فوائد حبوب كريمات شراب الكولاجين

مسائكم ورد بنوتاتي ومداماتي الطرفونات
حبيباتي هذا بوست انطلب مني كدا مره من عضواتي انه نتكلم ع فوائد حبوب او شراب او كريمات كولاجين هذا تقرير من د.ضاري العون وهو دكتور تغديه واخصائي للكيمياء الحيويه السريريه ف الكويت يعني كلام علمي موثق باش ما تطلعي واحده تقولي تجيبي ف الكلام ع كيفك؛؛

34

  • الاجابه ع اسئلتكم انه هل حبوب  او شراب او كريمات الكولاجين فعلاً مفيده وتمنع التجاعيد وتشد البشره يعني هل كلام الدعايات والصفحات الي تبيع فيهم كلام صادق ام مجرد دعايات؟؟
  • الجواب ب اختصار انه حبوب او شراب او الكولاجين  غير فعال ابداً للشد الجسم او لعلاج التجاعيد علاش لان الكولاجين الي تاخدو عن طريق الحبوب او الشراب ح يتكسر الكولاجين الي موجود ف الحبوب والشراب هذا يتحول الي احماض امينيه في الامعاء يعني زي ما تاخدو الفيتامينات او مقويات يكون فيها نسبة بروتين لتقوية عضلات الجسم خاصةً للناس الي تتمرن ف الجيم سواء رجال او نساء ينفعهم لان يقوي عضلة الجسم ب اختصار كآنكم تاكلو في (دحي او لحم او اي خضروات ولحوم يكون فيها نسبة بروتينات تفيد الجسم)
  • هي مافيهاش خطوره ولا ضرر وفي نفس الوقت ما تفيدك ابداً ف شد او ازالة تجاعيد البشره؛؛
  • اما كريمات الكولاجين حتي هي غير مفيده نهائياً لشد البشره او علاج التجاعيد علاش لان الكولاجين جزء كبير بالحجم وما يتغلغل للمناطق العميقه الي فيها كولاجين؛؛
  • يعني كريمات الي يديرو عليهم ف دعايات امتاع الكولاجين هي زيها زي اي كريمات ترطيب للبشره وبصراحه تنباع بمبالغ خياليه ف الصفحات يعني من وجهة نظري الشخصيه تاخدو كريمات لعلاج التجاعيد او التخفيف منها والمحافظه ع بشرتك افضل من انه تاخدي كريمه غاليه وماعندها اي مفعول ع بشرتك؛؛
  • كيف تحمي بشرتك من التجاعيد والترهلات :
    1ـ اول شي ضروري تحمو بشرتكم كويس من اشعة الشمس تستخدمو اي واقي شمس مستريحين عليه انا شخصياً نستخدم ف واقي ماركة ڤيشي ممتاز لان مضاد للتعرق وما يزيت ع البشره ابداً ننصحكم بيه،،
    2ـ تاني شي انه الترطيب ثم الترطيب ثم الترطيب للبشره يا ناس ياعالم اهم شي ترطبو بشرتكم ب استمرار ف لليل قبل النوم ب اي كريم مرطب عندكم وترتاحو عليه انا شخصياً ما نستغناش ع كريم بيبانتين الي خطه سماوي هذا رفيق الدرب مهما نستعمل من كريمات غاليه ورخيصه بس هو الوحيد الي مستحيل يكمل مني وحتي سعره رخيص تقريبا حوالي 8/9 دينار ليبي بس نتيجته رهيبه ف ترطيب البشره ومع الاستمرار عليه يوحد لون البشره ويعالجها من اي تحسس او قشور ننصحكم بيه؛؛
    3ـ ثالث شي كيف تحمو بشرتكم من التجاعيد وننصح من عمر 25 سنه ياخدو كريمات للتجاعيد باش تلقو بشرتكم القدام نظره ومشدوده والناس الي فوق سن 30 ضروري تاخدو كورس او كولكشن كامل لكريمات تجاعيد يعني تاخدو كريمه نهاريه وليليه وسيروم ضد التجاعيد باش تحافظو ع بشره نظره وصحيه،،
  • افضل مااركات لكريمات مجربه لعلاج التجاعيد هي (كلارنس. كلينك. ڤيشي. لوريال. لانكوم. استي لودر. ديور) هادو من افضل الماركات العالميه الي فيها كريمات لعلاج تجاعيد البشره واكيد تلقوهم ف الصيدليات الكبيره،،
  • الاهم من الكلام الي قلته كله هي شرب الميه ثم الميه ثم الميه يا ناس يا هو لو ما تشربو ف الميه بقدر كافئ يومياً معناها ما تعبو ارواحكم ولا تخسرو فلوسكم ولا تشرو كريمات لا بطيخ ع الاقل الفلوس الي بتخسروها ع الفاضي اشرو بيهم حاجه تاكلوها تستفيدو اكثر لان لو ما تشربو ف الميه اقل شي يوميا من 2/3 لتر معناها اي شي بديره دوه فاضيه وما تعبيش نهائياً تشوفي نتيجه حلوه،،
    ـ زي ما الميه مهمه للبشره والشعر والصحه حتي الاكل الصحي والمغدي والمفيد مهم جداً لنظارة البشره واشراقتها كثرو من اكل الفواكه الخضروات حتي انتي مكسده ديري صونية سلاطه مشكله من كل شي وتسلي بيها او ديري فروت سلط الفواكه وكولو ع قد ما تقدرو مش ح يضركم بالعكس فيه افاده كبيره لصحتكم ولبشرتكم ولشعركم؛؛

وبس حبيباتي اتمني الافاده للجميع دومتم بود اووهبكم امووواه❤

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Customized Social Media Icons from Acurax Digital Marketing Agency
error: Content is protected !!