‏طريقة استخدام ديرما رولر

[فوائدها]
مسائكم ورد بنوتاتي ومداماتي الطرفونات،،
حبيبات قلبي بوست ح يكون شرح مبسط ع طريقة استخدام ديرما رولر وفوائدها للبشره وللجسم وللشعر.
147
  • اول شي فوائد الديرما رولر للوجه وللبشره ولشعر هي اداة رولر فيها ابر صغيرونه نفس صورة البوست وتجي ب أحجام مختلفه وكل حجم يستخدم لشي معين،
    ـ تستخدم لنضارة الوجه خاصةً الي بشرتهم تكون باهته وصفراء الديرمارولر تحفز انتاج الكولاجين وتجديد خلايا البشره وتعالج التفزير الي هما تشققات الجلديه الي تكون بسبب الولاده او زيادة الوزن وتعالج الندبات البسيطه او السطحيه وتخفف من اثار الحبوب وتقلل المسامات الواسعه وتعالج تجاعيد البشره وحتي تخفيف السلوليت الي هو ترهل البشره بسبب زيادة الوزن وتستخدم لتحفيز نمو الشعر يعني فوائد هلبا وفعاله لو استخدمت بشكل صحيح؛؛
  • مقاسات الديرما رولر يتوقف اختيار مقاس الديرمارولر ع اسباب منها:
    ـ  لو بتستعمليها اول مره وبروحك ف البيت وبتراعي طبيعة بشرتك لو حساسه.
    ـ او لا وقوة تحملك اكيد والمنطقه الي بتستعمليها الديرمارولر واكيد مرض الجلدي الي عندك بتحدديه شني
    ـ بناءاً ع الاسباب هادي تختاري مقاس الديرمارولر امتاعك؛؛
  • مقاسات الديرمارولر تبداآ من ….الي؛؛
    -0.25ملي م
    -0.5ملي م
    -0.75ملي م
    -1ملي م
    -1.5ملي م
    -2ملي م

    -3ملي م
  • انا نبي نسهل عليكم المعلومه انه تقدرو تستخدمو كل المقاسات الصغيره بروحكم وك استخدام شخصي يعني من 0.25 الي 1ملي متر وخاصةً 1 ملي متر حجم يناسب جميع انواع مشاكل البشره والاكثر استخدام؛؛
  • بس مقاس من 1.5ملي الي 3 ملي متر ما تاخدوهاش واديروها بروحكم لا ضروري يكون تحت اشراف دكتور افضلك باش ماتسببي ضرر لروحك؛؛
  • طريقة استخدامها اول شي تعقمي الديرمارولر هي تاخدي اي كحول طبي ترشي بيه الاداة وتغسليها بالميه وتخليها تجف كويس بعدين تغسلي ايديك كويس كويس وتعقميهم وتغسلي وجهك كويس كويس تجففيه كويس ولو من النوعيه الي تتحملي وخز الإبره استغني ع كريم البنج الموضعي لو ما تتحمليش ادهني وجهك او المنطقه الي بديري فيها ديرمارولر بالبنج عندكم بنج اسمه آملا او بريليا متوفر ف الصيدليات بعدين تبدي ف الجلسه وهي تقسمي وجهك اما ع4اجزاء او 6اجزاء ع راحتكم مثلاً تبدي بالخد اليمين تمشي بعلامة+ او × بشويه بشويه كآنك تمسحي ف وجهك بقطنه والمكان الي تمشي بيه بالديرمارولر ما ترجعي عليه وقتي يعني درتي خدك اليمين خودي جزء صغير فيه مش الخد كله وديري بالجيهه بعد ما تمري ع الخد كله ارجعي ع نفس الاماكن وكل خد او كل جزء ف وجهك تمري عليه بالديرمارولر10 مرات وطبعاً بعد الاستخدام اكيد بتعقموها بالكحول وبتغسلوها تحت الميه؛؛
  • الخطوات الي تكون بعد استخدام الديرمارولر تغسلي وجهك بالميه المصقعه وترشي وجهك بمية ورد الافضل تكون مصقعه و ما تحطيش ايديك ع وجهك نهائياً يعني ما تبلبزيش ف حالة بتحطي كريم مرطب اغسلي ايديك وعقميهم وبعدها حطي كريم الترطيب ولما بترقدي حطي فوطه بيضاء نظيفه ع مخدتك وارقدي عليها ولما تستخدمي الديرما ما تتعرضيش للشمش ولا للضئ حتي ضي التلفون او لاب توب لا وتاني يوم اغسلي بغسولك المعتاد حطي واقي شمس بس ما تحطيش مكياج نهائي؛؛
  • لو عندك تجاعيد ننصحك تستخدمي بعد جلسة الديرما تحطي كريم مرطب للتجاعيد من فيشي ممتاز ويعطي نتيجه لو للتصبغات الافضل تستشيري دكتور ع كريم للتصبغات باش تقدري تستخدميها بعد جلسة الديرما؛؛
  • تحذيرات استخدام الديرمارولر هي لو اديري ف جلسات ليزر او تقشير كيميائي او تستخدمي ف كريمات تفتيح او وجهك ف حب او التهاب مازال ماجف ماتستخدميش الديرما لان بتآزم الوضع يعني لو ديري ف جلسات ليزر اقل شي تبي شهر باش تقدري تستعملي الديرما؛؛
  • طبعا جلسة الديرمارولر تسخدم مره ف الاسبوع او مره كل 10 ايام ع حسب كل حالة وشني تستحق من جلسات.
  • وتستعمل للشعر بنفس الطريقه الي شرحتها ع البشره؛؛
وبس برنسيساتي اتمني الافاده للجميع دومتم متآلقات اااوهبكم اااموااااه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Integration by Acurax Social Media Branding Company
error: Content is protected !!