مساء الجمال والروقان بنوتاتي ومداماتي الطرفونات،،
حبيباتي بوست خفيف ع منتجات ماركة نيكس او ماتسمي ب إن واي إكس وطبعاً سئلتني كدا عضوه ع ماركة نيكس الموجوده ف ليبيا ماقدرت نزل ريفيو الا لما نجرب منهم؛؛

• اول شي ماركة نيكس تعتبر من الماركات الدرق ستور والرخيصه بس ف ليبيا للاسف اسعارها نار الله الموقده بسبب ارتفاع الدولار ولكن الي قاعده برا لو بتشري منها انقوللها جربي منها ماركة نيكس جميع منتجاتها بصراحه ممتازه وع طول يقارنو فيها بالماركات الغاليه خاصة ف درجات الارواج لان عندهم كدا نوع وشكل وجميع درجات الالوان ومقاربه جداً لماركة ماك وميكب فورايفر؛؛
• ف مره واحده من عضواتي قالتلي هل ماركة نيكس الموجوده ف حي الاندلس اصليه بنقوللها ونآكد بعد ماجربتها اصليه هما صح مش وكيل رسمي ولكن جايبن ستاند من ماركة نيكس اصليه بالفعل ومكانهم مقابل مطعم الفروج سابقاً بالنسبه للاسعار غاليه ف ليبيا بسبب ارتفاع اسعار الدولار طبعاً؛؛
• المهم خلوني ف موضوعنا انا خديت منهم زوز انواع من الارواج،،

1. اول نوع الي لونه موف غامق اسم الدرجه امتاعه (بلاك شيري) لونه شتوي ونوع بيتر قلوس بمعني انه لونه مش كثيف لو حطيته بروحه بدون قلم يبان اخف لان قلوس ولو تبي لونه اقوي ديري تحته قلم او روج نفس درجة اللون يطلع احلا بس للون خرااافي ع الطبيعه وبذات الي بشرتها سمراء ح يطلع عليها احلا مني بهلبا لان بشرتي بيضاء للون يبان قوي شوي عليا ولكن الي لون بشرتها اسمر مني ح يطلع احلا واحلا ومع هذا انا انحب الدرجات الغامقه خاصةً ف الشتاء وسعره ف حدود 28 دينار ليبي؛؛
2. تاني نوع الي لونه احمر غامق او غزالي رقم درجته (07) ونوعه اكستريم لب كريم يعني لونه كثيف اكثر وثباته اكثر حتي بدون ما تحطي تحته اي روج ولا قلم لونه ح يبان معاك ع طول لان نوعه لب كريم درجة للون خرافيه وطبعاً شتويه يتماشي مع البشره البيضاء والسمراء وسعره ف حدود 27 دينار ليبي؛؛
3. بالنسبه لثالث حاجه شريتها من نيكس هو بنسل ايلاينر نفس الصوره الي ف البوست نوع (كيرف) بمعني شكله مايل ويسااااااعد هلبا ف الرسم خاصة المبتدئات ف الرسم بصراحه عجبني هلبا هلبا هلبا من ناحية للون اسود قاتم ومطفي وثااااابت قعد معاي اكثر من 8 ساعات ثابت ماتحرك من مكانه وسهل الرسم بيه بصراحه ما ندمت اني شريته ولكن سعره غالي شويه بالنسبه لنوعه سعره ف حدود 53.55 دينار ليبي؛؛

• انا شخصياً تعجبني هلبا ماركة نيكس ونحب نشري ونجرب منها والاضلال امتاعها الوانها رهيبه وقويه ف حطتها وحتي الهايلايتر امتاعها قوي بصدق تعجبني ف كل منتجاتها واكيد ح نرجع ناخد اكثر من درجة لون بالنسبه للارواج لان الوان ررررررهيبه وثاااابته؛؛

وبس حبيباتي اتمني بوست مفيد ليكم دومتم متآلقات اووووهبكم امووواه..