شرح خطوات سموكي ايز

مساؤ ورد بنوتاتي وماداماتي الطرفونات.. 

حبيباتي بوست خفيف يوضحلكم بالخطوه لسموكي ايز يعني لشكل ودمج الظلال نفس الصوره تكون سموكي قويه ف حطتها ح نشرح حسب الارقام الي ف الصوره؛؛

22

  • ملاحظه صغيره قبل ما نبدا هي الارتست امدايره ع نهاية العين لصقه زي ما تشوفو ف الصوره باش تجيها الظلال والرسمه مساويه بالزبط ما يطلعش برا حد حاجبها وعينها ننصحكم بيها الطريقه هادي هلبا حطو لصقه نهاية خط الرمش السفلي ونهاية الحاجب وحطو ظلالكم وارسم الايلاينر ح يجيكم 100%؛؛
  1. صوره رقم واحد حطيت ع عينها جفن كله برايمر باش يوحد لون الجفن ويثبت اللون اكثر وما يخليش الظلال تخطط ع جفنك انا حالياً نستعمل ف برايمر من انقلوت رهيب رهيب هو زي الخافي بس هو بيز يجنن ننصحكم بيه وحتي سعره رخيص ف حدود17 دينار ليبي وبعد ما دارت البرايمر او البيز ع كل جفنها بحركة الطبطبه اثبتيه ب باودر من فوق بالفرشه باش يثبت اكثر معاك الظلال والوانه تجيك قويه؛؛
  2. صوره رقم 2 خدت قلم اسود  ورسمة بيه خط عريض شوي فوق الجفن المتحرك امتاع العين نفس العرض ف الصوره ديما ابدو بالشويه ولو تبو اتزيدو عادي بالتدريج زيدو اللون؛؛
  3. صوره رقم3 هي بعد ما حددت بالقلم الاسود فوق الجفن المتحرك تبي تدمج للون كويس كويس فوق جفن المتحرك فقط وخودو وقتكم ف دمج الالوان بس اللون الاسود ما طلعاته ع كسرة العين دمجاته فقط ع الجفن المتحرك زي ما تشوفو ف الصوره؛؛
  4. صوره رقم4 حطت لون موف ع كسرة العين زي الصوره بس انتم في حالة ما تبوش لون الموف وتبوه سموكي ترابي اكثر تقدرو تحطو بدل لون الموف بني غامق او درجات الترابيه او درجات اللحميه الي جايه ع مشمشي هادئ عادي اللون هنا مخير ليكم؛؛
  5. الصوره رقم 5 هي دمجت للون الموف ع كسرة العين زي الصوره وخودو وقتكم ف الدمج باش يطلع الفنش حلو ادمجو كويس كويس؛؛
  6. الصوره رقم 6 حطت الاضاءه ف دمعة العين وتحت عظمة الحاجب ب لون لؤلؤئ شيمر يعني فيه لمعه خفيفه باش يعطي اضاءه حلوه للعين؛؛
  7. كحلت عينها من داخل بالاسود وظللت تحت الرموش السفليه بظل الموف نفس اللون الي حطاته ع كسرت العين وركبت رموش وهذا امر مخير ع حسب الاذواق تركبو رموش او لا بعد ما ركبت الرموش خدت فرشة مسطحه وظللت بالاسود ع الرموش الفوقيه باش تغطي للصقه امتاع الرموش،،
  • ملاحظه الي عيونها صغار ما تكحلش داخل العين ب الاسود تكحل عينها اما ابيض او بيج نود لحمي في انقلوت عندهم لون بيج نود رقمه 05 يجنن وضد الميه وشمعي بجد رهيب سعره ف حدود 20 دينار ننصحكم بيه؛؛
  • طبعاً بالنسبه للماركات المستخدمه ف الصوره مش موجوده ف ليبيا ولكن تقدرو اديرو المكياج هذا ب اي ماركات متوفره عندهم ما تقيدوش روحكم؛؛ 

وبس فلذات تشبدي اتمني شرح كافي ومفيد ليكم دومتم بود و ك العاده اوووهبكم امووواه..

 

JoodAlarab

Trpoli - Libya

كوني قوية كالحرب ناعمة كالسلام

No Comments Yet

Comments are closed

WP2Social Auto Publish Powered By : XYZScripts.com
Plugin for Social Media by Acurax Wordpress Design Studio
error: Content is protected !!