يامساء الجمال والروقان بنوتاتي ومداماتي الطرفونات؛؛
اكيد استحشتوني مع انه غبت اقل من اسبوع بس كآنه غبت ليا شهور وصدقوني ما يغيبني الا الظروف الصحيه او قلة الفضوه بس رجعتلكم ب بوستات حلوه من ضمنها بوست نصائح ع عيون المبطنه الي هلبا جتني اسئله عليهم كيف نتعاملوا بالمكياج ف العيون المبطنه البوست هذا ح يفيدكم حاولت انلخص كلامي ف نقاط مفيده ليكم؛؛
- خلي نبدا وانقول انه من اصعب نوع في العيون هي العيون المبطنه والتعامل امعاها ف المكياج يبي شوية تركيز وحرفه نوعاً ما بس معاي انا ح تسهل المعلومه ك العاده؛؛
- معني العيون المبطنه هي نفس الصور الي ف البوست تكون عظمة او شحمة الحاجب نازله ع الجفن المتحرك يعني لما تشوفي ف المرايا قدام ما تشوفيش كسرة العين لان جفن الحاجب نازل لتحت ف ضروري المكياج يبرز كسرة العين باش يبين اكبر مساحه للعين وللجفن؛؛
- انسب مكياج للعيون المبطنه وافضلهم ويبرز العين بشكل حلو هو السموكي ايز او الكات كريس، السموكي معناه المكياج الي يكون دخاني وثقيل ع جفن العين العلوي والسفلي، اما الكات كريس هو مكياج يبرز كسرة الجفن وتقدرو تبحثوا ف اليوتيوب تكتبو سموكي ايز توترويل، او كات كريس توترويل ويطلعلوكم كدا فيديو من كدا ارتست مفيد ليكم؛؛
- اول نصيحه للعيون المبطنه هي ممنوع عليكم مانعاً باتاً استخدام الوان الظلال الي تكون شيمر او قلتر بمعني ظلال الي يكون فيها لمعه واضاءه قويه ما تقربيها لعيونك لان الاضاءه او لمعه ح تبرز وتبين اكثر عيونك مبطنه والجفن نازل لتحت؛؛
- تاني نصيحه هي عدم استخدام الرسم ب الايلاينر ممنوع ع العيون المبطنه لان لما بترسمي ب الايلاينر خط عريض فوق رموشك ح يبين العين اكثر مبطنه والجفن نازل لتحت نفس الصوره الي ف البوست رقم (1)؛؛
- ثالث نصيحه هي استخدام الوان الظلال المطفيه شادو يكون مات مطفي تماماً مافيش لمعه نهائيا ويكون لونها ف الغوامق وغير محدد يكون دمجها مزبوطً باش تبرزي جفنك وتخفي تبطينة الجفن و يعطيها مساحه وكسره ف العين نفس صورة البوست؛؛
- رابع نصيحه للعيون المبطنه وانسب واخف واسهل مكياج ليها هي تركيز ع الرموش العلويه والسفليه اما بالمسكرة او تركيب الرموش ضروري تكثفوها ف المكياج باش تعطي كبر اكثر للعين بمعني تفتح العين وتخفي الجفن المبطن ؛؛
- خامس نصيحه ف حالة تبو تستخدمو ايلاينر ترسمو خط رفيع ع الرموش العلويه بس يكون خط رقيق ع الاخر وما تطلعوش بيه لنهاية العين لا خط الايلاينر يكون ع حد رموشك العلويه وتدمجي بالفرشه باش يعطيك تمويه السموكي اكثر بمعني ما ترسموش جناح الايلاينر نهاية العين؛؛
- سادس نصيحه بالنسبه للرموش السفليه اما تكتفوا بالمسكره وضروري تكون مكثفه باش تبرز العين او تكحلوا من داخل ب الالوان الاضاء اما درجات النود او الابيض او الفضي وتدمجو تحت الرموش السفليه بلون يكون غامق باش يعطيكم شكل السموكي اكثر؛؛
وبس برنسيساتي اتمني الافاده للجميع دومتم متآلقات ااوووهبكم امووواه؛؛
