[ فوائد فيتامين سي للبشره ]
مسائكم ورد بنوتاتي ومداماتي الطرفونات،،
حبيبات قلبي بوست خفيف ع فوائد مرحي قشور البرتقال؛؛
- قبل مانبدآ ف البوست بنقوللكم ع فوائد فيتامين سي الي موجود ف البرتقال والليمون هي لاتعد ولا تحصي لان فيتامين سي معروف ف تفتيح البشره ويعطيها نضاره واشراقه رهيبه ولاحظو انه الدكتور لما يوصفلك كريمة تفتيح او علاج البقع اهم مركب فيها يكون فيتامين سي لان مفعوله رهيب وسحري مع الاستمرار عليه وتقدري تستعمليه لكل اماكن الجسم او الوجه مافيش مشكله،،
- طبعاً في فيتامين الفوار جاهز ينباع ف الصيدليات وفي كدا ماركة فيها كريمات بالفيتامين سي من ضمنها ماركة بودي شوب وغيرها من الماركات؛؛
- بس انا اليوم درتلكم طريقه سهله جداً وغير مكلفه يعني السبل الزايده مانبيهاش بما انه احنا ف فصل الشتاء اكيد كل بيت يشري ف برتقال ومني الي ما يحباش البرتقال ليه فوائد ف اكله يقوي جهاز المناعه ويحمي من نزلات البرد فلهذا احنا ح نستفيدو من اكله واستعماله للبشره،،
- بعد ما تاكلوا البرتقاله تخلو قشورها يعني اي حد ف حوشك ياكل ف لليم وصيه ع القشور ما يلوحهم وبعدها تاخدي القشور تطرحيهم ف صفره وما تحطيهم ع بعض باش ما يقطنش ولما يجفو ويبسو تاخديهم وترحيهم ف الماكينه ح يولو معاك زي البودره غربليهم باش تضمني تحولي كل الشوائب وتبدآ البودره ناعمه ما تجرح وجهك؛؛
- طريقة الاستعمال في كدا طريقه وطريقه بس الناس الي عندها اثر او نمش او بقع او تصبغات جلديه بصفه عامه ياخدو شويه من بودرة البرتقال ويخلطوها مع اي كريم مرطب موجود عندكم يفضل يكون طبي زي بيبانتين كريم بعد ماتخلطو شويه من بودرة البرتقال والكريم حطو منها ع اماكن الاثر او التصبغات فقط يعني لو عندك حبه وامدايرتلك اثر حطو منها ع الاثر فقط مش الوجه كله وطبعاً يكون ف لليل قبل النوم ممنوع استخدامه ف النهار؛؛
- لو تبي اديري قناع ب بودرة البرتقال تقدري تخلطيه مع كدا حاجه مثلا للبشره الجافه تاخدي نص كاشيك صغير من بودرة البرتقال+كاشيك صغير حليب بودره اي نوع+كاشيك صغير زبادي طبيعي تخلطيهم مع بعض وتحطيهم ع وجهك مدة 10 دقايق وبعدها تغسلي يستخدم مره ف الاسبوع؛؛
- البشره الدهنيه والمختلطه تقدرو تاخدو كاشيك صغير بودرة برتقال+مية الورد لما تحطوه ع وجهكم ركزو ع الاماكن الدهنيه والي فيها تصبغات وحبوب يستخدم مرتين ف الاسبوع؛؛
- للجسم تقدري تاخدي من بودرة البرتقال كاشيك كبير او حسب احتياجك +شامبو الجسم امتاعك تخلطيه مع بعض وتستخدميه ك مقشر طبيعي مره ف الاسبوع؛؛
- الناس الي تشكي من ركبها او مرافقها او تحت الابط للون الاسود فيتامين سي ممتاز ليهم لان يفتح الاماكن الغامقه مثلاً تاخدي شويه من بودرة البرتقال وتخلطيها مع شويه فازلين وتدهني يومياً قبل النوم مرافقك والركب بس تحت الابط تقدري تستخدميه ك ماسك قبل الدوش بنص ساعه ما ترقديش بيه وع فكره يقلل من افرازات العرق هلبا؛؛
- ولو تبو تاخدو من حبوب الفوار فيتامين سي ينباع ف الصيدليات خودو حبه يومياً لمدة اسبوع فقط لاغير بس خليكم ع الطبيعي افضل الي هو البرتقال او البطاطه والطماطم والفلفل هادو الخضروات كلهم فيهم فيتامين سي؛؛
وبس فلذات تشبدي اتمني الافاده للجميع دومتم متآلقات اووهبكم امووواه
