صحه غداكم بنوتاتي ومداماتي الطرفونات،،
حبيبات قلبي بوست سريع ع فوائد البرتقال وفيتامين سي للبشره وللشعر وللجسم ذكرتني بيه عضوه معاي وحبيت انفيدكم بالمعلومه هادي لانها مهمه جداً ليكم؛؛
- البوست ح يكون مفيد للناس الي تبي نظاره وتفتيح للبشره ومعالجة الحبوب والبقع الداكنه لان ااااااااااهم فيتامين ف البرتقال هو فيتامين سي وطبعاً فيتامين سي معروف ف تفتيح ونظارة البشره يعني حتي لما تلقو كريم تركيبته فيها فيتامين سي خودوه ممتاز ليكم لان يعالج التصبغات والتجاعيد ويعطي نظاره رهيبه للبشره؛؛
- انجو لموضوعنا وهو البرتقال بصراحه ااانا عشقي ونحب ناكله بكثره عادي ماعنديش مشكله ونحب ندير عصير فرش ممممتاز للجسم وللبشره وللشعر فوائده لا تعد ولا تحصي لان
البرتقال يحتوي عناصر غذائية ضرورية زي فيتامين A، B1، Cو مصدر جيد من الأحماض الأمينية، وبيتا كاروتين وحمض الفوليك، البكتين والبوتاسيوم والكالسيوم والحديد واليود والفوسفور والمنغنيز والصوديوم والكلور والزنك وهادي كلها خصائص مضادة للأكسدة والمضادة للالتهابات بجميع انواعها؛؛ - يعني كولو من البرتقال واستفيدو بيه ف فصل الشتاء ع قد ما تقدرو وع فكره لليم ف الشتاء يدفي ع الاخر حتي العصير امتاعه خاصة تشربوه منه ع الريق يعطي طاقه حراريه ونشاط رهيب هذا علاش ينصحوا بعصير البرتقال للناس الي تتمرن والرياضين؛؛
- فوائد البرتقال العلاجيه للجسم يزيد من مناعة الجسم ويحافظ ع صحة خلايا والانسجة ويحمي القلب من الاصابه بالجلطات وينقي الاوعيه الدمويه والشرايين من الكولسترول وينقي الجسم من السموم يعالج امراض الربو ويخفف من اعراض البرد والانفلونزا؛؛
- فوائد البرتقال العلاجيه للشعر مفيد جدا يعالج القشره وتساقط الشعر يعني تاخدو من قشور البرتقال تنقعوهم ف ميه وبعدها خودو الميه امتاع القشور وحطوها ف بخاخ ويومياً بخو بيها فروة شعركم الي عندها قشره وتساقط بسبب القشره خلال اسبوعين ح تشوف نتيجه حلوه لان مية قشور البرتقال ادير لمعه ف الشعر ويقلل من افراز العرق العرق داخب بصيلة الشعر ويحافظ ع نظافته ورطوبته لفتره ااطول؛؛
- فوائد البرتقال للبشره وهي لا تعد ولا تحصي لان فيه فيتامين سي معروف يزيد يرطب البشره ويعطيها نظاره وحيويه تشع من بعيد ويساعد ف التقليل من التجاعيد والخطوط الي تحت العين ويوحد لون الجلد ويحافظ ع نسبة سوائل الجسم ويعالج النمش والبقع الداكنه الي ف الوجه والجسم؛؛
ـ ح نعطيكم كدا طريقه وماسك برتقال مفيد لبشرتكم؛؛
- اول طريقه انكم تاخدو قشور البرتقال وتيبسوهم وتطحنوهم وتقدرو تستعملوهم ك مقشر لوجهكم او ك قناع للوجه يعني تاخدو شويه من قشور البرتقال المطحونه وتخلطوهم ب اي غسول امتاعك وتستعمليه مقشر مره ف الاسبوع لوجهك ولجسمك،او تستخدمو قشور البرتقال مع شويه حليب بودره ومية ورد واديروه قناع بيه لوجهكم مرتين ف الاسبوع طبعاً ممممممفيد جداً جداً لعلاج تصبغات وتوحيد لون البشره؛؛
- تاني طريقه تقدرو بعد ماتطحنوا قشور البرتقال المجففه تخلطوها مع اي كريم مرطب عندك وترطبي بيه وجهك قبل النوم تكوني كسبتي كريمة تفتيح وتوحيد لون طبيعيه لان زي ماقلت فيتامين سي مفيد جداً للبشره؛؛
- ثالث طريقه هو تغلو قشور البرتقال زي الشاهي بالزبط وتصفوها وتصبوها ف شيشة بخاخ وخلوها ف الثلاجه ويومياً بخو بيها وجهكم وامسحو بقطنه هكي كسبتوا فيتامين سي صافي ونظاره واشراااقه لبشرتكم؛؛
ـ بس انا عندي مشكله واحده مع البرتقال هو نحب ناكله بس مانحب نقشره ربي يخليلي امي وخالتي هما متكلفين بمهمة التقشير ههههه؛؛
وبس فلذات تشبدي اتمني الافاده للجميع اووهبكم امووواه
