[ تجميلية ]
مسائكم معطر بذكر الرحمن بنوتاتي ومداماتي الطرفونات،،
حبيبات قلبي بوست سريع ع عدة استخدامات لبودرة الاطفال وبنذكر تجربتي الشخصيه مع اخر استخدام جربته لبودرة الاطفال،،
- اول شي انا نحب نجرب ونوعاً ما مجازفه لان لو ماجربت كدا حاجه وكدا منتج مش ح تكون عندي الخبره الكافيه لتقيم اي منتج تجميلي،،
- ع المهم اخر مره استخدمت فيها بودرة الاطفال ك ثبيت الكونسيلر=خافي العيوب يعني خديت شويه من بودرة الاطفال حطيتها ف علبه فاضيه وبعد ما درت خافي العيوب تحت عيوني قلت ولله لما نجرب مش ح نخسر شي وبعدها خديت بودرة الاطفال وحطيت منها كميه تحت عيوني نفس لقطة الصوره بالزبط استنيت 5دقايق ونفضت الزياده بالفرشه ولله يا بنات نفس نتيجه امتاع البودره الشفافه للوجه بالزبط وانحس فيها افضل بجد انا انصدمت من النتيجه لا خطط معاي كونسيلر ولا زيت منطقة تي زون الي هي الجبهه والانف والذقن بجد تقول كذب غير انها سعرها رخيص ف متناول الجميع وبديل مممممممتاز للبودره الشفافه امتاع لان بصراحه كل الماركات الي فيها بودرة شفافه سعرها غالي نوعاً ما وع فكره ما تخافوش من لونها بيضاء لان ح تكون شفافه بدون لون بس لثبيت الاساس والكونسيلر وخاصةً الي بشرتها دهنيه تمتص كل زيوت الي بتفرزها البشره،،
- تاني استخدام مثلاً لو خديتي بودرة وطلعتلك لونها غامق تقدري تخلطي شويه من بودرة الاطفال ح يفتح اللون معاك؛؛
- ثالث استخدام بودرة الاطفال تقدري تستعمليها زي الشامبو الجاف للشعر يعني الي شعرتها دهنيه وتزيت بسرعه زي حالاتي ادوش اليوم تاني يوم الشعر يولي مزيت تقول باكستانيه تقدري ترشي من بودرة الاطفال ع جذور للشعر استني 5دقايق وبعدها امشطي شعرك بالفرشه ح تشوفي الفرق وكآنك غسلتي شعرك توا لانها ح تمتص كل زيوت فروة الشعر الزايده؛؛
- رابع استخدام الناس الي تستعمل ف الحلوه لازالة شعر الجسم يقدرو يرشو بيها جسمهم قبل ازالة الشعر تساعدكم هلبا لان ف ناس تعرق او جسمها يفرز ف زيوت ف البودره تمتص الزيوت هادي وتخليك تحولي الشعر بسهوله؛؛
- ملاحظه انا استخدمت بودرة جونسون بس لو متوفره عندكم بودرة اطفال من ماركة تانيه عادي تقدرو تستخدموها؛؛
وبس فلذات تشبدي اتمني الافاده للجميع اوووهبكم اموووووااااه
