كيكي فيس

[ كريم الاساس المتكتل ]

مسائكم فل مفلفل بنوتاتي ومداماتي الطرفونات،،
حبيبات قلبي بوست خفيف ومهم جداً جداً ليكم هو كيف تتفادو مشكله تكتل كريم الاساس ع وجهكم؛؛

97

  • معني (الكيكي فيس) يعني كريم اساس متكتل او مداير طبقات او خطوط ع وجهك وبصراحه الشكل مزعج جداً جداً نفس شكل الي ف الصور يجيك احساس لما تشوفي واحده بالشكل هذا تبي تغسلي وجهها وتحولي الطبقات المتكتله الي ع بشرتها يعني من الاخر بجد شكل مقرف؛؛
  • كيف نتفادو كريم الاساس المتكتل هذا ونخلوا شكلنا مشرق او هلثي فيس اكثر ح نقوللكم نقاط بسيطه ح تساعدكم اكيد؛؛
  1. اول نقطه هي لما بتجي تختاري كريمة الاساس امتاعك تختاريها ع حسب نوع بشرتك سواء دهنيه تكون خاليه من الزيوت ولو بشرتك جافه تختاري كريمة يكون فيها نسبة ترطيب عاليه؛؛
  2. تاني نقطه هي اختيار لون الاساس يكون مناسب ل لون بشرتك تماماً لا افتح منها يقلب ع رصاصي ولا اغمق منها يقلب ع برتقالي يعني يكون لون الاساس مطابق تماماً ل لون وجهك ورقبتك باش يعطيك فنش حلو؛؛
  3. ثالث نقطه الي هي الاساس قبل ما تحطي كريم الاساس ع وجهك ضروووووري تكون بشرتك مرطبه ومافيهاش قشور باش تتفادي تكتل الاساس والطبقات الزايده الي تسبب خطوط ف وجهك؛؛
    ـــ يعني تعتمدي بشكل يومي ترطيب بشرتك قبل النوم ب اي كريم مرطب وتكثري شرب الميه وتقشري بشرتك مره ف الاسبوع ب اي مقشر طبيعي او تجاري ترتاحي عليه؛؛
    ـــ وقبل المكياج ضروري ترطبي وجهك بكريم مرطب يكون مناسب لنوع بشرتك تستني عليه 10 دقايق باش يتشرب وجهك كريم المرطب وبعدها ابدي حطي الاساس وباقي مكياجك؛؛
  4. رابع نقطه هو لما بتجي تحطي الاساس امتاعك ما تحطيش بكميات كبيره غلط لا ابدي حطي بالشويه عليك وادمجي لو تشوفي انك مازال تستحقي كريم اساس حطي تاني وهكذا وهكذا؛؛
  5. خامس نقطه وهي دمج ثم دمج ثم دمج الاساس كووووووويس مافيش حد يجي وراك بمعني خودي راحتك ع الاخر ف دمج كريمة الاساس ع وجهك واكيد حتي رقبتك ليها نصيب وبالنسبه ليا انا لو تبو توزيع متساوي وسهل الدمج ومتناسق خودو اسفنجة دمج المكياج الماركه الي ترتاحو عليها ولكن افضلهم هي بيوتي بلندر-ريل تكنيك- انقلوت-كريولاين-مكياجي وضروري تكون الاسفنجه مببلوله شويه يعني بلوها بالميه واعصروها كويس بالفوطه وادمجو الاساس امتاعكم علاش قلت الاسفنجه تبلوها باش اي زايد من كريم الاساس تمتصه الاسفنجه وما تخليش الاساس متكتل؛؛
  6. سادس نقطه وهي لو بشرتك فيها عيوب وما اختفتش ب الاساس امتاعك اذاً ما تحاوليش تزيدي وتعيدي تحطي ف كريمة الاساس لان ح يعطيك شكل متكتل جداً ف حالة عيوبك ما تغطت بالكامل عادي مافيش مشكله تقدري تخفي العيوب هادي ب الكونسيلر=خافي العيوب متاعك واطبطبي عليه ب الاسفنجه ح يعطيك شكل احلا ومتناسق ومش متكتل؛؛
  7. سابع نقطه ف ناس تحب (ديوي لوك) بمعني انه يحبوا شكل وجههم فيه اضاءه او اشراقه تسمي (هلثي فيس) تحسي الوجه كآنه مببلول او فيه لمعه الحلوه نعطيكم طريقه سهله تقدرو اديروها هي تاخدي شويه من كريمة الاساس امتاعك ع كف ايدك وتخلطي معاها شويه من اضاءه سائله وتجي ف جميع الماركات وع فكره لو ما عندك اضاءه سائله تقدرو تخلطوا معاها حتي الظل امتاعك بس يكون لونه شيمرينق فيه لمعه وبعدين ادمجي ع كل وجهك ح تعطيك اللمعه الصحيه؛؛
    ـــ انا الحركه هادي اندير فيها ديما بس نخلط ف اضاءه السائله مع اي كريم مرطب عادي لان ما نستخدمش ف كريم الاساس؛؛
    ـــ وتقدرو تخطلوا كريمة الترطيب مع الاساس لو تبي الاساس يكون خفيف وناعم اااكثر؛؛
  8. ثامن نقطه انه لما بثبتوا الاساس امتاعكم اختارو باودر يكون خفيف مش ثقيل يعني افضل نوع هو لوس باودر او البودره الحره المنثوره باش ما يصيرش اي تكتل للاساس امتاعك؛؛

وبس فلذات تشبدي اتمني الافاده للجميع اوووهبكم امووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!