مساؤ ورد وفل اخر لليل بنوتاتي ومداماتي الطرفونات،،
حبيبات قلبي بوست خفيف ع شني الحاجات الاساسيه الي ضروري تكون معاي لما نطلع من البيت طبعاً كدا ارتست دارت الريفيو هذا وكذا بلوقر مشهوره شفت هلبا وقليل من عجبتني لان في ارتست او بلوقر مبالغني جداً جداً ع الي يحطو فيه ف شناطيهم بالنسبه لطلعه ف الصبح سواء قرايه او شغل؛؛

• عموما انا حبيت انشاركم بشني نحط داخل شنطتي لو طالعه الصبح بصراحه مانحب نحط مكياج لان ما يلزمني سواء كنت امدايره مكياج او لا لان الي نطلع بيه من البيت يقعد زي ماهو لين نروح؛؛

ـ  الاساسيات عندي هي:ـ

1. اول شي ضروري يكون معاي الواقي في حالة نعرف روحي ح نتعرض هلبا للشمس يعني نحط ف الواقي معاي ع حسب طلعتي وين لان ضروري نستخدم فيه لايديا ـ انا نستعمل ف واقي ماركة فيشي فوق الممتاز مناسب لجميع انواع البشره؛؛
2. تاني شي لازم نرفع معاي مرطب شفايف لان نوع شفايفي مرات يديرو طبقه خفيفه مع القلوس فلهذا ضروري يكون ف شنطتي مرطب شفايف باش نضمن ع طول شفايفي مرطبات وفي نفس الوقت نحميهم من الشمس لان مرطب بيبي لبس من ميبلين في نسبة واقي للشفايف20%؛؛
3. ثالث شي نرفع معاي ف منعش للبشره باش كان حسيت وجهي نشف شوي ندير بختين كويسات ع وجهي سواء كنت امدايره مكياج او بدون مكياج لان يرطب البشره ويعطيها لمعه صحيه حلوه حالياً نستخدم ف منعش للبشره من انقلوت؛؛
4. رابع شي ملمع للشفايف نرفع معاي نفس الملمع الي حطيته من البيت؛؛
5. خامس شي نرفع معاي ف برفان بس الحجم الصغير حالياً نستخدم ف ريحه خليجيه اسمها كلمات؛؛
6. سادس شي معقم جل ديتول ضروري لاي شي طارئ؛؛ 
7. سابع شي ضروري معطر للفم لان مانحب ناكل مستكه وانا ف الشارع نستخدم ف معطر فم او حلوه الحاره؛؛
8. واخيرا مفاتيح الحوش وتزدان الفلوس طبعاً؛؛

ـ وطبعاً كل حاجاتي انحطها ف تزدان باش كان تكسر شي يكون ف دزدان ما يلبز شنطتي؛؛

وبس فلذات تشبدي هذا بالنسبه لترتيبي واكيد كل واحده وذوقها والي يناسبها اتمني الافاده للجميع دومتم متآلقات اوووهبكم امووواه..