‏إختيار لون الاساس‬

مسائكم ورد بنوتاتي ومداماتي الطرفونات،،
حبيبات قلبي بوست خفيف ع كيفية اختيار لون كريم الاساس ونوعيه الي تناسب بشرتك يعني بوست مهم للجميع؛؛

89

  1. اول شي انا ديما تجيني اسئله من عضواتي انهم يبو كريمة اساس وبودره ويبو درجة اللون حبيباتي صعب ومن المستحيلات انا بنقولك درجة للون لان مانعرفش شكلك ولا درجة بشرتك ومستحيل بنحفظ جميع درجات الالوان لجميع الماركات ولكن ح نقوللكم خطوات تساعدكم اكثر ف اختيار لون الاساس المناسب لبشرتك؛؛
  2. تاني شي اي واحده بتحاول اتبيض لون بشرتها ب كريم الاساس بنقوللها حبيبتي هذا ف الاحلام السعيده لان من المستحيلات و خليها قاعده ف راسك لما بتاخدي درجة الاساس افتح من لون بشرتك ح يقلب ع رمادي ويبان مجير يعني بجد شكلك ح يكون مآساة فلهذا درجة لون الاساس يكون نفس لون بشرتك بالزبط لا افتح ولا اغمق يعني درجة للون ديما تكون متناسقه مع لون رقبتك و اوذانك نظام ميكي ماوس فكوني منها؛؛
  3. ثالث شي لما تبو تشرو كريمة الاساس ضروري تحددو النوع الي تبوه بمعني ع حسب نوع بشرتك اذا كانت دهنيه او مختلطه ديما يكون الاساس نوعه اويل فري بمعني خالي من الزيوت ونوعه يكون ستك او كومباكت باش ما يزيت معاك اما اذا كانت بشرتك عاديه او جافه ديما خودي لكود فونديشين بمعني الاساس الي يكون سائل او كريمي لان فيه نسبة ترطيب باش ما يشقق ع وجهك ولا يتغير لونه؛؛
  4. رابع شي انه لما تختاري كريمة الاساس امتاعك تحددي التغطيه الي تبيها لو كانت بشرتك فيها عيوب وتصبغات اكيد ح تاخدي فل كفر يعني تغطيه كامله وقويه اما اذا كانت بشرتك فيها تصبغات بسيطه خودي ميديم كفر بمعني التغطيه المتوسطه واذا كانت بشرتك صافيه تماماً مجرد تبي توحدي للون خودي لايت كفر وهو تغطيه خفيفه وبي بي كريم يناسبك اكيد؛؛
  5. خامس شي وهو موضوع صورة البوست هي كيف تعرفي انه درجة ونوع كريم الاساس ناسبك او لا زي ما تشوفو ف صورة البوست افضل مكان تبي تجربي فيه لون الاساس امتاعك هو الفك السفلي باش تاخدي درجة نفس لون بشرتك وتكون موحده مع لون رقبتك وهادي نقطه مهمه يعني ما تاخدي لون افتح من رقبتك باش ماتبان الكريمة كآنك لابسه قناع بجد منظر بشع؛؛
    ـ يعني لما تبي تجربي درجة للون تاخدي من الكريم امتاعك وتحطي منها ع جزء الفك السفلي وتستني عليها ف حالة بشرتك امتصت الكريم هذا معناها الدرجة هادي تناسبك تماماً نفس صورة البوست الي امدايره عليها علامة ×ب الاحمر هادي الدرجة الي ناسبتها زي ماتشوفو بعد ما حطت الكريم ودمجاته امتصت بشرتها للون تماماً وباين طبيعي ع الاخر؛؛
  6. سادس شي في نوعية من الناس ما تلقاش لون الاساس الي يناسبها افضل طريقه اديروها هو تاخدي لون اساس افتح منك بدرجه ولون اساس تاني اغمق منك بدرجه بعد ما تدمجيهم مع بعض يعطوك نفس لون بشرتك وديما ننصحكم بتخليط الالوان امتاع الاساس يعطيكم فنش احلا وانظف لبشرتكم؛؛
  7. سابع شي بالنسبه الناس الي تسئل فيا ديما ع افضل ماركات الاساس بنقوللكم حبوباتي كل ماركة وتتميز بشي معين بس انا ح نصنفهم لجزئين الجزء الاول ح نسمي افضل ماركات الغاليه لكريمات الاساس منها:
    نارس -ماك -ميكب فورايفر- دوتشي &قابانا -جفنشي -شنايل -استي لودر- ديور- كلارنس- كلينك- لانكوم- بيبي براون- وكدا ماركة ممتازه والماركات هادي فيها من التغطيه التقيله للمتوسطه للخفيفه وفيها ستاند يناسب جميع انواع البشرات؛؛

اما الجزء التاني هو لافضل ماركات رخيصه لكريمات الاساس منها:
ميبلين- نيكس- ماكس فاكتر- لوريال- برجوا– ريميل لندن -فورايفر52 -كاراجا -ريفليون – وكدا ماركة ممتازه واكيد فيها تغطيه من التقيله للخفيفه وستاند يناسب جميع انواع البشرات؛؛

  • بس انا نبي نحكي ع افضل ماركه عالمياً لكريمة الاساس ومتوفر وكيلها الاصلي ف ليبيا هي كريولاين المفروض سموها ماركة مخصوص لكريمة الاساس لان الماركة هادي الي تتميز ب انواع واشكال واحجام لكريمة الاساس متوسعه هلبا ومعروفه بالفل الكفر امتاعها التغطيه القويه والماركة الوحيده الي فيها جميع درجات الوان البشره فوق من 200درجة لون لان هي ماركة اساسها صممت لمكياج الفنتازي والمسارح وبالنسبه لسعرها يعتبر وسط مش غالي واحجامها وكميتها كبيره واحسن مافيها صلاحيتها تقعد حتي من سنه لسنتين هذا علاش انا ديما ننصح بيها الناس الي تبي تغطيه قويه وثابته لان جودتها ممتازه مش زي مافي ناس تقول ناخد ف نسبة اعلان بنقوللكم انا نعطي في نصيحه لوجه لله وما ناخدش ف فلوس لا من كريولاين ولا غيرهم ولو كنت ناخد ح نقول لان مانخاف الا من الخالق؛؛
  • ملاحظة صغيره ردو بالكم من الاستعمال اليومي لكريم الاساس اي كانت ماركته غاليه او رخيصه لان ح يدمرلكم بشرتكم ويصكر المسام ويطلعلكم حبوب ردو بالكم تستعملوا كريمة الاساس فل كفر يومياً صدقوني ح تخسرو علاجات ع بشرتكم توصل للآلاف ومرات بدون فايده اذا كانت عندك عيوب ف بشرتك حاولي تعالجيها ماتخفيها بالمكياج بشكل يومي لان هذا مش حل جذري ليك؛؛

وبس برنسيساتي اتمني الافاده دومتم متآلقات اوووهبكم امووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Floating Social Media Icons by Acurax Wordpress Designers
error: Content is protected !!