الاضاءه السائله أو [ كريم هايلايتر ]

  [ Liquid Highligh ]

مسائكم فل وياسمين بنوتاتي ومداماتي الطرفونات،،
حبيبات قلبي بوست ع الاضاءه السائله او الكريميه لان هلبا سئلتوني عليها واكيد ح نشرحلكم عليها بالمختصر المفيد؛؛

98

  • قبل مانبدء ف شرح الخطوات الهايلايت تعني الاضاءه يعني بتحطيها ف المناطق الي تبي تسلطي عليها الضوء وتنور وجهك وانا شخصياً من عشااااااق الهايلايتر واكثر مشترياتي هي الاضاءات واحمر الخدود شي اساسي ف مكياجي لان تعطي رونق للوجه منعش وبشره صحيه في ناس تحب تكثر من الاضاءه وانا واحده منهم وفي ناس تكتفي فقط بالقليل يعني ع حسب الذوق اكيد؛؛
  • والاضاءه السائله او الكريميه تجي كريم وسائله نفس نظام كريمة الاساس وليها طريقه معينه ف حطتها وطبعاً الاضاءه السائله اكيد اااقوي من الباودر ولو تبي شكل ااقوي تقدري تحطيها هي ك اساس وبعدها تحطي فوقها اضاءه باودر؛؛
  • الاضاءه الي تكون سائله او كريم ليها تكنيك معين تحطي بيها ع وجهك باش ما تتكتل ولا يعطيك شكل مش حلو واكيد تبي سرعه ف حطتها وخفت ايد؛؛

ـ تقدري تحطيها بكدا طريقه واختارو الطريقه الي تناسبكم:

  1. اول طريقه هي انكم تاخدو من الاضاءه الكريميه او السائله عصره او بام واحده وتقدرو تخلطوها مع كريمة الاساس امتاعكم وتحطوها ع كامل الوجه هذا ف حالة لو تبو وجهكم كله ف لمعه خفيفه وكآنه الوجه مببلول؛؛
  2. تاني طريقه ف حالة انه ما تستخدميش ف كريمة الاساس زي حالتي تقدري تخلطي شويه من الاضاءه امتاعك مع كريمة ترطيب عاديه والحركه هادي انا اندير فيها هلبا تعطيني شكلي اكثر صحي ومشرق؛؛
  3. ثالث طريقه هي انك تستخدميها ع اماكن الاضاءه الي ف وجهك الي هي زي الصوره عظمة الخد ودمعة العين وتحت الحاجب وفوق الحاجب وارنبت الانف وفوق الشفايف،،
    ـ بس الاضاءه السائله تحطيها بعد كريمة الاساس مباشرةً بمعني ما تحطيها اخر حاجه لا تحطيها بعد ما ديري كريم الاساس وقبل ما تحطي البودره لان لو حطيتي الاضاءه الكريميه او السائله فوق البودره ح تتكتل معاك وتتحول طبقة البودره يعني تعطيك نتيجه غير مرضيه تماما فلهذا تحطيها بعد الاساس وتدمجي كويس ب اسفنجة الدمج وكملي باقي مكياجك عادي؛؛
  • بالنسبه للنوع الي نستخدم فيه الوقت الحالي الي ف صورة البوست من ماركة كركتر بصدق رووووووووووووووعه لونها قوي وثااابت جداً وسعرها رخيص مش غالي ف حدود 15/20 دينار متوفره ف محلات المكياج وانا خديتها ليها وقت من محل اليمامه باب غشير وللون الي اخترته صدفي او لؤلؤئ لون محايد يناسب اغلب اللوان البشرات والمكياج؛؛
  • بالنسبه للماركات فيه عددت ولا تحصي وجميع الماركات عندهم اضاءه كريميه او سائله افضلهم:
    بينفت.نيكس.كريولاين.ماك.ميكب فورايفر. فورايفر52. ميبلين. ايلف. فلورمار وغيرها من الماركات بس اذكرت الماركات الي مستخدمتها قبل؛؛

وبس غالياتي اتمني الافاده للجميع دومتم بصحه وخير اووهبكم امووواه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!