شامبو للشعر الدهني والجاف
صباحو ورد وياسمين بنوتاتي ومداماتي الطرفونات،،
حبيباتي البوست ح يكون ع افضل انواع شامبو ضد القشره وللشعر الدهني وللشعر الجاف المتضرر من الصبايغ والميش،،
- صوره رقم واحد هو شامبو من ماركة فيشي للشعر الدهني اسمه (ديركوس)انا نستعمل فيه شخصياً ومممممتاز جداً هو يتحكم ب افرازات زيوت الشعر يعني ما يخلي الشعر مزيت حلو حلو وفي نفس الوقت ما يجففاش لا ينظم افراز الدهون ويبطئ منها وف نفس الوقت يعطي نعومه حلوه للشعر ننصح كل واحده شعرها دهني وتعاني زيني انا من التزيت والحاله المحلحله تستخدمه وحتي لو تغسلي شعرك يومياً ما يضرش ابداً؛؛
- صوره رقم اتنين زوز شامبوات الي لونه ابيض شامبو (نيزورال)الشهير والمعروف طبعاً من اروع واجود وافضل شامبوات المضاده للقشره وللفطريات ولآي روايح ف الشعر يقضي عليها وع فكره يستعمل حتي للفطريات للجسم لو جاتك حكه بسبب بكتيريا ينفع تغسلي بيه مافيش مشكله روووووعه انا مستحيل نستغنا عليه ونغسل بيه مره ف الاسبوع هذا روتين دايم؛؛
ـ اما الشامبو الاخضر من ماركة فيشي اسمه (ديركوس) مضاد للقشره ينفع للشعر العادي والدهني وفي واحد تاني مضاد للقشره ينفع للشعر الجاف حتي هو لونه اخضر طبعاً ممممممممتاز جداً للقشره يقضي عليها تماماً هو لونه من داخل زي الاورنجي بجد الي يعانو من القشره خاصةً للشعر الدهني ننصحكم بيه جداً؛؛ - صورة رقم ثلاثه هو شامبو من ماركة ڤيشي اسمه (ديركو نيوتري ريبار) هذا الشامبو للشعر الجاف والي شعرتها هشه وتالف من الصبايغ ومتقصف ننصحها بيه هو والبلسم امتاعه ينشط فروة الشعر يخليها ناعمه وتلمع ننصح الي شعرهم جاف ومتبهدل يستعملوه النوع هذا ماما تستعمل فيه وماشي معاها تمام التمام؛؛
- به كم نغسلوا شعرنا ف الاسبوع ولله اخر تقرير طبي قريته من كدا دكتور جلديه ومؤتمر الاطباء قالو الي الان مافيش مده محدده المفروض تمشو بيها ف غسل شعركم يعني ع حسب الرغبه،،
- انا شخصياً نغسل ف شعري يوم بعد يوم لان شعرتي دهنيه والي شعرتها جافه وهشه تغسل شعرها يومين ف الاسبوع حلو ليها لان الي شعرها جاف ما تفرز ف دهون هلبا فلهذا يومين ف الاسبوع مناسب ليها؛؛
- كيف تستعملوا شامبو القشره لان بعض عضواتي عندهم مفهوم خاطئ للاستعمال من خلال تعليقاتهم وهي نشوف ف كدا تعليق يقولولي ياجود الشامبو هذا دوه فاضيه احنا استعملنا فتره وصح القشره تحولت من شعرنا ولكن لما وقفنا عليه رجعت القشره!!
ـ هنا بنقوللهم التوضيح حبيباتي العيب مش ف جودة الشامبو وانما ف طبيعة شعركم الي انا واحده منكم انعاني منها خاصةً الي شعرها دهني فروة شعرها تفرز ف زيوت بشكل مفرط ع المعتاد بتتراكم عليها الفروه ترسبات تسبب ف قشرة وفطريات وحتي تعالجو القشره اول ما توقفو ع العلاج ترجع من اول وجديد وهذا الطبيعي فلهذا حبيباتي الاستعمال الصحيح للشامبو المضاد للقشره هو√√
ـ انه الي شعرها قشره بشكل فظيع تغسل ب شامبو مضاد للقشره الاسبوع الاول 3مرات ف الاسبوع لما تلاحظ انها خفت القشره تغسل ف الاسبوع التاني مرتين ف الاسبوع بشامبو القشره و3اسبوع مره واحده ف الاسبوع وتستمر بيه عادي مره ف الاسبوع تغسلي بشامبو مضاد للقشره باش تحمي شعرك من اي فطريات او قشره ف المستقبل؛؛
- نقطه مهمه ما تهزو ابداً من القشره واديرو الحوله لا حبيباتي القشره سبب رئيسي واساسي ف تساقط الشعر فلهذا ردو بالكم ضروري تتعالجوا منها ف حالة عندكم قشره ف شعركم لان حتي شكلها محرج ومقزز جداً؛؛
- طبعاً شامبو فيشي و نيزورال متوفر ف اغلب الصيدليات و هادي صفحة وكيل ڤيشي اي استفسار ع الاسعار والاماكن الي تباع فيه خشو ع الصفحه؛؛
https://m.facebook.com/profile.php?id=335508049813722
وبس حبيباتي ان شاءالله افدتكم بمعلومه وك العاده اووووهبكم امووواه.
