روتيني لترطيب بشرتي [فصل الشتاء]

 مسائكم فل اخر الليل بنوتاتي ومداماتي الطرفونات،،
حبيبات قلبي بوست خفيف وسريع ع عنايتي الشخصيه بترطيب بشرتي ف الشتاء؛؛

95

  • انا ف الشتاء وجهي نوعاً ما فيه مناطق يولي جاف وفيه قشور باش نتفدا القصه الحزينه هادي ضروري نكثر شرب الميه بزياده ونرطب بشكل يومي قبل النوم والا تولي كارثه بشرتي قشور وحاله محلحله،،
  • عنايتي بسيطه وسهله وغير مكلفه بصراحه انا من عشاق كريمات بيبانتين كل الانواع عندي سواء للوجه او للجسم هي ماركة طبيه وتستخدم لجميع الاعمار الصغار والكبار رجال ونساء بدون اي خوف او تسبب لضرر ف بشرتك؛؛
  • انا نستخدم ف نوعين الي هو المرهم خطه وردي وهذا ترطيب ثقيل ينفع للبشره الجافه وفيها قشور ترطب بيه يومياً قبل النوم بس انا نستخدم فيه لمناطق معينه هي جوانب الانف والفم لان تجف المنطقه هادي وتولي قشور ف ضروري نرطب ترطيب عميق وحتي لشفايفي باش مايكونش عندي قشور لما نستخدم اي روج؛؛
  • النوع التاني الي هو كريم خطه ازرق ويناسب البشره الدهنيه خفيف وتمتصه البشره بسرعه ما يزيت الوجه ولما تدهني بيه ف لليل تنوضي الصبح تحسي وجهك مترطب ومرتاح وبالنسبه ليا انا نرطب بيه ف وجهي كله؛؛
  • بالنسبه لترطيب تحت العيون نستخدم حالياً ف كريم ترطيب العيون من ماركة كريولاين بصراحه ررررررررررررررهيبه حبيت ترطيبه مع انه ماتوقعت هكي لانها ماركة تجميليه مش طبيه بس تفاجآت بترطيبه العميق تحت العيون يرطب المنطقه بالكامل وفي نفس الوقت ما يزيت وع فكره ينفع تستخدميه تحت المكياج ك مرطب للعيون يخفف من الخطوط والتجاعيد هو مستخلص من زيوت طبيعيه مثل زيت الخروع والزيتون والجوجوبا وغيره وفيه نسبة وقايه من الشمس والي عجبني فيه اكثر انه بدون اي ريحه لان انا عيوني حساسات ما نتحملش الكريمات الي تكون فيهم ريحه معطره فلهذا تقيمي للكريم 8.5 من10 وح نرجع نشريه مره تانيه اكيد؛؛

وبس برنسيساتي اتمني الافاده للجميع ودعواتكم ليا بتهوين الآلم الي نحس فيهم اووووهبكم امووواه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!