صباحو فل وزها خاطر بنوتاتي ومداماتي المزموزات،،
فلذات تشبدي بوست ع السريع لبرايمر+بيز للوجه من ماركة ميبلين والي بشرتهم دهنيه او مختلطه والي عندهم مسام واضحه واحمرار ف بشرتهم ح يفيدهم البوست هذا هلبا؛؛
- اول شي بنقوللكم ع السريع معني البيز هو عباره عن منتج ينحط ع الوجه اول شي قبل المكياج وظيفته يقلل افراز زيوت البشره ويعبي المسام يعني يعطيك ملمس مخملي للبشره وسطح واحد باش لما تحطي الاساس امتاعك ما يخش ف المسام او يخطط معاك البيز يحمي بشرتك من الرطوبه والتعرق ويخلي مكياجك يقعد فتره اطول،،
- البرايمر نفس وظيفته البيز بس ديما يجي بلون مصحح للبشره اما زهري او ازرق او اصفر او اخضر او برتقالي يعني الالوان المصححه لعيوب البشره وكل لون ليه وظيفه معينه او يصحح عيب معين وانا شرحت عليه مفصل ف المدونه؛؛
- به توا بنقوللكم ع المنتج هذا من ماركة ميبلين نيويورك بيز+برايمر يعني 2 ف واحد فوووق الروعه يا بنات يعني يتحكم ف لمعان البشره وفي نفس الوقت مصحح لون للبشره لان لونه اخضر يصحح لون الاحمرار الي ف بشرتك سواء كان عندك حبوب او بشرتك يكون فيها احمرار البرايمر هذا تحطيه قبل المكياج يخلي لون بشرتك واحد ويصحح للون بجد ممتاز وسعره رخيص حوالي ف حدود 12/15دينار ليبي انا شريته من محل الحراري بن عاشور شارع جرابه ولكن تلقوه متوفر ف معظم محلات المكياج؛؛
- وع فكره تقدرو تستعملوه حتي الي بشرتهم صافيه بس عندهم منطقة t زون تزيت الي زي حالتي انا ينفع بيها هلبا هلبا لان يتحكم ف لمعان البشره ويقلل من زيوتها؛؛
- وميبلين عندهم كدا لون عندهم برايمر بلون الزهري فيه واقي شمس حوالي 20% واللون الزهري يعطي اشراقه للوجه ويصحح لللون البشره الي فيها اصفرار او شاحبه؛؛
- الي بشرتها جافه مش ح يلزمها لان لو استعملاته ح يزيد يجفف بشرتها ويديرلها قشور قبل المكياج فلهذا تستخدم اي كريم مرطب يعجبكم قبل المكياج؛؛
وبس حبيباتي اتمني الافاده للجميع اووهبكم اموواه…..
