طريقة البديكير والمناكير لليدين

صباحكم ورد بنوتاتي مداماتي الطرفونات،،
حبيباتي بوست خفيف ع طريقة البديكير والمنيكر ف البيت ب اسهل الطرق وبدون تعقيد ح نشرح الخطوات حسب ارقام الصوره؛؛

20

  • قبل ما نبدا ف شرح الخطوات بنقوللكم انه ضروري تهتمو ب ايديكم لان اليدين من الاساسيات لجمال الأنثي انه ضروري قبل النوم الترطيب المستمر ب اي كريم ترطيب ترتاحو عليه وضروري تقشرو ايديكم 3مرات ف الاسبوع ب اي مقشر ترتاحو عليه سواء طبيعي او تجاري مهم جداً انكم تهتموا بنعومة ايديكم ولما بتغسلي الماعين او بضمي حوشك ضروري تلبسي قوانطي لان يحمي ايديك من الحساسيه والخبوش وتكوني حاطه ف ايديك اي كريم مرطب او زيت الجلسرين ترطيبه عالي جداً ننصحكم بيه؛؛
  1. اول خطوه ف البديكير اليدين انه تقصي الظوافر المتكسره والمتبهدله او تساوي كل ظوافرك طول واحد يبدا شكلهم احلا ومتناسق؛؛
  2. تاني خطوه هو برد الظوافر  ضروري جداً انك تبردي ظوافر وتساويهم ع طول باش ما تجرحي روحك ولما تهتمي بيهم ع طول ما يتعرضو للتكسر؛؛
  3. ثالث خطوه انه تعطي فيتامين ونعومه وبياض للظوافر تاخدي صونيه فيها شويه زيت زيتون وقطرات ليمون وتنقعي كل ايد او تدهني ظوافرك بفرشة زمالطو نظيفه لمدة نص ساعه وتشوفي اللمعان والنعومه الي تجنن؛؛
  4. رابع خطوه تاخدي صونيه فيها ميه دافيه مع شويه شامبو وقطرتين ليمون  وحطي ايدك كلها فيها 10/15 دقيقه وتكون فوطه جنبك امسحي ايديك؛؛
  5. خامس خطوه تحولي كل الزوايد الجلديه الي حول الظفر بس مش بمبالغه حاجه بسيطه باش ظفر يتنفس ويكون شكله احلا؛؛
  6. سادس خطوه تبردي ظوافرك حاجه بسيطه باش تساوي الزوايه امتاع الظفر؛؛
  7. سابع خطوه تحطي كريم ترطيب لايديك ضروري منه انا شخصياً نستخدم ف لوشن بيبانتين او بانتثول او فازلين ماشين معاي تمام التمام؛؛
  8. ثامن خطوه والاخير تحطي الزمالطو امتاعك للون الي يريحك  وع حسب الاذواق وقبل ما تحطي زمالطو امتاعك حطي طبقه من زمالطو الشفاف ك حمايه للظوافركم ؛؛
  • نقطه مهمه لما تمسحي ظوافر ب الاستون ضروري تغسلي ايديك بعد ما تمسحي مباشرة ردي بالك تمسحي ظوافرك وتحطي الزمالطو طول لان كااااااارثه للظوافر الاستون لو قعد ع الظفر فتره طويله يدمر الظفر ويسببله جفاف وهشاشه؛؛
  • لو بتسئلوا ع مقوي اظافر انا نستخدم ف مقوي اظافر ماركة ايلفين بزيت الارغان مممممتاز جداً بصراحه انا مش مهتمه بالطول لان نقص ف ظوافري ولكن نهتم ب الزوائد الجلديه الي حول الظفر انه ما يكونش شكلها قاسي ومقزز لان يسبب النتيفه والمقوي هذا بصراحه رطبلي هلبا الزوائد الي حول الظفر واعطا شكل صحي اكثر للظفر لمعه حلوه ع الاخر انا شريته من صفحة (دليلك للمنتجات الامريكيه)
  • اما لو تبو مقوي طبيعي ننصحكم بزيت للوز الحلو ادهنو اظفاركم قبل النوم مممممتاز جداً جداً ك مقوي طبيعي للظوافر ننصحكم بيه؛؛

وبس حبيباتي اتمني بوست مفيد للجميع دومتم بخير اوووهبكم امووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Social Media Icons Powered by Acurax Web Design Company
error: Content is protected !!