طريقة تثبيث الآظلال

انواع الظلال [ لوس باودر-بيقمنت-قلتر ]

مسائكم طيب بنوتاتي ومداماتي الطرفونات،،
حبيبات قلبي بوست خفيف ح نشرح فيه طريقة تثبيث الاظلال فوق جفن العين خاصةً الانواع الي تكون منثوره نفس صورة البوست لان تجيني اسئله هلبا ع الموضوع هذا وب اذن الله ح تستفيدو من البوست؛؛

96

  • قبل كل شي بالنسبه لآنواع الاظلال او الايشادو فيه تقريباً 3 انواع الي يكون منثور يعني يجي زي البودره؛؛
  1. اول نوع هذا ظلال اسمه قلتر=الرش النوع زي مافي الصوره يجي كله رش ولونه قوي جداً وينحط فوق االظل الي امدايرتيه باش يعطيك لقطة الرش فوق جفن العين طبعاً فيه كدا درجة لون وع حسب الذوق والمكياج الي امدايرتيه بس انا شخصياً نحب الرش الي يكون لونه لؤلؤئي او سكري انحسه لون محياد ويمشي مع جميع درجات الظل؛؛
  2. تاني نوع ظلال البيقمنت بمعني انه الظل يجي لونه كثيف ومن اول مسحه ع عينك يبان ع طول وفيه لمعه قويه بس مش زي الرش لان ظلال البيقمنت فيها لون وتقدري تحطيها ع جفن عينك ع طول ما تستحقي تحطي تحتها ظل ك اساس ليها واكيد فيها درجات واشكال والوان وع فكره النوع هذا بالذات من الاظلال انحب نستخدمها ك اضاءه او هايلايتر للوجه لان الوانها قويه خاصةً درجات السكري او الذهبي؛؛
  3. ثالث نوع ظلال اللوس باودر زي مافي الصوره يعني يجي زي البودره المنثوره ولمعته اخف من البيقمنت ولكن اقوي من الظل البودره العادي واكيد فيه درجات واشكال والوان؛؛

ـ انجو لطريقة تبيث الاظلال هادي ف كدا طريقه بس اسهلهم هما:

الطريقة الاولى انك تاخدي فرشه نوعها فلات سنتاتك بمعني تكون مسطحه وقاسيه يعني شعرها متماسك مع بعض باش تقدري تحطي اظلال بدون تلبيز وبعدين تبخيها بشوية اما بمية ورد او ميه عاديه ع راحتكم او تاخدي الوايبز الي هو كلينكس المكياج وتمسحي فرشتك بيه وبعدين تاخدي الظل امتاعك وتحطيه ع جفن عينك بطريقة التابتنك او الطبطبه ما تمسحيش مسح لان كان هذا كله بينزل من ع جفنك؛؛

  • وع فكره الحركه هادي تقدرو اديروها حتي مع الاظلال العاديه ف حالة تبو اللون اقوي ويبان اكثر؛؛

الطريقه التانيه هو تشرو من قطرة انقلوت وهي ممتازه جداً وتستخدم ف كدا حاجه تاخدو منها قطرتين وتغطسي فرشتك ف القطرتين وبعدين خودي الظل امتاعك وحطيه ع عينك وقطرة انقلوت تزيد تقوي اللون اكثر واكثر وتخليه ثااااااااااابت مستحيل يتزحزح من مكانه وسعرها 14 دينار ليبي؛؛

  • ونفس الشي تقدرو اديرو الحركه هادي مع الاظلال العاديه لو تبو للون اقوي واكثر ثبات وحتي مع الايلاينر امتاعكم تقدرو تخلطوه بقطرة انقلوت ايثبت الايلاينر اكثر واكثر؛؛

الطريقه الاخيره تقدرو تشرو مثبت القلتر او الظل ف كدا ماركة حلوه وممتازه بس ح نذكر الماركات الي تلقوها متوفره ف ليبيا هي انقلوت عندهم مثبت للقلتر ب35دينار ليبي او كريولاين بس مش حافظه السعر؛؛

وبس مزموزاتي اتمني الافاده للجميع دومتم بصحه اوووهبكم امووواه..

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Widget Powered by Acurax Web Development Company
error: Content is protected !!