‏ترتيب المكياج

مساؤ ورد بنوتاتي ومداماتي المزموزات؛؛
حبيبات قلبي بوست خفيف ع كيف ترتبي مكياجك او اكسسوراتك بشكل احلا؛؛

123

  • نبي نعطيكم معلومه عليا انا انسانه تقدرو تقولوا مهووسه بالنظام مانعرفش نرقد وداري مفركسه مستحيل لان بصراحه قلة النظام يخلي حتي نفسيتك مش مرتاحه ولا تقدري تعرفي تلبسي ولا تمكيجي؛؛
  • طبعاً اكيد كل واحده وذوقها ف ترتيب مكياجها وملابسها بس انا بنعطيكم شوية افكار انا اندير فيها لترتيب داري ااكيد ح تستفيدو منها،،
  • بالنسبه للمكياج ما نحبش نطلعه كله فوق الجكماجه لان مش ح تسده وبيصكر ع المرايا بس جزء نخليه ف بوكسات ونحطه داخل الادراج وجزء الي نستعمل منه نرتب فيه ف منظمات مكياج زي الي ف الصوره باش يكون المكياج ملموم وما نقعدش حايسه لما بنمكيج؛؛
  • ولكن عادي ف حالة مش متوفره عندكم منظمات مكياج انقوللكم شني تستعملوا وحتي انا نستعمل فيهم لما تشرو كندره جديده خلو بوكس امتاعها وتقدرو تنظموا فيه مكياجكم و تقدرو تنظموا فيه الملابس الداخليه وتحطيه داخل الادرج افضلك بهلبا ويخليلك مساحه اكبر ف الادراج امتاعك وتقدري تخزني كمية كبيره وفي نفس الوقت شكلهم منظم ومرتب وع فكره حتي لما تجيك هديه في بوكس كبير تقدري تستغليه وتحطي فيه مكياج وحتي امتاع فناجيل القهوه مرات يجو ف بوكس كبير تقدرو تخزنو فيه يعني تقدرو تخترعو بحاجات بسيطه وغير مكلفه حاجه منظمه ومرتبه؛؛
  • بنقوللكم ع تطبيق الحوايج ف الدولاب اكيد كلنا نعانو من الحوايج الزايده وتبدآ منكته من الدولاب افضل طريقه واسهلها هي انك تقعد تلفي ف حوايجك بطريقة الرول يعني كآنك تلفي ف البوريك نفس الصوره الطريقه هادي يرايت تجربوها لانكم ح تحسو بفرق هلباااا وتشوفو كيف يتوسع دولابكم والادراج انا الطريقه هادي مريحتني حتي لما نسافر ندير فيها لما بنطبق حوايجي ف الشطنه تعطي مساحه كبيره؛؛
  • اما بالنسبه للاكسسوارات سواء للشعر او لليدين وحتي توكات الشعر خاصةً الي عندها بنوتات وديما حايسات توكتها ح تستفيد بيهاالطريقه هي بنقوللكم عليها بس ماتضحكوش عليا ولكن مفيده بجديات،،
    ـ عرفتو اكياس التفريز الي تقدري تخزني فيها خضره وتحطيها ف الفريز فيها لقطه من فوق تقول تك تتصكر معاك مضبوظه ههههه نعرف غريبه بس انا نستخدم فيهم هلبا خاصةً لما نسافر نحط ف كل كيسه شامبوات او زيت للشعر او كريمة يعني اي حاجه قابله للكسر ولا نعرفها تنفتح تبهدلي الدنيا نحطها ف الكيسه ونصكرها تقول تك وتقدرو تحطو فيها اكسسوراتكم توكاتكم الي ديما مورزعات نعرفكم انا اكيد زي حالاتي بس جربوها ح تستفيدو من الفكره؛؛
  • ملاحظه الي تبي تعرف من وين منظمات المكياج بنقوللها شريتهم من سوق الحايس ف محل مكياج فوق يبيع فيهم؛؛
  • شكراً لعضوه معاي ع تصميم صورة الخلفيه نوارة الفل؛؛.

وبس طرفوناتي اتمني الافاده للجميع اووهبكم اموواه…

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Integration by Acurax Social Media Branding Company
error: Content is protected !!