الاول لما ديروها خلو القوام امتاعها سائل سائل ما تخافوش تاني يوم ح تلقوها جامده تماماً زي الي ف الصوره بعد ما تحركو وتدمجو المكونات كويس جيبي حكه فاضيه تكون نظيفه وصبيها كلها بدون ماتصكرو المغطه بعد تبرد شوي صكروها كويس وخلوه ف ثلاجه امتاعكم بس ردو بالكم تولو عليها تاكلوها ههههه لان بصراحه الشكل والريحه مغري هلبا فلهذا خلي عزيمتكم قويه؛؛
- امتي تستعملوها يكون مره ف الاسبوع تحطي الماسك ع وجهك لمدة نص ساعه وتغسليه بعدها ح تشوفي الاشراقه والنظاره الي تطلع من وجهك ومع الاستمرار عليه يوحد لون الوجه والبشره تماماً؛؛
ف حالة تبو تستعملوه للجسم وعادي طبعاً ولكن باش مايلبز بانيو الدوش تاخدي كميه قليله ع كف ايديك وخلطيها مع للوشن امتاعك يعني ع كف ايديك صبي قطرات من شامبو الجسم امتاعك وادعكي بيها جسمك يكون مببلول 10دقايق واغسلي وتشوفي نعومة البيبي ومفعولها رهيب ف توحيد لون الجسم طبعاً مره واحده ف الاسبوع؛؛
وع فكره حتي شوكولا النوتيلا الجاهزه تقدرو اديرو بيها ماسك مافي مشكله ولكن انا درته هكي افضل لان شوكولا خام بدون اي اضافات تانيه؛؛
- ماسك مناسب لجميع البشرات ولكن ف حالة بشرتك حساسه جداً جداً ما ديريه مرات تتحسسي منه مع انه قليل نادر بشره تتحسس من شوكولا؛؛
وبس حبيباتي اتمني الافاده للجميع من البوست دومتم بود اوووووهبكم نفره نفره..
