شامبو ينظف مسام الشعر [كلير فاي]

مسائكم سعيد بنوتاتي ومداماتي الطرفونات،،
حبيبات قلبي بوست اليوم معلومه جديده ليا وحبيت انشاركم بيها باش الكل يستفيد منها للامانه المعلومه خديتها من دكتوره نعمه خبيرة علاج للشعر والبشره؛؛ 
65
  • المعلومه هي لشامبو نوعه كلير فاي وظيفته الشامبو هذا ينظف تنظيف عميق للشعر ويفتح مسام فروة الشعر الشامبو هذا لقيته عند مدام نعمه تستخدم فيه قبل جلسات البروتين للشعر باش تفتح المسام وتحول اي منتج استخدمتيه لشعرك يعني تستخدم ف العلاج ع فروة شعر نظيفه باش بسرعه يستقبله الشعر؛؛
  • النوع هذا من الشامبو كلير فاي ح يفيد الناس الي مستخدمه كدا منتج ع شعرها بمعني الي امدايره كيراتين او فرد او بروتين او اي منتج علاجي مثبت ع الشعر وتبي تتخلص منه نهائي وتحوله من شعرها تقعد تغسل بالشامبو هذا 3مرات ف الاسبوع خلال شهر واحد تتخلص من اي منتج مثبت ع شعرك  لان ح يزيل كل الطبقات العلاجيه الي استخدمتيها لشعرك وتكون فروة شعرك نظيفه وخاليه تماماً من اي منتج استخدمتيه لشعرك؛؛
  • وع فكره نوعية الشامبو هذا اسمه كلير فاي متوفر ف كدا ماركة لمنتجات الشعر انا صورت من مدام نعمه زوز ماركات مختلفه لنوع الشامبو كلير فاي وتلقوه موجود عند محلات الي يبيعوا ف مستلزمات التجميل الكبيره زي الحراري مثلا او محلات الي ف ميزران لبيع معدات التجميل؛؛ 
ملاحظه يا بنات انه الشامبو هذا كليرفاي ليه وظيفه معينه يعني الي تبي تحول اي منتج مثبت ع شعرها هي بس الي تستعمله ماينفع تستعمليه للعادي وللغسل اليومي لان ح يجفف شعرك وبمعني تاني هو ماليه اي تآثير لا ع ميش ولا صبغه يعني مايزيلش اللون بتاتاً؛؛
  • بالنسبه ليا انا شخصياً ح نشري منه وح نستعمله بعد كل ماسك لشعري يكون فيه زيوت او زبده باش من غسله واحده تتخلصي من زيوت او اي ريحه قويه؛؛
وبس فلذات تشبدي اتمني معلومه مفيده للجميع دومتم بخير وصحه اوووهبكم امووواه.

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Network Integration by Acurax Social Media Branding Company
error: Content is protected !!