مساؤ ورد اخر لليل بنوتاتي ومداماتي الطرفونات؛؛
حبيباتي بنعطيكم بوست سريع ع انواع خافي العيوب و ع مصحح الهالات ب لون البرتقالي؛؛
- اول شي بنحكي عليه هو الكوركتر داركل سيرك يعني مصحح للهالات السوداء تحت العين شني وظيفته المصحح هذا هو يصحح لون التصبغات الي ف البشره لان لون البرتقالي يصحح التصبغات او الهالات الي تحت العين خاصةً الي عندهم هالات باندا تحت عينهم الي زي حالتي انا عندي هالات بسبب اعصاب المعده والارهاق والارق يعني ضروري نبي تغطيه عاليه ف ضروري نحط مصحح تحت عيوني باش نصحح لون الهالات الي عندي وما نخليش للون يقلب ع رمادي لما نحط فوقه خافي عيوب بالمختصر المصحح وظيفته انه ما يخليش لون خافي العيوب يقلب ع رمادي او ع ازرق او موف يخليه لونه ثااابت طول وقت حفلتك؛؛
ـ طريقة استعماله تاخدي منه حاجه بسيطه جداً جداً اما بالفرشه او بصبعك وطبطبي بالشويه تحت عينك مكان الهالات والارهاق وبعدين تحطي فوقه الكونسيلر الي هو خافي العيوب امتاعك ديما يكون ف درجات البيج باش يخفي تماماً اي هالات تحت العين وحتي لو عندك تصبغات ف بشرتك تقدري تحطي عليها مصحح بالطبطبه وبعدين تحطي اما الاساس امتاع او الخافي وتدمجيه كويس وح يخفي اي تصبخ او ندبات ف بشرتك؛؛
ـ ملاحظه انه لو ماعندك هالات قويه تحت عينك مش لازمك المصحح واكتفي فقط ب خافي عيوب؛؛ - تاني شي انواع خافي العيوب حاولت نصور من عندي كل انواع خافي العيوب واما اقواهم واما اخفهم ف الاستعمال؛؛
- اول نوع خافي عيوب نوعه ستك كريمي نفس عجلة كريولاين السداسي او فلورمار الي ف الصوره هادو اقوي انواع لخافي العيوب تغطيتهم عاليه جداً جداً وانا ع طول نستخدم فيهم لما تكون عندي مناسبه اغلبيه نستعمل ف عجلة كريولاين لان تغطيه فل كفر وفيه كداً درجه انا نخلط ف لونين البيج ونحطه فوق المصحح يعطيني تغطيه كامله ومرات انحط فيه بروحه يعطي ف تغطيه تامه وينفع لجميع انواع البشره وطبعاً انا ذكرت الماركه ع سيبل مثال وحسب تجربتي بس اهم مافي الموضوع انه تفهموا نوع الستك الكريمي اقوي انواع ف خافي العيوب والماركه مخيره ليكم؛؛
- تاني نوع هو خافي العيوب اللكود يعني يكون سائل زي كريم الاساس تغطيه امتاعه في ماركات يجي فيها ميديم كفر وفي ماركات يجي فيها فل كفر زي ماك وميكب فورايفر ويناسب اكثر شي البشره الجافه لان سائل ونسبة ترطيب فيه كبيره بس بالنسبه للصوره هو كونسيلر انقلوت من اسواء خافي العيوب الي شريته وجربته بصدق حاولت نتعامل معاه بكل الطرق فاشل جداً يقلب ويخطط وتغطيه زيرو مش حلو بصراحه ولكن انا صورته باش نوضحلكم نوع خافي عيوب السائل؛؛
- ثالث نوع هو خافي العيوب بس لومينتر يعني اضاءه تحت العين اكثر من يخف العيوب تغطيه امتاعه خفيفه ولكن ينفع تستخدموه ك هايلايت او اضاءه تحت العين وافضل لومينتر استخدمته هو ماركة ايف سان لوراين كمل مني يجي زي القلم لونه ذهبي اضاءته حلوه ع الاخر؛؛
- رابع نوع هو خافي عيوب ستك ويجي شكله زي الروج بس هذا ثقيل هلبا هلبا وتغطيه امتاعه عاليه جداً وثابت ويناسب هلبا البشره الدهنيه لان ستك جامد ومن افضل انواع الماركات استخدمتها هي قولدن روز هو اساساً كمل ويعاني مني لان يخفي الهالات ممتاز جداً؛؛
- اخر نوع هو خافي عيوب القلم هذا النوع تغطيه خفيفه وانا نستعمل فيه لاضاءة تحت الحاجب او دمعة العين؛؛
وبس حبيبات قلبي اتمني الافاده للجميع دومتم متآلقات اوووهبكم امووواه؛؛
