ترطيب البشره الجافه والحساسه 

• قبل ما نبدآ ف البوست بنقوللكم انا بشرتي مهلوووكه بالجفاف والتحسس لان ناخد ف علاج مسببلي جفاف رهيب وفوق هذا كله بشرتي مفرفطه مرات تولي حمراء ويصيرلي زي البقع الحمر وجفاف بصراحه خف قلت غبارتي لو كانت اكزيميا بس الحمدالله سعفت نفسي ودرت روتين مشيت بيه توا ميه ميه راهو ما يغركم انكم اتشوفو ف صوري تقولولي بشرتك حلوه وصافيه صدقوني انا مرات نتعب ف الاهتمام بيها باش تكون النتيجه الي اتشوفو فيها؛؛
• اول شي الميه هي الاساس نشربو كمية الميه الي تناسب وزنا والي تستحقها بشرتنا لان ضروري ترطيب من داخل قبل الخارج ونكثرو من اكل الفواكه والخضروات نشربو العصير الطبيعي عليكم وع البرتقال ممتاز للبشره وللجسم لان فيتامين سي يفتح البشره ويعطيها نظاره واشراقه حلوه؛؛
• تاني شي ناخدو غسول يناسب نوع بشرتنا انا اليوم بنتكلم ع غسول ااانقذني من الجفاف الي انا فيه هو ماركة سيفر او آس ڤي آر ماركة فرنسيه وطبيه ممتازه ف منتجاتها ع المهم انا خديت غسول منها للبشره الجافه والحساسه تلقوا الكتابه عليه بالوردي من برا زي صورة البوست وهو من داخله حليب بدون كحول او ريحه وظيفته يرطب ويهدي إحمرار البشره الي سببه الجفاف بجد ننصح الي بشرتها جافه وحساسه بيه هلبا تقيمي ليه 9.5 من 10 روووعه ع الاخر ويعتبر بالنسبه ليا افضل غسول استخدمته للبشره الجافه والحساسه سعره ف حدود 25 دينار ولكن حجمه كبير ويقعد معاك لان انتي بتاخدي منه ع طروف صوابعك وبتغسلي بيه وجهك؛؛
• ثالث شي انكم تاخدو حاجه تهدي التحسس والاحمرار الي صارلها نفس حالتي او تاخد ف علاج يجفف البشره اكيد ح تحس بالمعاناة الي حسيتها بنحكليكم ع بخاخ مرطب ومهدئ لتحسس البشره من ماركة يورياج بصراحه انا استخدمت اغلب البخاخات المرطبه للبشره سواء كانت من ماركة آفين لاروشيه بوسي وغيره بس بعد ماجربت ماركة يورياج خدا هو الافضليه والتوب بصدق نتيجته رهيبه يهدئ البشره المتفرفطه والمتهيجه ويخفف من زيوتها تقيمي ليه 9.5 من 10 وسعره جداً رمزي ب9 دينار وحتي هو حجمه كبير ويقعد معاك فتره؛؛

1. كيف تستخدموه هو ليه عدة استخدامات مثلاً بعد ما ديري الحلوه تقدري تبخي بيه وجهك وجسمك باش يهدي الاحمرار والتهيج او لو الجو سخون و وجهك فرفط تقدري تبخي بيه او بعد ما ديري ماسك لوجهك وتغسليه تقدري تبخي بالبخاخ لتسكير المسام ،،
2. اما استخدامي ليه انا بنقوللكم الفتره هادي نغسل ف وجهي مره واحده ف اليوم لان بجد تعبت من الجفاف والتحسس والاحمرار مانقدرش نغسلها مرتين بالميه والغسول ف كيف اندير مثلاً اول مانوض الصبح نغسل وجهي عادي نحط كريم مرطب او لو نبي ندير مكياج بعد ما نروح للبيت نمسح وجهي بمزيل مكياج بعدين ناخد البخاخ ونبخ بيه وجهي كويس كويس ونمسح بقطنه وبعده نحط كريم المرطب ونرقد يعني انا نستخدم ف البخاخ بدل الميه لغسل وجهي والحمدالله كانت نتيجه حلوه ع الاخر؛؛

• اخر شي هو تختارو كريم مرطب المناسب لبشرتكم زي ما انتم عارفين وصدعتلكم بيها روسكم هي كريم بيبانتين اكيد الحب كله وكريم الترطيب المفضل عندي مفعوله رهيب وطبي وآمن ع البشره وسعره مناسب ومتوفر ف كل الصيدليات يعني موصفاته كلها حلوه تقيمي ليه 12 من 10 ويستخدم للصغار وللكبار رجال ونساء وانا فيما سبق شرحت ع انواعه مفصل ف القروب؛؛

1. ولكن انا نستخدم ف بيبانتين نرطب ف وجهي كله وبعدين ناخد كريم الفوسيدين الي هو (الاسد) خطه احمر واسود وعليه حرف H يعني فيه اخف نوع من الكرتيزون ويستخدم لانواع البشره الرقيقه والهشه وفي نفس الوقت مضاد حيوي نستخدم فيه جيهة جوانب الانف والشفايف علاش لان اكثر منطقه عندي فيها قشور ومن القشور سببتلي تحسس واحمرار ف ضروري نرطب بمضاد لان لو خليتها بعد القشور ح يصيرلي تصبغات واسوداد ولكن مع فوسيدين مشت الامور والحمدالله عالجتلي الاحمرار والقشور والتحسس بس ما ينفعش تستخدموها اكثر من شهر لان فيها كرتيزون انا نستخدم فيها عند الحاجه فقط؛؛

• واكيد ضروري يكون عندك مرطب شفايف انا نستخدم ف مرطب شفايف ومعالج للقشور والجفاف نفس الصوره ميه ميه ولو ما لقيتوا شكله في معالج تشقاقات الشفايف من ماركة بايوديرما ممتاز؛؛
• ملاحظه اخيره انا اكتشفتها مؤخراً وحبيت انفيدكم بيها بنقوللكم لما تبو تشرو علاج او مواد تنظيف للجسم او كريمات ترطيب اشروها من سوق الادويه ف الدريبي ارخص من الصيدليات بهلبا لانهم يبيعو بسعر الجمله وعادي لو تبي تاخدذ بالقطعه يبيعولك غير انه سوق كبير من الصيدليات واي حاجه تبيها تلقيها متوفره فيه بصراحه انا بالصدفه شريت منه انصدمت ف الاسعار ناخد ف علاج من الصيدليات برا سعره 48 دينار لما مشيت شريته من سوق الادويه القيته ب30 انصدمت فرق كبير مش شوي فلهذا ننصحكم تاخدو ادويتكم من غادي؛؛

وبس برنسيساتي اتمني الافاده للجميع دومتم متآلقات ااوهبكم امووواه