صباح الروقان والجمال بنوتاتي ومداماتي المزموزات،،

حبيبات قلبي بوست اليوم بناءاً ع طلب عضوه عندي دارتلي تاق ف الانستا تبي تتعلم خطوات شكل الظلال هادي الي اسمها كات كريس يعني حد الفاصل ع الكريس او كسرة العين تكون قويه وبارزه و طريقة حطت الاظلال هادي تعطي مساحه اكبر وسحبه حلوه للعين تابعو معاي الخطوات ح يكون الشرح حسب الارقام؛؛

قبل ما نبدا بشرح الخطوات ضروري انقول ع حاجه مهمه وهي الاساس برايمر للعين وهو وظيفته يثبت ويقوي لون الظلال وما يخليهاش تخطط معاك يعني يعطيها فنش حلو ومتوفر ف ماركة كريولاين او انقلوت محلاتهم ف ش بن عاشور جرابه؛؛

1. الصوره رقم 1 بعد ما حطت البرايمر ع عينها خدت ظل اسود ب بنسل برش يعني اصغر حجم ف الفرش يكون شكلها زي القلم او الفرشه المشطوبه الي زي متاع الحواجب لان الكات كريس ضروري يكون خط فاصل ما بين الجفن المتحرك وكسرة العين وعظمة الحاجب لان هي تبي تخلق حد فاصل ما بين الجفن المتحرك وعظمة الحاجب وبناءاً ع الخط هذا بتحط الظلال وتدمجها،، ـ والحركه هادي تقدرو اديروها بقلم اسود ترسمو خط فاصل ع كسرة العين زي الصوره يكون رقيق ما تغلطوه ولا تنزلو ع الجفن المتحرك ديرو نفس الصوره بالزبط؛؛
   
2. الصوره رقم 2 بعد ما حددت خط فاصل ع كسرة العين توا بتبدا تدمج ظلالها فوق الخط الكريس خدت ظل لونه موكا يعني ف درجات البنيات اللون يجي ما بين البني الهادئ والمتوسط تقدرو تدمجو زوز الوان من ضلال مافيش مشكله وتدمجو الالوان ع الحد الفاصل   واطلعوا حاجه بسيطه بظل نهاية حاجبكم خودو وقتكم ف الدمج باش يطلع الفنش حلو ادمجو براحتكم لان اي مكياج نظيف يبي دمج كويس باش تتناسق الالوان؛؛.
3. الصوره رقم 3بعد ما دمجت الالوان فوقأدوات خط كسرة العين توا بتبدا تحط الظل ع الجفن المتحرك بلون الذهبي هي امدايره قلتر لونه ذهبي لان تبي تقوي اللوك القلتر معناه يكون الظلال الي تلمع او فيها رش هلبا كيف يثبت النوع هذا في صمغ او مثبت ظلال خاص ينباع ف انقلوت ب35 لتتبيث الظلال الي نوعهم بيقمنت او منثوره وهو ينحط ع جفن المتحرك حاجه بسيطه وبعدها تبدي اثبتي ف الظل امتاعك بالفرشه؛؛
   ـ او تاخدو قطرة زيت انقلوت ب14 دينار حتي هي تقدرو اثبتو بيها اي ظلال تكون قلتر تحطو الظل ع اي مغطة مكياج وقطرة واحده من الزيت هذا وتبدو تحطو ع الظل ع جفن المتحرك بحركة الطبطبه باش يثبت معاكم؛؛
   ـ ف حالة ما تبو تشرو عادي ف طريقة تانيه اثبتو بيها الظلال هادي هي تبلو فرشة الظل بشويه ميه وبعدها تمسحوها بكنينكس وتاخدي بيها الظل واثبتوه ع الجفن المتحرك فقط ما تتخطو الحد الفاصل ع كسرة العين بعد ما تحطو الظل ع كامل الجفن المتحرك تستنو شويه يجف باش يثبت معاك الظل؛؛
   ـ وفي الكات كريس ديما للون الي يكون ع الجفن المتحرك من الفواتح ماينفعش ابداً الوان غوامق لان لو بديرو لون غامق ع الجفن المتحرك بيضيع كل الشغل الي درتيه ع كسرة العين فلهذا ضروري لون يكون ف درجات الفواتح اما زهري ذهبي فضي بيج الالوان الي تكون فاتحه وتبين جفن العين وخط الفاصل ما بين الجفن المتحرك وكسرة العين؛؛
4. الصوره رقم 4 رسمة ب الايلاينر خط رقيق فوق الرمش العلوي وما طولتش خط الايلاينر الحد امتاعه لنهاية الجفن المتحرك نفس الصوره؛؛
   ـ كحلت عينها ب الاسود وموهت تحت الرمش السفلي بظل لون موف بس تقدرو اديرو للون الي يعجبكم مثلاً زي للون البني او اسود وحتي لو تبو اديرو قلتر ذهبي تحت الرمش السفلي تموهو بيه عادي ع حسب رغبتكم طبعاً الامر مخير ليكم؛؛
   ـ ف حالة عينك صغيره تكحلي بلون الابيض او البيج النود متوفر عندي انقلوت او كريولاين باش تتوسع العين اكثر ويعطي احاء العين اكبر؛؛
5. الصوره رقم 5ركبت رموش والنقطه هادي مخيره ع حسب الذوق ف ناس تحب تركب رموش وفي ناس الي منهم انا ماتحبش تركب رموش وبعد ما ركبت الرموش عاودت ع الايلاينر بشكل سريع باش تغطي لصقة الرموش وحطت مسكره دمجت رموشها الحقيقه بالصناعيه ودارت مسكره للرموش التحتيه؛؛
6. الصوره رقم 6 حطت لون اضاء تحت الحاجب او ع عظمة الحاجب بلون لؤلؤئ وحطت ف دمعة العين نفس للون باش يعطي اضاءه لللعين ويكون الفنش احلا؛؛
7. الصوره رقم 7 هذا اللوك او الفنش النهائي بعد كل الخطوات السابق ذكرها؛؛