مساؤ ورد مورد عضواتي الكرام حبيبات قلبي اليوم موضوعنا ع السوانا المنزليه لان نسئلت كدا مره من عضوات ع طريقة الساونا المنزليه كيف تتشغل وكم الوقت الي مفروض تقعدي فيه ان شاءالله ح نشرحوها بشرح مختصر ومفيد للجميع؛؛؛
- اول شي خلينا نعرفو جهاز الساونا المنزليه هو جهاز يكون شكله زي الخيمه ومغلف كله من جميع الاتجاهات وشكله بيكون نفس صورة الستيت فيه عدة انواع من ماركات ولكن هما نفس الغرض كلهم يجي معاه جهاز تحكم صغير الي بتعدلي بيه البخار وترمس الي بتعبي فيه مية الي بطلعلك البخار ف الساونا يعني فكرته نفس الحمام البخاري ولكن هذا مصغر ف البيت؛؛
ـ طريقة تجهيز جهاز الساونا ـ
- طبعاً هو زي ماقلت جهاز مصكر كله قبل ما تخشي فيه تكوني بللتي جسمك وشعرك بميه دافيه مش سخونه ومش مصقعه تكون فاتره وحتي شعرك يكون مبلول ماتخشيش الساونا وشعرك جاف ح يزيده تقصف ماشي وبعدين يا حنه تعدلي درجة الحراره ع 190فهرنهايت مايزيدش ع هكي مش ما تتبشمطيش وتعدلي الوقت لو كنتي اول مره تستعمليها ديري 6دقايق الوقت هادي لاول مره وكل ما تستعمليها زيدي شوي ف الوقت لين توصلي ل15دقيقه مايزيدش ع هكي الوقت مش ماضريش جسمك ايوا نبهتكم هو مش ب الشبعه ولما بتجي تخشي للساونا ما تكونيش انتي ف هواء مصقع وطول تخشي للسخون لا تبدا الحراره بتدريج مش يتقبل جسمك وطبعاً الترمس الي معاها احسنلك تعبيه مية سخونه طول لان بتاخد وقت لما بتقعد تغلي فلهذا حطيله مية سخونه طول افضلك ماتقعدي تستني؛؛؛
ـ استعمالات الصابون داخل الساونا ـ
- طبعاً بعد ما تجهزوها الساونا يكون معاك صابون المغربي السائل وينباع ف كل العطريات وكياسه المغربيه الحرشه مش تكيسي بيها ولو عندك اضافات تانيه عادي مثلاً لو بتخلطي صابون المغربي مع الحنه الحمراء عادي وماتخافوش مش ح تصبغ ف الجسم انا اندير فيها لما نمشي للساونا يعني تاخدي شويه صابون مغربي وحنه حمراء تحطيهم ف فازو وتصبي عليهم قطرات ميه خلطيهم وبعدها ضيفي عليهم مية ورد لين تكون جاريه زي الشربه وادهني بيها جسمك وانتي ف ساونا بعد ماتسخني كويس تخشي للدوش امتاعك مصمصي جسمك وكيسي يعني افركي جسمك بحركة دائريه بشويه مش سلخ الحكايه وبعدها دوشي عادي وضروي بعد الساونه والتكيس تمصمصي جسمك ب مية مصقعه تصكري المسام وبعد ماتطلعي من الدوش خودي ثلجه ومرريها ع وجهك صكري المسام هادي خطوه مهمه ماتنسوهاش وكملي دوش امتاعك عادي اغسلي جسمك ب لوشن امتاعك واغسلي شعرك وتطلعي عروسه تللشي؛؛
ـ فوائدها ـ
- الساونا والحمام البخاري ليها عدة فوائد تزيل الخلايا والقشره الميته من الجسم الحمام ويعطي للجسم طاقة ونشاط ويزيل توتر العضلات ويخفف من ألم المفاصل ويخلص الجسم من السموم ينشط نمو الشعر يساعد على إنقاص الوزن عن طرق فقد كمية من سوائل الجسم؛؛؛
طبعاً تستخدموها مره كل 15يوم كويس للجسم وللعظام وللبشره؛؛ وين تنباع اكيد ف محلات الي تبيع المعدات الرياضيه..
وبس دومتم بود حبيبات قلبي
