أ‏خطاء المكياج

مساؤ ورد اخر لليل بنوتاتي ومداماتي الطرفونات،،
حبيبات قلبي بوست ح يكون عن الاخطاء الشائعه الي نرتكبو فيها ف المكياج اكيد كلنا درنا نفس الاخطاء هادي ف المكياج ومش عيب الانسان يتعلم وينمي قدرته اكثر واكثر اما الغلط انه نستمرو في الاخطاء هادي وما نتعلموا تصحيحها؛
73
  • زي ما تشوفو ف صورتين ف البوست لارتست معروفين عالمياً الصورتين فيهم جزء من الوجه تطبيق الصحيح للمكياج اما الجزء التاني هو تطبيق خاطئ تماماً للمكياج ح نحاول نشرح ع الاخطاء هادي باش نتعلموا منها الصح؛؛
  1. اول خطآ ف المكياج هو تحطوا كريم الاساس ع البشره مباشرة بدون حمايه للبشره او ترطيبها قبل المكياج وهذا اكبر غلط وكارثه لان مش ح يعطيكم النتيجه المطلوبه وع طول ح يكون الاساس امتاعكم مقشر اذا كانت بشرتك جافه او مزيت اذا كانت بشرتك دهنيه فلهذا قبل ما تحطوا اي كريم اساس ضروري نحطوا كريم ترطيب الي تناسب نوع بشرتنا وبعدها نبدو بخطوات المكياج؛؛ 
  2. تاني خطآ ف المكياج وهذا خطآ شاااااااائع ومنتشر بشكل رهيب وع طول انشوف ف الشارع بنات يقابلو فيا امدايرين كريم اساس او باودر مش نفس درجة بشرتهم وهادي كاااارثه غلط تاخدي درجة الاساس افتح او اغمق من لون بشرتك الاساسيه لان ح يعطي منظر بشع ويقلب ع طول اللون للرمادي وكآنك غاطسه ف الدقيق بالزبط ضروري تكون درجة الاساس نفس لون بشرتك بالزبط ولما تحطيها ع وجهك تكون نفس لون رقبتك يعني تدمجي الاساس الوجه والرقبه مسحه خفيفه لان ح يبان كآنك لابسه قناع فلهذا تاخدو نفس لون بشرتكم وافضل مكان للتجريب لون الاساس هو الفك السفلي اذا كان لون الاساس متناسق مع لون رقبتك معناها هادي درجه مناسبه ليك،، (في حالة ما لقيتوش اساس نفس لون درجة بشرتك بسيطه خودو لونين من الاساس واحد يكون افتح من لونك بدرجه والتاني اغمق من لونك بدرجه باش لما تدمجيهم مع بعض يعطوك نفس لون بشرتك ويعطيك فنش حلو)؛؛
  3. ثالث خطآ هو الكونسيلر=خافي العيوب حتي هو ضروري تاخدو درجه تناسب لون بشرتك خافي عيوب ديما يكون افتح من لون بشرتك بدرجه او درجتين ك حد اقصي وطبعاً اكيد ع حسب نوع وماركة خافي العيوب؛؛
  4. رابع خطآ هو الباودر طبعاً في اشكال وانواع من الباودر وكل نوع ليه استخدام معين ح نشرحه ف بوست بروحه مفصل بس ح نتكلم ع درجة للون الباودر اما تكون نفس لون بشرتك او في حالة تبي اشراقه للوجهك اكثر تكون افتح من لون بشرتك بدرجه واحده فقط بس بشرط الاساس الي حاطتيه يكون نفس لون بشرتك بالزبط؛؛
  5. خامس خطآ هو الحواجب واااااه من الحواجب لان بجد الحواجب بالذات هما الي يتحكموا ف ملامح الوجه اما تحليه او تشينه يعني بإيدك الحواجب بالذات يكون رسمها بشكل طبيعي ابتعدو ع تربيعة الحاجب من قدام لان ح تبين وكآنه الحواجب ملصقه او متركبه تركيب مش حلوه وابتعدو ع تغلظيها بشكل مبالغ فيه لا ارسمي حاجبك ع حدوده الطبيعيه بالنسبه للون ابتعدو تماماً ع للون الاسود حتي لو شعرك لونه اسود ممنوع اديري لون حواجبك اسود لانك ح تطلعي شعشبونه فلهذا اذا كان شعرك لونه فاتح اختاري درجة لون لحواجبك اغمق بدرجتين من لون شعرك اما اذا كان لون شعرك غامق ف تختاري درجة لون لحواجبك افتح بدرجتين من لون شعرك؛؛
