صباحو فل مفلفل بنوتاتي مداماتي الطرفونات؛؛
البوست مهم لكل السيدات والانسات الي معانا طريقة وسريعه وسهله للحلوه او واكس الجسم ب اسهل واسرع الطرق ومفيده للبشره؛؛
- أنا للامانه ما نستعمل لا ف حلوه ولا في شمعه لا لوجهي ولا للجسمي لان مانتحمل الالم ولا التحسس الي يصير بعده وبصراحه مانبيش بشرتي تفسد انا شخصياً مستحيل انديرها لانها ما تمشي معاي ونستعمل لازالة شعر جسمي ماكينة حلاقه النسائيه ماركة فينوس مع جل حلاقه ستن كير ومتوفر ف اغلب الصيدليات الكبيره والحمدالله ماشيه معاي الحلاقه تمام التمام ما سببتليش اي مشاكل؛؛
- اما بالنسبه لوجهي نستعمل ف ماكينة ازالة الشعر من براون نفس الصوره حتي هي حلاقه مش نتف وماشيه معاي تمام التمام نستخدم فيها مرتين ف الشهر لان بطبيعة شعرتي خفيفه مش متعبه موجوده عند محل الحراري بن عاشور جرابه او محلات المكياج سعرها حوالي 35 ولكن في ارخص منها ماركة بيبي ليس ب25 وعندي حتي هي منها ماشيه امورها بس براون افضل؛؛
- ملاحظه وجهكم ارجوكم رجاء خاص ما تقربو لا شمعه ولا سير لان مع الاستمرار عليها تسبب كلف وتصبغات ف البشره وبالنسبه للحلوه تسبب ترهل افضل شي لازالة شعر الوجه بدون ما تسبب اي ضرر هي الفتله فقط لاغير؛؛
- اما الناس الي مش مقتنعه بكلامي وتحب ادير الحلوه او الواكس للجسم ما تخافوش حتي مش معاي ف رآي ولكن جبتلكم طريقه سهله وسريعه ومفيده للبشره لان فيها عسل طبيعي؛؛
- الطريقه نفس صورة البوست هي تاخدي عسل المقدار الي تحتاجيه لجسمك مع زوز كواشيك كبار سكر ونص ليمة عصر تخلطيهم كويس ح يتكون معاك خليط متجانس ح تستعمليها نفس نظام الواكس او الشمعه هو تاخدي بعود نظيف نفس امتاع الشمعه وتحطي بشويه ع رجلك او الاماكن الي فيها الشعر وتاخدي الورقه زي امتاع الشمعه تحطيها ع العسل الي درتيه ع رجلك وتجبدي الشعر مره واحده طبعاً اكيد بيكون حار ربي يصبركم بس الطريقه هادي تنظف الجسم وتجبد الشعر من الجذور ف نفس الوقت تعطي لمعه ونعومه للجسم لان فيها عسل طبيعي؛؛
- اما الي مش ح تمشي معاه يدير طريقة الحلوه التقليديه هي طاسه سكر وطاسه ميه ونص ليمه كامله وتقعدي تحركي لين تشد معاك وتقدري اضيفلها وشق بحجم الظفر يعني قطعه صغيره بكل الطريقه خديتها من بنت خالتي وفعلاً ادير فيها ميه ميه لما سئلتها قلتها شني فايدة الوشق قالتلي الحلوه ما تسيح ويعطل الشعر لما يطلع؛؛
وبس فلذات تشبدي اتمني الافاده للجميع اووهبكم امووواه،،
