البخار وفوائده للبشره

معرض الصور
1 صور
البخار وفوائده للبشره
أداة تنظيف الرؤوس السوداء

مسائكم طيب بنوتاتي ومداماتي الطرفونات؛؛
قبل شويه القيت روحي فاضيه قلت خلي ندلع وجهي اليوم درت بخار وماسك لوجهي و قلت خلي انفيد البنات ب بمنشور؛؛

0

  • طبعاً الي ف الصوره ماكينة بخار للوجه وظيفة هالبخار هذا يفتح المسام وينظف البشره من الزيوت والترسبات الزايده ممتاز لكل انواع البشره واحسن شي اديري بخار لوجهك وبعدها اتحطي ماسك امتاعك سواء جاهز او ف البيت لان المسام مفتوحه والماسك يقوم بوظيفته اكثر لما المسام انظيفه ومفتوحه وينظف البشره؛؛
  • طريقه البخار ساهله سواء عندك ماكينه او لا الي ماعندهمش ياخدو طنجره صغيره ويصبو فيها ميه لين تغلي ونفس الطريقه المعتاد عليها؛؛
  • من ناحية شني تحطو ف الميه انا اليوم حطيت ف الميه شويه كليل وزعتر وعرقين نعناع وقشرة ليمون وعادي الي متوفر عندكم ماتتقيدوش تقدرو اديرو حتي عرقين معدنوس كويس ف تنظيف البشره حتي البابونج او الفليه كله كويس للبشره حتي الشاهي الاخضر يعني ما تقيدوش روحكم الي موجود ف البيت ديروه عادي؛؛
    طبعاً تجيبي فوطه تغطي راسك بيها وطبسي ع الماكينه دقيقه وقيمي راسك دقيقه وقيمي راسك يعني من 5/10دقايق تقعدي طبسي وتقيمي ف راسك ع البخار؛؛
  • بعد اتكملو من البخار تمسحوا وجهكم بقطنه وبعدها تقدرو اتحطو الماسك الي يعجبكم سواء جاهز او ف البيت؛؛
  • انا اليوم درت بياض البيض وقطرات ليمون يهبل الماسك هذا مناسب لجميع البشرات ماعاد الحساسه لا مايناسبها ؛؛
  • البشره الحساسه والجافه ادير ماسك حليب البودره ومية الورد ممتاز للبشره ينظف وينعم البشره؛؛البشره الدهنيه والمختلطه تقدر ادير بدل حليب البودره نشآ ومية ورد ممتاز ينظف ويقلل من المسام؛؛
  • المرحله الثالته والاخيره بعد ماتغسلو الماسك ب الميه الدافيه وبعدها تغسلي ب المصقع وتجيبي ثلجه مرريها ع بشرتك صكري المسام؛؛
  • وما تجففي بشرتك ب الفوطه ادهني ب اي كريم مرطب عندك انا درت كريم بيبانتين زي الي ف الصوره ممتاز طبعاً ويناسب جميع البشرات الدهنيه والمختلطه والجافه والحساسه والعاديه؛؛
  • ملاحظة الي عندهم رؤس سواء خاصة البشرات الدهنيه تقدري بعد ماديري البخار تجيبي اداة الرؤس السوداء تنباع ف الصيدليات وتبعي وجهك ب الآداة تحولي كل الرؤس السوداء والحبوب ب لطف وبعدها تغسلي وجهك وتحطي الماسك امتاعك علاش قلت بعد البخار لان بعد ماديري البخار لوجهك تكون البشره طريه والمسام مفتوحه يساعد ع ازالة كل رؤس السوداء وزوان الانف تقدري تعصري ب الشويه انفك ب قطنه تكون مببلوله ميه دافيه اتساعدك اكثر؛؛
  • يستعمل البخار مره ف الشهر للبشره الجافه والحساسه؛؛ ومرتين ف الشهر للبشره الدهنيه والمختلطه؛؛ وماتستعملو البخار اكثر من هكي لان ح ضرو بشرتكم وتكثرو التجاعيد ردو بالكم؛؛
  • حاجه اخيره كونو خبيرات نفسكم كل شي تقدرو اديروه بروحكم ولا تتعرضو للاستغلال الزايد من المزينات الاهتمام مافيه علم ولاذره تبعو خطوات صحيحه وتقدرو اديرو تنظيف بشره بروحكم غير شمرو ذرعانكم وتلحلحو فكونا من البخل الزايد ايوا؛؛

وبس حبيباتي اتمني الافاده ب البوست للجميع اووووهبكم امووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!