غسول للبشره الجافه (والعاديه)2
غسول_للبشره_الدهنيه (والمختلطه)
صابونيه_في_البيت
مسائكم فل بنوتاتي ومداماتي الطرفونات،،
حبيبات قلبي بوست ح يكون ع افضل غسولات للبشره بجميع انواعها،،
- قبل مانبدآ ف البوست بنقول انه ضروري نهتموا ب بشرتنا البشره الصافيه والنظره اهم شي واهم من المكياج ع فكره البشره الي تكون فيها عيوب مهما خديتي من ماركات مكياج وتبي تغطي العيوب هادي ح تبان ح تبان ومش ح يطلعلك مكياجك حلو يعني الي نبي نقوله اهتموا ب بشرتكم من اختياركم للغسول الصحيح وكريم الترطيب المناسب للبشره ونديرو تقشير اسبوعي وبخار لوجهنا مره ف الشهر وماسك اسبوعي نكثرو شرب الميه واكل الخضروات والفواكه هذا كله يعطيك بشره نظره وصحيه لو عندنا عيوب مزمنه نمشو لدكتور كويس ونلتزمو بكورس العلاجي وضروري بعد كل علاج تسئلوا دكتوركم طرق الحمايه الي بعد انتهاء فترة العلاج،،
- اول شي بنحكي ع افضل انواع غسولات للبشره الجافه والحساسه الي استخدمتهم ع مستوي شخصي ومشكورين من دكاترة جلديه هو غسول من ماركة سيفر عليه كتابه بالوردي من الخارج ونزلت عليه بوست فيما سبق وغسول تاني من ماركة كيو ڤي للبشره الجافه والحساسه وغسول الثالث هو ماركة سيتافيل الي صورته ف البوست بجد حلو زي الحليب مناسب جداً للبشره الجافه والحساسه يرطبها ويمنع تشققها او تسبب بالقشور واكيد اهم شي ترطيب البشره قبل النوم،،
- تاني شي افضل غسولات للبشره الدهنيه والمختلطه وقابضه للمسام ومخففه افرازات زيوت البشره وتمنع ظهور حبوب عندكم من الماركات التجاريه افضلهم نيتروجينا بكل انواعه يناسب فقط البشره الدهنيه والمختلطه عندكم النوع الي مصوراته ف البوست بالقريب فورت ممتاز وتكلمت عليه فيما سبق فيه هذا الغسول السائل وفي الغسول الكريم بصراحه الكريم افضل تحسي فعلاً بشرتك تتنفس وتنتعش وينظف من الاعماق اما بالنسبه للماركات الطبيه اكيد ع رآسهم غسول فيشي نتودريم الاخضر وغسول لاروشيه بوسي وغسول نوريفا وكلينك وكلارنس هادو عندهم افضل غسولات طبيه للبشره الدهنيه والمختلطه وع فكره حتي البشره الدهنيه تبي ترطيب بس ترطيبها يكون جل او سائل او سيروم باش مايزيت معاك،،
- ثالث شي بنقوللكم ع طريقة صابونيه ف البيت فيما سبق قلت عليها و ح نعاودها تاني للافاده لانها بجد رهيبه واقتصاديه جداً غير مكلفه بتاتاً ونتيجتها توحد البشره وتخليها مشرقه..
ـ هي تاخدو صابون دوف الوردي لو كانت بشرتك جافه تبشريه زي الجبنه و دوبيه ف حمام مائي او ف ميكرويف بعد ما يدوب صبي عليه مية ورد عبيه كويس لان الصابون ح يمتص مية الورد كله وقطرتين فقط من زيت اللوز الحلو حطيه ف حافظه خليه ف حمامك وكل صبح اغسلي وجهك بيه وادعيلي بعدها..
ـ للبشره الدهنيه خودو صابون دوف الابيض بنفس الخطوات بس بدل زيت للوز ديرو قطرتين ليمون او قطرتين زيت لليمون متوفر ف العطريه؛؛
ـ ع فكره مش شرط يكون صابون دوڤ تقدرو اديرو بنفس الطريقه ب انواع صابون تاني زي صابون الكركم او صابون لوزالحلو او صابون البابايا مافيش مشكله وكله متوفر ف العطريات بس نتيجه رووووعه،، - ف ناس ح تقولي به كيف تستخدمي ف جميع انواع الغسولات انقوللكم علاش لان انا نتعامل مع بشرتي حسب مناخ الجو مرات تقلب لجافه ومرات تقلب لمختلطه مع انه طبيعة بشرتي عاديه وكل شهر نغير ع نوع غسول جديد الغير والتجديد كويس ف روتين اهتمام بالبشره لان لما تستمري ع شي معين تدمن البشره عليه ومعاش يعطيك نفس النتيجه الاوله الي عطاها ليك فلهذا ديما جددو ف روتين اهتمامكم ب بشرتكم؛؛
- الي بتسئلني ع افضل كريمات مرطبه للبشره ف انواع واشكال من الماركات الكويسه بس ديما لما تسئلوني ف تعليقات حددولي ميزرانيتكم لان ف الغالي والرخيص ولكن انا ديما ننصح بكريم بيبانتين الي خطه ازرق للبشره الدهنيه وبمرهم بيبانين الي خطه وردي للبشره الجافه ويستخدم فقط ف لليل قبل النوم،،
- اخر ملاحظة مية الورد خلوها رفيق دربكم تمسحو وجهكم بيها مرتين ف اليوم هي افضل قابض طبيعي للمسام الناس الي تتحسس من مية الورد خففوها بالميه المعدنيه وحتي مغلي شاهي الاخضر رهيب وحتي عصير الخيار كويس واكيد تحتفظو بيه ف الثلاجه؛؛
وبس برنسيساتي اتمني الافاده للجميع دومتم متآلقات اوووهبكم اااموووواه..