  6. سادس خطآ هي الظلال لما تحطي الظلال ادمجيها ع قد ما تقدري ما تخليش الحدود امتاع الظلال بارزه او محدده لا ادمجي حدود بفرشه نظيفه باش يعطيك شكل حلو للعين؛؛
  7. سابع خطآ هي رسمة العين مايكونش مبالغ فيها يعني لما بترسمي عينك ما تعرضي خط الايلاينر فوق رموشك لان كل ما تعرضي خط الايلاينر ح تبان العيون مبطنه ولا اطلعي خط او جناح الايلاينر لنهاية حواجبك غلط ومش ح يعطيك فنش حلو يعني ديما ارسمي الايلاينر ف حدود جفنك ما تبالغي فيها لا من نهاية ولا بداية العين ومن تحت الرموش ع طول كحلي عينك وبعدين ادمجي الالوان تحت رمشك السفلي باش يعطيك ايفكت حلو لعينك؛؛ 
  8. ثامن خطآ الرموش ف حالة بتركبي رموش اختاري نوع وماركة كويسه للرموش يعني رموش الي يبدا شكلهم نفس المكسنه ولا الجناوح اتقولي بطيري بيهم هادي ابتعدي عليها تماماً ديما اختاري الرموش الطبيعيه والي تحلي العين مش الي تشينها،،
    ـ في حالة ما تحطوش ف رموش اختارو مسكرة نوع كويس وافضل انواع المسكرات هي برجوا وميبلين وماكس فاكتر وريميل لندن الماركات هادي عندهم جميع اشكال وانواع فرش المسكرات وما تحاولوش تحطوا كدا طبقه من المسكره لانها ح تكتل معاكم يعني من الاول حاولو تحطو المسكره بحركه خفيفه و وزعوها كويس ع الرموش؛؛ 
  9. تاسع خطآ هو الكونتور لما تختارو الكونتور ديما يكون درجة للون امتاعه ع رمادي ما يكونش ع اورنج او محمر لان بتحددو بيه ملامح وع طول ادمجوا كويس كويس ما تخلوه خطوط بارزه او واضحه لا خودو وقتكم ف الدمج باش يطلع الفنش حلو؛؛
  10. عاشر خطآ هو الهايلايتر=الاضاءه ما تكونش مبالغه ف حطتها لان ح تبين الوجه متكتل لا ديما تحطو الاضاءه ع عظمة الخد وارنبة الانف وفوق الحاجب بحركة خفيفه الي عندها مسام واضحه تبعد الاضاءه ع خدودها لان ح تزيد تبين المسام وعيوب البشره؛؛
  11. خطآ هو احمر الخدود مايكونش بالالوان البهلوان ديما اختارو درجات الطبيعيه المشمشي الخوخي درجات الترابيه الروز الهادئ وما تكثروش منه او تبالغوا فيه لان ح يآثر ع شكلكم سلبي طبعاً وتطلعي زي ماركو؛؛
  12. خطآ هو رسم الشفايف ردو بالكم تبالغو ف تكبير شفايفكم لان الموضوع ح يقلب للآسوآ تماماً ديما ارسموا ع حدود شفايفكم الطبيعيه بالنسبه لدرجة اللون ع طول اختارو محدد او قلم الشفايف اغمق بدرجه من الروج او القلوس الي بتستخدموه ما ينفعش اديرو قلم غامق و روج فاتح لان مش ح يطلع الشكل حلو ابداً؛؛

وبس فلذات تشبدي بوست طويل بس نصائح مفيده اكيد وح تنفعكم ف اختيار وحطت مكياجكم اتمني الافاده للجميع دومتم متآلقات اووهبكم اموواه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Icons Powered by Acurax Web Design Company
error: Content is protected !!