مساؤ ورد اخر لليل بنوتاتي ومداماتي الطرفونات؛؛
حبيبات قلبي بوست خفيف هو طريقة صنع سكراب او مقشر ف البيت بمكونات سهله ومفيده؛؛
- اول شي خلي انقوللكم فائدة السكراب او تقشير البشره اقل شي من مره لمرتين ف الاسبوع هو لتجديد خلايا الجلد وتوحيد لونه وترطيبه اكيد يعني التقشير للبشره خلوه شي اساسي ف روتين اهتمامكم الاسبوعي ب وجهكم او جسمكم؛؛
- المقشر هذا درته انا ف البيت وقليل نادر نشري مقشر جاهز و انحب المقشرات الطبيعيه لان كل المقشرات تقريباً فايدتها واحده وتآدي ف نفس الغرض سواء كانت تجاريه او طبيعيه؛؛
- مكونات المقشر بسيطه وسهله ومتوفره اكيد هي:
-ملح التقشير بالخيار موجود ف العطريات والصيدليات سعره ما يفوت 4دينار ليبي+مطحون شاهي الاخضر انا رحيته بروحي الشاهي بدا زي الحنه نفس الصوره+شامبو جسم+زيت زيتون؛؛ - ـ المقدار هو حسب الرغبه والكميه الي تبوها انا درت 3كواشيك كبار ملح التقشر،2كواشيك مطحون شاهي اخضر،2كواشيك زيت زيتون؛ وبالنسبه لشامبو الجسم بالعين لين بدا القوام امتاع التقشير وسط نفس الصوره باش نقدر ندلك بيه جسمي بسهوله؛؛
- ـ الطريقة هي لما تكوني ف الدوش تغسلي شعرك وبعدها اديري تقشير لجسمك بحركه خفيفه دائريه لكل جسمك خليه 5/10دقايق بعدين اغسلي جسمك ك المعتاد؛؛
- اخر واهم نقطه هي بعد اي تقشير للجسم ضروري ترطبي جسمك ب اي مرطب يعجبك انا شخصياً نستخدم ف لوشن بيبانتين او بانتثول هما نفس الشركه وكريمة طبيه ومرطب ممتاز يناسب كل انواع البشره؛؛
وبس برنسيساتي اتمني الافاده للجميع دومتم بصحه اوووهبكم امووواه..
