‏طريقة برافين في البيت

[ علاج للقدمين واليدين من التشقق ]

مساؤ فل بنوتاتي ومداماتي الطرفونات،،
حبيبات قلبي البوست هذا مفيد للكل خاصةً العضوات الي يسئلوا فيا ع حل اسوداد اليدين وتشققات القدمين بإذن الله ح نفيدكم بالبوست هذا؛؛

125

  • قبل كل شي نبي نفهمكم معني (البرافين) هو شمع مخصص للجسم يعالج ويلم كل تشققات الرجلين والايدين ويحول الطبقه الميته بالكامل يستخدم بجهاز خاص بيه؛؛
  • ولكن اليوم انا درت شبيهه بطريقة البرافين ولكن ف حوشي مرتاحه ومن غير دوشه وصرف فلوس وبنفس النتيجه وبآسهل الطرق؛؛
  • قبل ف بوستات قلت عليها الطريقه هادي واكيد انتم تعرفوها ولكن قلت خلي انطبقها وانزلها ليكم باش يتحول البخل الي فيكم وتنشطوا معاي غير انه نتيجته رهيبه ف ترطيب وتبيض الرجلين والايدين وينفع اديره للمرافق والركب وكعب القدم من تحت خاصةً الي عندها اسوداد ف مفاصل الصوابع بجد الماسك هذا ح يفيدكم اااكيد؛؛
  • طبعاً هو في شمع اسمه البرافين ينباع ف محلات مواد الزينه ولكن انا للامانه استخدمت بقايا الشمع الابيض العادي ونفس النتيجه ولكن الي تبي تشري شمع برافين جاهز براحتها اكيد؛؛
  • طريقة التحضير تاخدو الشمعه تقصوها زي ما انا درت ف صورت البوست+زيت زيتون+كاشيك صغير فازلين؛؛
  • طريقة التجهيز هو تاخدو الشمع تحطوها ف طنجره صغيره مع زيت الزيتون ويكون زيت الزيتون مقداره اكثر من الشمع وكاشيك واحد صغير فازلين تحطوها ع النار ح ذوب معاكم وتولي زي الزيت نفس صورة البوست؛؛
  • طريقة الاستخدام سهله وبسيطه ولكن نبي نقسمها لجزئين:
    ـ الجزء الاول هو تستخدمو الماسك قبل الدوش بنص ساعه وهي تاخدي الشمعه وهي سايحه زي الزيت وتمسيها بطرف صبعك لو حرارة الشمعه يتقبلها جسمك معناها اوك تقدري تدهني ايديك ورجليك وتلفيهم بكيسة لحم تقعدي نص ساعه وبعدها تمسحيها بشوية زيت ح تنزل معاك طول وتغسلي عادي وتقدري تستخدميها 3مرات ف الاسبوع مافيش مشاكل؛؛
    ـ الجزء التاني هو تستخدمو الماسك زي كريمة الترطيب بعد ما يجمد الشمع ح يولي معاك كآنه كريم تدهني بيه رجليك وايدك زي ما انا درت ف الصوره التانيه وتلفي رجليك وايدك بكيسة لحم باش ما تتلبزي وترقدي عادي وفي الصبح تمسحيها بشوية زيت وتغسلي بعدها بمية دافيه عادي وتقدري تستخدميها كل يوم ك ترطيب ف لليل قبل النوم خاصةً الناس الي عندها تشقاقات ف رجليها من الوقوف والميه ننصحكم بيها ونتيجه رهيبه خلال اسبوع ح تشوفو نتيجه حلوووه ع الاخر؛؛
  • وشكرآ لست الحبايت صورتلي ايديا اشكروها معاي تستاهل الآم وربي يحفظلكم آمهاتكم ااامين؛؛

وبس فلذات تشبدي اتمني الافاده للجميع دومتم متآلقات اوووهبكم ااامواه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!