‏حل لتحسس وجهك بعد نزع الشعر

[ مرهم فوسيدين/الاسد ]

مساؤ فل بنوتاتي ومداماتي الطرفونات،،
حبيبات قلبي بوست سريع ومهم جدا جدا جدا للكل بدون استثناء لان هي مشكله عويصه نعانو منها كلنا واكثر اسئله تجيني عليها،،

128

  • هي مشكلة الي نعانو منها ك نساء تحسس بشرتنا سواء الجسم او الوجه بعد ما تحولي الشعر هلبا يقولولي ياجود ع قد ما جربنا من المراهم المتعارف عليها لتحسس زي بيبانتين ميبو او مرهم الاسد الي خطه برتقالي وحتي شربو الحراره مافيش حل وجهنا يفرفط ويتحسس وحبوب وحالته حاله محلحله شني انديرو..؟؟
  • بنقوللكم حبيباتي ع حل هو تاخدو مرهم يكون ف مركبه كرتيزون ضروري لان الكرتيزون الحل الوحيد والقاطع والنهائي لتهدئة للبشره بعد ماتحولي الشعر خاصةً للعرايس او الي عندها حفله تبي شي سريع لوجهها بعد ما تحول الشعر فلهذا ح ننصحكم بالحل واكيد خديته من رآئي دكتوره جلديه متخصصه لان المعلومه الطبيه ناخدها من صحابها مانغامرش ب بشرة الناس؛؛
  • حلكم هو مرهم فوسيدين الي نعرفو ب(الاسد) نفس صورة البوست خطه احمر واسود وعليه حرف (H) يعني الحرف هذا انه المرهم فيه اخف انواع الكرتيزون ومرخص استخدامه للبشره الرقيقه زي بشرة الاطفال وطبعاً المرهم هذا مضاد حيوي يخفف الالتهابات والجروح اكيد يعني مرهم علاجي وليس تجميلي؛؛
  • طريقة استعماله ارجوكم افهموا الكلام كويس لان مش ح نكون مسؤوله ع سوء الاستخدام هي لما تحولي شعر وجهك وعارفتيه يتحسس طبعاً تغسلي وجهك بالميه المصقعه والافضل تمسحي بمية ورد او مكعب ثلج مية ورد تمرريه ع وجهك باش يهدي البشره ويصكر المسام وبعدها تاخدي المرهم هذا واكيد بيكون ف لليل مش ح تطلعي بيه ف الشمس لان ماينفعش يعني لما بترقدي تحطي من المرهم هذا ع وجهك كله وارقدي والصبح امسحيه بقطنه واغسلي وجهك عادي ف حالة وجهك تحسن معناها تمام معاش تدهني تاني من المرهم ولكن ف حالة تحسي وجهك مازال مفرفط ادهني مره تانيه ف لليل يعني مسموح تدهني من المرهم مره ل3مرات متتاليه فقط مش اكثر من هكي وبإذن الله وجهك ح تمشي اموره تمام التمام؛؛
  • ف ناس يتحسس جسمها بعد ازالة الشعر مافيش مشكله ينفع تدهني من المرهم هذا لجسمك من مره ل3مرات فقط مش اكثر باش يهدي التحسس؛؛
  • بتقولولي انسب طريقة لنزع الشعر بنقوللكم الفتله بدون شك لان الشمعه والسير يسبب تصبغات وكلف وتستزرق البشره بعد عدة استعمال ليه والحلوه تسبب ترهل للبشره وهذا كلام من دكاترة تجميل بشره مش من راسي وشوفت ناس مقربه مني وجههها ادمر تدمير من الشمعه وتوا يصرفو ع العلاجات بمبالغ وقدرها ولكن اكيد كل واحده ليها حرية الاختيار؛؛
  • شي اخير بنبه عليه ممنوع ممنوع ممنوع و1000 مره انقولها لما تحولي شعر وجهك اديري بعده مكياج هادي كارثه ايها القوم وللعرايس بالذات شوفت كدا لقطه صارت قدامي انه العروسه تحول ف شعر وجهها يوم حفلتها بنقوللها كيف تفكري بآي منطق ردو بالكم الا في حالة تبو ادمرو بشرتكم ب ايدكم واتقولو اهلاً وسهلاً بالتصبغات والكلف يعني يوم تحولي شعر وجهك خودي راحه واستجمام ف الحوش وديري كيكه وكسدي عليها مش ح يصيرلك شي كان اليوم هذاكا ماطلعتيش فيه الا الوجه ماتلعبو بيه ارجوكم؛؛
  • ف حالة بشرتك كانت حساسه جداً حولي الشعر قبل مناسبتك اقل شي ب اسبوع اما ف حالة كانت بشرتك عاديه حولي الشعر قبل مناسبتك ب3ايام؛؛

وبس فلذات تشبدي اتمني الافاده للجميع دومتم متآلقات اااااوهبكم ااامواااااه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Wordpress Development Company
error: Content is protected !!