مسائكم ورد بنوتاتي ومداماتي الطرفونات,,
حبيبات قلبي بوست خفيف ع استعمالات زيت جونسون ب ابسط الطرق واسهالها..

1. تقدري تستعمليه الإزالة مكياج العيون زي الكحل والمسكره وغيره بدون ما يحسس العيون لان خالي من مواد كيميائيه.
2. تستعمليه لتنعيم الجلد الميت الي حول الظفر ويعطي للمعه حلوه للآظافر.
3. تقدري تخلطيه مع شامبو الجسم امتاعك يرطب اكثر الجلد اكثر بدون ما يسبب ف جفافه.
4. الي رجليها خشنه وعندها تشققات او ايديها فيهم جفاف يرطبهم ترطيب ممتاز.
5. تقدر الحامل او الي مدايره رجيم تدهن بيه جسمها يومياً لان يمنع ويخفف من التفزرات او الاسترتش مارك ممتاز جداً.
6. تقدري ترطبي بيه الاماكن الحساسه او للجسم بكامله خاصةً بعد ازالة الشعر يرطب المكان ويخفف من التهيج والتحسس.
7.  تقدري تخلطيه مع اي سكراب او صنفره للجسم والوجه مثلاً تقدري تاخدي سكر وزيت جونسون اتقشري بيه وجهك او شفايفك او جسمك يصفي الجسم ويرطبه يخليها فعلاً بيبي.
8. الناس الي تحب المساج تدهن بيه وتدلك الجسم ح ينعمه ويعطيه ريحه حلوه وكان تبي تخلطيه مع اي لوشن او كريم فيه ريحه تعطل معاك الريحه اكثر انا مخلطاته مع المسك الابيض السائل ريحته رهيبه عجيبه وتقعد ع الجسم يوم كامل وب النسبه للشعر نخلط فيه مع المخمريه للشعر طبعاً يعطي نعومه ولمعان بدون ما يدهن الشعر ويخليه مزيت فعلاً روعه.