‏مقشر القهوه ـ وجه & جسم

صحه غداكم بنوتاتي ومداماتي الطرفونات،،
حبيبات قلبي بوست سريع ع مقشر طبيعي للجسم وللوجه،،

277

  • انا امس درته المقشر هذا هو سكراب القهوه الي ديما ننصح بيه لان من افضل واحسن المقشرات الطبيعه والي ادير نتيجه رهيبه سواء للوجه او للجسم وطبعاً القهوه فيها فوائد ك اقنعه رهيبه لان تحتوي ع مادة الكافين الي هي تحارب التجاعيد والارهاق والترهل ننصحكم بيه ااكيد تعتمدوه ك مقشر طبيعي اسبوعي،،
  • المكونات سهله وبسيطه ومتوفره ف كل بيت:
    هي كاشيك صغير من قهوه عربيه+ سكر بني ف حالة مش متوفر عادي ديرو سكر ابيض+ زيت زيتون تخلطي المكونات مع بعض بيجيك خليط وسط نفس صورة البوست،،
  • قبل لا تستخدمو التقشير للوجه ضروري يكون نظيف والافضل تغسلوا بميه دافيه باش تنفتح المسام ولو بديرو بخار مافيش مشكله عادي وبعدها ديرو تقشير بحركه دائريه خفيفه تخلوه 5دقايق وتغسلوا بميه دافيه بعدها مصقعه باش تتسكر المسام والافضل تمسحوا وجهكم بقطنه فيها مية ورد او مغلي شاهي الاخضر ك قابض طبيعي للبشره؛؛
  • بالنسبه للاستخدامه للجسم ع فكره الناس الي عندها التفزيرات بسبب زيادة الوزن او الحمل او ترهلات ننصحها هلبا هلبا هلبا ب المقشر القهوه وتقدر تستخدمه يومياً ك قناع للجسم قبل الدوش بنص ساعه تحطي المقشر ع اماكن الترهلات وعلامات التمدد ولو تلفي جسمك ب السلوفان خير وخير ح تشوفي نتيجه رهيبه من الشهر الاول،،
  • ف حالةبشرتك جافه ديري 2كواشيك صغار زيت زيتون اما ف حالة بشرتك دهنيه ديري قطرتين زيت زيتون مع مية ورد؛؛
  • بالنسبه لاستخدام المقشر للوجه مره ف الاسبوع اما للجسم ك قناع عادي تستخدميه يومياً واكيد بعد التقشير ضروري ترطبو بكريم ترطيب والافضل اليوم الي بديرو تقشير تكوني قاعده ف البيت ماتطلعي للشمس ولا تستخدمي مكياج بعده يعني يوم خميس او جمعه افضل الايام؛؛
  • ع فكره ماسك القهوه للهالات وتجاعيد تحت العين رهيب هو تاخدي كاشيك صغير قهوه+ كاشيك صغير زيت للوز الحلو وتخلطيهم مع بعض تحطيهم تحت عينك لمدة15 دقيقه وتقدري تستخدميه يومياً عادي؛؛

وشكراً لملوكه حبيبتي ع تصميم اللوقو خاص بيا؛؛
وبس فلذات تشبدي يومكم مبروك وعدوكم مهلوك دومتم متآلقات اوووهبكم امووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!