صباحو فل وزها خاطر بنوتاتي ومداماتي الطرفونات ،،
حبيبات قلبي بوست ح يكون شرح مفصل بالخطوات مصوره كيف تفتحوا لون شعر حواجبكم بالمكياج وبآبسط الطرق،،
- كدا عضوه معاي تسئل ع لون حواجبي او شني ندير لحواجبي باش يولي لونهم بني فاتح او تشكلط فاتح للعلم حواجبي الطبيعيه لونهم بني غامق ولكن انفتح ف لونهم بالمكياج لان حلو لما يبدا لون الحواجب اخف واهدئ من المعتاد باش يعطي شكل حلو للوجه وما يكونش حاد ح نشرح حسب الارقام الي ف الصوره الي هي حاجبي؛؛
- اول صوره مشطت حواجب وحطيت عليه كونسيلر الي هو خافي عيوب لو مش متوفر كريمة اساس تآدي نفس الغرض،،
- تاني صوره بعد ما حطيت الكونسيلر ع كامل حاجبي من بداية الحاجب لنهايته مشطته بفرشة الحواجب لان نبي ندمج الكونسيلر مع حواجبي؛؛
- ثالت صوره خديت مسكرة الحواجب وبديت من نص الحاجب ركزو ف الصوره لما تبو اديرو مسكرة حواجب او جل حواجب تبدو من نص الحاجب باش يبدا من قدام طبيعي ما تجيش رسمته قاسيه او اوفر ع رسمه الطبيعيه لحواجبك مشطت حاجبي بالمسكرة من النص لنهاية الحاجب وبعدها مشطت بداية الحاجب حاجه بسيطه ولما بتمشطو الحواجب ديما اديرو الفرشه فوق؛؛
- رابع صوره بعد ما درت مسكرة الحواجب وكملت نبي ندمج اللون مع حواجبي خديت فرشة الحواجب وقعد نمشط ف حاجبي ع فوق زي الصوره بالزبط باش يجيك مساوي وانظف ولما تبي تمشطي حاجبك ارفعي لفوق الحاجب افضل؛؛
- خامس صوره لحاجبي بعد مادرت المسكرة ودمجت اللون مع حاجبي طبعاً يبان عليكم الحاجب مازال مش نظيف من الاطراف ضروري نساويهم باش تجيك ع تحديد حاجبك بالزبط؛؛
- سادس صوره خديت عود اوذان ودرت ع طراف عود الاوذان شويه كونسيلر وبديت نمسح ف اي لون زايد وطالع برا حدود حاجبي من فوق وتحت الحاجب وحددت الاطراف بعود الاوذان؛؛
- سابع صوره بعد ما حددت حاجبي بعود الاوذان خديت الاسفنجه امتاع الدمج انا عندي نفس الي ف الصوره صغيره ومحدده الاطراف تدمج وتمسح اي زوايد تحت او فوق الحاجب كويس بدون ما تلبزه لان حجمها صغير ومحدد؛؛
- ثامن صوره النتيجه النهائيه بعد ما دمجت الكونسيلر ونظفت الاطراف الحاجب و فتحت لون الحاجب بطريقه ساهله جداً وغير مكلفه بتاتاًً؛؛
- تاسع صوره الادوات المستخدمه انا استخدمت خافي عيوب من ماركة فلورمار ومسكرة حواجب من ماركة فرارتشي متوفره ف محلات المكياج او ماركة كركتر نفس النتيجه درجتها ميديم براون او تشكلط نفس الصوره انا خديتها من محل اليمامه باب غشير ب15 دينار ليبي؛؛
وبس فلذات تشبدي ان شاءالله يكون تصوير الخطوات واضح الحق انا مش محترفه ف التركيب والتصوير اهو نتعلمع قد ما نقدر اتمني الافاده للجميع وك العاده اوووهبكم امووواه.
