مسائكم ورد بنوتاتي ومداماتي الطرفونات،،
حبيبات قلبي بوست ع السريع لآفضل مية ورد استخدمتها؛؛
- قبل ما نبدآ ف البوست اكيد انتم عارفين اني اكثر انسانه نستخدم ف مية الورد بشكل رهيب ومستحيل نستغنا عليها يعني استخدمت انواع واشكال من امتاع المحلات للعطريات للطبيعيه او تجاريه ونقدر نحكم كويس ع انواع مية الورد من كثرت استخدامي ونميز الفرق مابينهم،،
- انا كنت نستخدم ف مية الورد شيشتها خضراء مرش سعوديه واستخدمت مية الورد صابرين شيشة خضراء بلاستك واستخدمت مية الورد الايرانيه وغيرها وغيرها سواء ف ليبيا او خارجها وكلهم كويسات؛؛
- اما الفتره هادي استخدمت نوع الي هي شكلها ف صورة البوست هي شركة ليبيه وصنعها ف اوربا وخاصة بالبشره تنباع ف الصيدليات والعطريات سعرها ف حدود 5/10 دينار مش مذكره السعر بالزبط بصراحه قمة الروووووووعه رررهيبه وحسيت بفرق هلبا ع استخدامي لمية الورد النوعيات التانيه لان الفتره هادي بشرتي متحسسه بسبب مناخ الجو ومية الورد هادي خففتلي التحسس وقللت من مسام بجد حلوووه الاخر وبما انكم ع طول تسئلوا فيا ع نوعيه كويسه لمية الورد اااكيد ننصحكم بالنوعيه هادي وح تشوفو فرق ف بشرتكم من نظاره وتخفف المسام وتقلل من التحسس وتخفف من ظهور الحب ف الوجه؛؛
- طريقة استخدامي لمية الورد نخليها ف الثلاجه اكيد لان نستخدم فيها ومسقعه تنعش الوجه اكثر ونمسح بيها وجهي مرتين ف اليوم مره الصبح قبل مانغسل وجهي ومره ف لليل بعد ما نظف وجهي من اي كريمات ترطيب او مكياج؛؛
- وطبعاً تقدرو اديرو مكعبات ثلج مية الورد ممتازه جداً ولكن تستخدمو مكعب ثلج واحد ف اليوم وتلفوه بقطنه لان ف بشرات تتحسس من ملامسة الثلج مباشرة؛؛
- واكيد مية الورد تقدرو اضيفوها لآي قناع تستخدمو فيه لوجهكم ولكن ف حالة بشرتك تتحسس من مية الورد خففيها بالميه العاديه.
وبس برنسيساتي اتمني الافاده للجميع دومتم متآلقات اااوووهبكم اموواه..
