الفرق بين علاجات الشعر

صباحو ورد وزها خاطر بنوتاتي ومداماتي الطرفونات؛؛

نبي نوضحلكم الفرق ب اختصار ما بين الكيراتين والبوتكس والكولاجين والبروتين للشعر،،

18

  1. اول شي طلع الكيراتين ع اساس معالج ويفرد الشعر بس الكارثه انه فيه مادة مثبته من الفورمالين مافيش ولا نوع كيراتين من الغالي للرخيص خالي من مادة الفورمالين وبنسبه عاليه فيه من 2% ل7% للعلم الماده هادي تستخدم ف المشرحه لحفظ جثث الموتي ف الثلاجه يعني تخيلو معاي لو تحط معاك الماده هادي ع جذور شعرك كيف بيصير فيه غير انه حذرو منه دكاتره ع مستوي عالم واخر مؤتمر اطباء ف امريكا قالو الكيراتين خطير ع الشعر ف الاول يا سلام بعدين دمار كامل للشعر بسبب وجود مادة الفورمالين الخطيره وحتي لو ما فيه فورمالين الكيراتين نفسه بعد التسخين يدير مادة شبييه واخطر من الفورمالين وما فيش كيراتين ف العالم كله خالي تماماً من الفورمالين حتي لو قريتي ع علبة الكيراتين زيرو فورمالين كذب ف كذب مجرد ستيكر تجاري لغرض البيع اكثر غير انه خدا المنتج الاكثر تحسساً ف امريكا لسنة 2015 وقالو انهم ح يمنعو من السوق ف امريكا بسبب حالات الدمار لسببها للناس سواء الي استعملوه او حتي الكوافيرات الي يستخدمو فيه يتعرضو لاستنشاق الفورمالين يسبب ازما ف الصدر وسرطان الجلد عافانا الله واياكم،،
  2. تاني شي طلع البوتكس لفرد او لعلاج الشعر قللو فيه مادة الفورمالين 0.02 ونسبة الفرد امتاعه من 80% الي 100% ولكن مازال فيه مادة الخطيره فورمالين حتي لو كانت بكمية اقل؛؛
  3. ثالث شي طلع الكولاجين لعلاج الشعر وهو شبيه تماماً بالبوتكس اختلاف التسميه فقط لا غير ولكن نفس المفعول والتآثير والتركيبه؛؛
  4. رابع شي واخر حاجه توصلولها لعلاج الشعر وفرده نسبة العلاج فيه 50% والفرد 100% وخالي تماماً من الفورمالين يعني تم تصفير مادة الخطيره الفورمالين من منتج البروتين ودارو عليها بحوث عده ف دبي وامريكا والبرازيل للتآكد انه البروتين العلاج والفرد الاضمن للشعر بدون خطر لانه يعالج الشعر ويفردها ب مجموعة البروتينات زي بروتين الكفيار وبروتين الحرير والكشمير وهو مطابق للبروتين الموجود ف شعر الطبيعي للانسان واستدبو الفورمالين ب الاحماض الامينيه بعضها من الفواكه والارز وغيرها من الاحماض الامينيه يعني البروتين يفرد الشعر بنسبة 100% ويعالجه من الهيشان والتقصف بنسبة50% وهذا علاش سعره غالي لان اخر شي لعلاج الشعر وخالي من الفورمالين ،،
  • وع فكره لو درتي بروتين لشعرك ف السنه 3 مرات ح يتعالج تماماً علاش لان ح تتفكي من استخدام الاستشوار ولاسترا وكل ما يدمر الشعر ح تغسلي وتطلعي طول يعني ح تريحي شعرك لمدة شهور وهذا يخلي شعر الجديد الي بيطلع اقوي وصحي لانك مريحه شعرك من كل وسائل الي دمره هادي معلومه من صديقتي دكتوره وكيلة فيشي،،
  • و ردو بالكم خدو نوع كويس للبروتين لان مش كل الشركات ممتازه وفي الي مغشوش وفيه فورمالين؛؛
  • به كيف تميزو منتج الي يكون فيه فورمالين انقوللكم اول شي ريحة اي منتج يكون فيه ف فورمالين ريحته حشاكم معفن زي الجيفه وقويه ولما تحطيه ع شعرك وتجففيه يطلع دخان وعيونك يقعدو يحرقو ويدمعو بشكل رهيب غير انه تشرقي بيه يخش ف خشومك وصدر ويسبب كحه قويه فلهذا ردو بالكم؛؛
  • انا ننصح البنوتات والمدامات انكم لما تبو اديرو حاجه لشعركم علاج او فرد ما تستخسرو ف ارواحكم لان شعركم وصحتكم اهم من فلوس الدنيا وبعدين انا انشوف ف اسعار المزينات يديرو ف كيراتين ب اسعار غاليه مش حتي رخيصه يعني انتي بديري بديري خليك ف الصح من الاول باش تلقي نتيجه ترضيك وما تزعلي ع شعرك  ولا صحتك مستقبلياً،،
  • اما نصيحتي للمزينات او المراكز وقفو شغل بالكيراتين لان مش كويس ع صحتكم انتم تشموا ف مادة الفورمالين طول تركب للجيوب الانفيه ولعيونكم وتسبب تحسس وازما للصدر لان الفورمالين ماده خطيره انتم بتشتغلوا وبتاخدو فلوس من زباين ف كل الاحوال فلهذا اشتغلوا بالبروتين حاجه نظيفه واصح ليكم وللزباين؛؛

وبس حبيبات قلبي اتمني الافاده للجميع حاولت انلخص ع كل نوع ب اختصار باش تفهموا شني فيهم وماعليهم دومتم بود وك العاده اوووهبكم امووواه

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Animated Social Media Icons by Acurax Responsive Web Designing Company
error: Content is protected !!