[ وصفات الهالات وتجاعيد العين ]
مسائكم طيب اخر لليل بنوتاتي ومداماتي المزموزات،،
حبيبات قلبي بوست انطلب مني هلبا هو كيف نهتموا بترطيب وتخفيف الهالات وانتفاخ وتجاعيد تحت العين؛؛
- اول شي قبل ما نبدآ ف البوست هو ضروري تعرفو تفرقوا ما بين هالات السهور والارهاق وما بين الهالات الي يكون سببها مرضي الهالات الي سببها السهور والارق مقدور عليها وتخف اما بوصفات طبيعيه او منتجات طبيه ولكن الي سببها مرضي صعب تتحول بالوصفات او حتي بمنتجات طبيه ومن اهم اسباب المرضيه الي تكون مسببه للهالات هي اما العامل الوارثي-الحساسيه المزمنه والربو والرمد المزمن-فقر الدم بجميع أنواعه-أمراض الكبد المزمنه-امراض المعده من ضمنها اعصاب المعده والقولون؛؛
- اما بالنسبه للهالات الي سببها السهور والتعب او الانتفاخ او التجاعيد هادي كلها تتعالج بالاهتمام المستمر بترطيب تحت العين؛؛
ـ تبو تعالجوا الهالات ضروري ترقدو بكري وتكثرو من شرب الميه ضروريه للصفاء ونضارة البشره؛؛
ـ تاني شي العلاجات الطبيعيه الي ننصح بيها لانتفاخ وهالات تحت العين هي:
- ننصحكم بكمادات عصير الخيار رهيييييبه جداً جداً تعالج انتفاخ العين والهالات وتقلل من التجاعيد لان الخيار فيه نسبة ترطيب كبيره هي تاخدو خياره مع شويه ميه وترحوه ف الخلاط وبعدها تصفوه وتغطسوا قطع قطن المدور ف عصير الخيار وبعدها تلفوها بكيس للحم وتحطوها ف الفريز اثلج وكل يوم خودو زوز قطنات وحطوهم تحت الجفن السفلي مدة 15دقيقه يوميا استمرو عليها ح تخف الهالات والانتفاخ بشكل كبير؛؛
- اما الطريقه التانيه هي مكعبات ثلج مغلي الشاهي الاخضر ممتازه جداً لعلاج الهالات وتخفيف من مسام الوجه تاخدي شاهي اخضر تغليه وتصفيه وصبيه ف قوالب الثلج يثلج وكل يوم خودي 2مكبات حطيهم تحت العين لمدة 10/15دقيقه وتقدرو تمرورها ع الوجه كله و ح تلاحظو فرق كبير ف مدة قصير؛؛
- الطريقه الثالثه هي كمادات الحليب ولكن الكمادات تكون قطعة قماش قطن طبيعي زي الصوره يعني حتي لو تشيرت قديم معاش تبيه تقدري تقصيه طرفيات صغيرونه وتستخدميه كمادات تحت العين خودي قطع الصغيره من القماش وغطسيها ف حليب وحطيها ف الفريز وكل يوم استخدمي منها 2تحت العين لمدة 15دقيقه وطبعاً الحليب معروف ف نظارة واشراقه البشره؛؛
- الطريقة الرابعه هي ترطيب ف لليل بزيت للوز الحلو ممممممممممممممممتاز جداً لتخفيف الهالات والتجاعيد بجد رهيب تدهنو بزيت للوز الحلو تحت عيونكم ف لليل قبل النوم وح تشوفو فرق كبيرررر خلال شهر واحد من استمراركم عليه يومياً؛؛
- الطريقه الخامسه هو ترطيب تحت العين ب فيتامين eطبعاً فيه انواع والوان انا عندي الي لونه احمر نفس الصوره وقوته 100 يعني الي متوفر عندك من اي شركه منتجه يفي بنفس الغرض وفوائد فيتامين eلاتحصي ولا تعد يخفف من التجاعيد والهالات بشكل كبير واكيد بترطبو بيه ف لليل قبل النوم تحت عيونكم؛؛
- بالنسبه للناس الي تبي كريمات طبيه للتجاعيد ننصحكم بماركة ڤيشي او كلارنس او كلينك هادو اقوي ماركات صنعت كريمات علاجيه للتجاعيد تحت العين؛؛
وبس غالياتي اتمني الافاده للجميع دومتم متآلقات اوووهبكم امووواه…
