[ نحت معالم الوجه ]
مسائكم فل و ورد و ياسمين بنوتاتي ومداماتي الطرفونات،،
حبيبات قلبي بوست خفيف ع تكنيك الكونتور والهايلايتر بشكل مبسط اكثر؛؛
- انا شرحت فيما سبق ع الكونتور والهايلايتر بشكل مفصل وموجود ف المدونه بس ح نعاود الشرح بشكل مبسط وسلسل اكثر؛؛
- خلي انقوللكم معني تكنيك الكونتور هو نحت معالم الوجه بشكل اااوضح واخفاء او تمويه عيوب الموجوده ف الوجه يعني لو عندكم شي ف وجهكم تبو تنحتوه او تصغرو معالم وجهكم اذاً مناسب ليكم الكونتور وبصراحه انا شخصياً ما حبيته ابداً تكنيك الكونتور،،
- الهايلايت او الهايلايتر عكس الكونتور تماماً يعني هو ابراز وتسليط الضوء ع المعالم الي تبي تبرزيها ف وجهك ويعطيها اضاءه او شكل صحي اكثر وبصراحه انا من عشاق الهايلايت جداً جداً لان انحب الشكل الي يكون فرش اكثر؛؛
- به الكونتور طريقة استخدامه حتي عند الارتست الكبار كل واحده وليها طريقه معينه وطبعاً اتبعو الطرق الي تريحكم ف الاستخدام؛؛
- بس قبل كل شي خلوني نتفق معاكم انه الكونتور مايجيش فوقه كريم الاساس بتاتاً هادي قاعده ثابته خلوها ف بالكم؛؛
- طريقة الاستخدام الاوله للكونتور هي اما انك تستخدمي الكونتور والهايلايت فقط وتكتفي بيه بدون مايكون تحته كريم اساس لان بطبيعة الكونتور الكريمي يجي ثقيل ف بعض الارتست يكتفوا فقط بالكونتور والهايلايت بدون مايكون تحته شي وانا طبعاً نتكلم ع الكونتور الي يكون كريمي مش الباودر؛؛
- طريقة الاستخدام التانيه للكونتور هي انك تبدي تحطي كريمة الاساس امتاعك او البي بي كريم تدمجيها كويس وبعدها تبدي ترسمي خطوط للمعالم الي تبي تصغريها ف وجهك بالكونتور وتبرزي الاماكن الي تبي تعطيها اضاءه بالهايلايت وتدمجيها كلها مع بعض وبعدها اثبتي بالباودر امتاعك؛؛
- طريقة الثالثه هو انك تستخدمي الكونتور يكون باودر وهذا اسهل ف الاستخدام واخف للعين خاصةً للناس الي مش متمكنه ف المكياج الافضل ليها تستخدم الكونتور الباودر سهل الدمج وطبعاً تحطوه اكيد بعد ما ديرو كريمة الاساس امتاعكم يعني ف الحاله هادي الكونتور الباودر يكون بعد الاساس وقبل احمر الخدود؛؛
- طريقة الدمج هو انك لما تستخدمي الكونتور الكريمي والهايلايت الكريمي او الكونسيلر =خافي العيوب اول شي تدمجي الكونتور الي هو اللون الغامق البني وبعدها تدمجي الهايلايت امتاعك الي هو اللون الفاتح الي يجي ع البيج او بانانا؛؛
- درجة الالوان الكونتور المناسبه لكل لون بشره الكونتور ديما تاخدي لونه اغمق من بشرتك ب3/5درجات والهايلايتر افتح من بشرتك ب3/5 درجات باش لما تدمجي مع بعض يعطوك فنش وشكل حلو؛؛
- ودرجة لون الكونتور ديما خودها تكون ع رمادي يعني كآنه لون ظلك الحقيقي ما ننصحكم ابداً تاخدو درجات الكونتور ع الاورنج او البرتقالي لان ح يقلب معاك بكارثه حقيقه وح تباني كآنك واخده بوكس ع خدك؛؛
- اماكن تحديد الكونتور طبعاً كل واحده وع حسب تفصيلة وجهها انا حطيتكم صورة البوست اماكن التظليل باالكونتور واماكن حطت الاضاءه ع الوجه؛؛
- وللوجه كله تقدري اديري كونتور بس تبي حرفه نوعاً ما لو تبي تغيري معالم وجهك تقدري تكبري عيونك وتكبري شفايفك تصغري انفك تبرزي خدود او تنحتي الذقن كله بالكونتور ويرايت تتفرجو ع اليوتيوب اكثر ع حطت الكونتور واكيد ح تتعلموها مع الممارسه ع انفسكم؛؛
- اما اماكن ابراز معالم الوجه ب الاضاءه هي فوق عظمة الخد ارنبت الانف وجسر الانف وفوق الشفه العلويه وتحت عظمة الحاجب وفوق الحاجب واكيد ف دمعة العين هادي كلها اماكن الي تعكس الضوء ف الوجه؛؛
- افضل باودر لثبيث الكونتور هو الباودر الشفافه يعني بدون لون ااثبت الاساس وتطفي للمعه امتاع البشره بس بدون ما تغير لا لون الاساس ولا الكونتور امتاعك بتاتاً؛؛
- بتقوليلي احسن ماركات الكونتور بنقوللكم مافيش منه الكلام هذا لان كل ماركه تتميز بحاجه وع فكره تقدرو تكتفو بلون من اظلالكم يكون درجة البني الرمادي بس بشرط يكون مطفي بدون لمعه نهائي ونفس الكلام ع الهايلايتر؛؛
- بس ح نذكر من افضل الماركات ف الكونتور:
هي ماك- ميكب فورايفر- انستازيا- نيكس- شنايل- فلورمار- انقلوت-كريولاين- ميبلين- برجوا- لوريال وكدا ماركه ممتازه؛؛
وبس فلذات تشبدي اتمني الافاده للجميع دومتم بود اوووهبكم امووواااه..
