‫تكنيك سموكي ايز

مساؤ فل اخر لليل بنوتاتي ومداماتي الطرفونات،،
حبيبات قلبي بوست ح يكون ع معني تكنيك السموكي ايز،،

307

  • قبل ما نبدآ ف البوست انا جبتلكم كدا صوره للسموكي وكدا طريقه وكدا لون باش تكون عندكم خيارات متعدده،،

  • نبي نفهمكم حبيباتي السموكي مش معناه اسود وابيض لا غلط السموكي هو المكياج الي تكون الوانه غامقه وقاتمه وتكون مموه ومدموجه كويس كويس السموكي تقدرو اديروه بعدة الوان اسود.بنفسجي.اخضر.بني.ازرق وكدا درجه بس بشرط يكون اللون الغالب ع العين هو اللون تكون درجته غامقه وقاتمه جداً ديما ينحط ع مغطة العين الي هو الجفن المتحرك وبعدين يبدا الدمج من الجفن المتحرك لكسرة العين نفس صور البوست؛؛

  • السموكي يمشي مع جميع انواع العيون بس كل تفصيلة عين تبي طريقتها مثلاً العين الصغيره تبي اديري سموكي حاولي تكحلي داخل عينك بلون بيج او ابيض باش تبان كبيره وبعدها تموهي تحت رموشك التحتيه بلون الظل الي مدايرتيه ع جفن المتحرك عادي،
    العين الكبيره تقدر ادير سموكي وتكحل ب الاسود وتدمج الظل تحت رموشها السفليه،
    ـ العين المبطنه افضل شي ليها مكياج السموكي بس يكون مطفي بدون لمعه،
    ـ العين الي رمشها فيه تجاعيد ممنوع تستخدم ظلال فيهم لمعه لا السموكي المات الي هو مطفي حلو ليها،
    ـ العين الغارقه يمشي معاها سموكي بس السموكي يبدا حرفc يعني من نهاية العين تحطو للون الغامق ما تحطوش من النص ع الرمش المتحرك لان بيزيد يبينها غارقه داخل مثلاً درجو الالوان السموكي يكون لون بني متوسط ع جفن متحرك وع نهاية الجفن بني غامق مع الدمج اكيد؛؛

  • اهم شي ف السموكي لو تبوه يبان فعلاً حتي ف الصور هو الرموش ضروري تركزو ع رموش او تركبو لان السموكي ااوفر ع العين ف تبي رموش يبينو الوان الظلال هادي،،

  • الميزه الحلوه ف السموكي لو ما تقدرو ترسمو عينكم ما تحيرو تقدرو اديرو خط بالقلم فوق رمش الفوقي وتتدمجو هذا علاش اسمه سموكي وفي حالة بترسمو عينكم عادي بس بدون مبالغه يكون رسمة خط رفيع،،

  • السموكي تقدرو تحطو معاه اضاءه ع مدمع العين عادي مافيش مشكله والاهم الاضاءه تحت الحاجب تختارو اضاءه مطفيه او بلمعه اكيد ع حسب الذوق علاش ضروريه الاضاءه تحت الحاجب لانها ح تبرز الالوان اكثر وتعطي اضاءه للعين؛؛

  • في ناس تحب السموكي يكون مات يعني مطفي بدون قلتر او رش وفي ناس تحب السموكي يكون فيه قلتر او شيمر لمعه زي بعض صور البوست هي مش قاعده ولكن هادي ترجع ع حسب الاذواق والمكان والزمان اكيد؛؛

  • بالنسبه للروج في ناس تحب مع السموكي تحط الوان نود يعني درجات الترابيه باش تهدي اللوك وفي ناس تحب مع السموكي تحط روج احمر عادي جداً وهنا معناها بتقوي اللوك اكثر؛؛

  • يعني الي يقولو مايجي روج احمر مع سموكي لا يجي وزي ماقلت يرجع للذوق واكبر ارتست ف العالم تلقوهم يديرو ف لوكات سموكي مرات معاها 3درجات من الارواج ترابي واحمر و وردي كل واحده وذوقها وستايلها وزي ماقلت يرجع للوقت وللزمان وللمكان وللبسه اكيد والاكسسوارس الي لابستيهم؛؛

  • اهم نقطه ف السموكي تاخدو راحتكم ع الاخر ف الدمج ما تستعجلوش وراء كل سموكي صحيح دمج صحيح وع المهل؛؛

  • طبعاً ف اسهل سموكي يسمي ب كلاسك سموكي يعني ب الالوان الاساسيه للسموكي هي اما درجة الاسود الغامق مع البني المتوسط او المشماشي او درجة البني الغامق مع البني المتوسط او البني المحمر وتكون الدرجات الغامقه ع جفن المتحرك للعين واللون الاقل درجه يكون للدمج كسرة العين؛؛

  • السموكي مش شرط تكون عندك ماركات غاليه من الايشادو باش تنفذيه لا عزيزتي تقدري اديره ب اي ماركه عاديه عندك وحتي بقلم الكحل سواء اسود او بني عادي الاهم ف اليديات الي بتحط السموكي؛؛

  • ف حالة تبي الوان الظلال تبان قويه وقاتمه معاك تقدري تحطي بيس الي هو يقوي لون الظل ويثبته ع جفن العين ف حالة ماعندكش تقدري تحطي شويه من الخافي او كريمة الاساس وبعدها اثبتيها ب الباودر امتاعك او اي لون ظل يكون درجته ف البيج واكيد مطفي بدون لمعه باش بعدها تقدري تحطي عليه الالوان امتاع ظلالك وتبان قويه وثبتت ف نفس الوقت،،

  • وفي طريقه تانيه لتقوية لون الاظلال وثبيتهم هو تستخدمي قلم لونه ابيض او بيج مطفي ع جفن عينك المتحرك وبعدها ثبتيه بظل يكون نفس اللون وتحطي الوان اهم شي خلي ايديك سريعه ف الدمج باش مايتكتل منك؛؛

  • وفي طريقة ثالثه هو تحطي بيس ب الالوان الغامقه سواء كان اسود او بني غامق الافضل يكون قلم او حتي جل ايلاينر بعد ماتحطي منه ع جفنك المتحرك ع طول تحطي الالوان امتاعك سواء كان اسود او بني او خضوري او ازرق غامق او موڤي غامق ع حسب الذوق هكي اللون يكون قوي واكيد تكون سريعه ف الدمج وزي ماقلت الدمج يبدا من كسرة العين اما ع الجفن المتحرك حطي الظل بطريقة التابتنك او الطبطبه او حتي بطرف صبعك الصغير يجي اللون قوي؛؛

  • طبعاً ديما لما تبو اديرو سموكي ابدو بمكياج العيون اول شي قبل الوجه باش اي تلبيزه او مرات يطيح من بقايا الفرشه ظل تحت عيونك تقدري تمسحيه بالوايبز بدون ما تقعدي تعاودي وتصححي مكياجك كملي مكياج عيونك وامسحي كل الزايد وبعدها ابدي بمكياج الوجه هكي تضمني مكياج نظيف ومرتب بدون اي تعفليق واعصاب؛؛

  • وشكراً لملوكتي لتصميم صورة البوست،،

وبس برنسيساتي اتمني الافاده للجميع دومتم متآلقات وجمعتكم مباركه ااامين اوووهبكم امووووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP Facebook Auto Publish Powered By : XYZScripts.com
Social Network Widget by Acurax Small Business Website Designers
error: Content is protected !!