مساؤ ورد وفل بنوتاتي ومداماتي الطرفونات
حبيبات قلبي البوست ح يكون كيف تنظمي وقتك وتجهزي نفسك قبل مناسبتك افضل من تكون حايسه ف روحك ماتعرفي منين تبدي ومنين بتكملي،،
- اول نقطه قبل مناسبتك ضروري تكون بشرتك مشرقه ومرطبه وغير مجهده قبل المكياج لان المكياج يبي بشره صافيه و وجه مشرق باش يطلع الفنش حلو قبل مناسبتك بيوم استعملي مقشر لوجه سواء كان طبيعي او تجاري انا نستخدم ف تجاري مقشر اسمه بيرفكت لونه اخضر ف الصوره بصرااااحه روووووووعه روووعه يقشر الوجه وينظف بعمق ويحول كل القشور الميته وع فكره مش غالي تقريبا 10 دينار ليبي ومتوفر ف كل محلات مواد الزينه انا نستعمل ف امتاع الصبار للبشره الحساسه وهو فيه كدا نوع لو بتاخدو منه خودو ع نوع بشرتكم.
ـ ف حالة ما عندك مقشر تجاري عادي ديري مقشر طبيعي واسهل شي ك صغير من كل حاجه :
قهوة عربيه+سكر+زيت زيتون قشرو وجهكم بحركه دائريه خفيفه 10 دقايق واغسلي وجهك وبعده ع طول ترطيب وجهك ب اي كريم مرطب عندك والافضل تستخدمي المقشر قبل مناسبتك بيوم يعني ما تقشري وجهك ف نفس اليوم لان ح يتعب اكثر لما تحطي مكياج ع وجهك وهو كيف منظفه المسام،،
- تاني نقطه الشعر لو بديريه بروحك زيني انا نستشور شعري ف لليل قبل مناسبتي يعني لو مناسبتي غدوه نستشور شعري اليوم ف لليل ونلفه بالرول ونخليه لتاني يوم اندوش جسمي وشعري يكون ملفوف ف حالة بتمشي للمزين معناها استني الطوابير وامشي قبلها بساعات ع مناسبتك باش تجهزي بكري،،
- ثالث نقطه في يوم المناسبه امتاع قبل المكياج ضروري الوجه يكون منعش ومرطب كويس الافضل اديرو ماسك قبل مكياجكم بنص ساعه باش ترتاح البشره ويعطيها نظاره وترطيب انا نستعمل ف قناع ماركة نيفيا الجاهزات حلوات حلوات هو مفعولهم وقتي قبل المناسبه يفيدو يرطبو بشرتك ويعطوها اشراقه حلوه قبل المكياج وع فكره مش غاليات تقريبا سعر الواحد ب5 دينار وهو ماسك 2 ف واحد يعني الزرف الواحد ينقسم ع اتنين وتقدري تقسمي الزرف وتستخدميه مرتين لان كميته هلبا وطبعاً خلوه ف الثلاجه افضل لما تدهني بيه وجهك هو بارد ينعش وجهك اكثر.
ـ في حالة ما عندكمش ماسك جاهز عادي ديرو طبيعي ننصحكم بماسك حليب البودره+زبادي او مية ورد رهيب الماسك هذا يعطي توريد للخدود وترطيب حلو لبشرتك؛؛ - بعد ما جهزتي بشرتك وكله تمام تجي تختاري لبستك الي بتلبسيها ف مناسبتك الافضل اطلعي كل شي فوق سريرك باش ما تقعدي حايسه ف بعضك ومرات ادوري ع الحاجه ما تلقيها لا جهزي لبستك من قفطانك لشنطتك لكنتدرتك لشخشير اللحمي اكسسوارات كل شي تجهزي فوق السرير باش تعرفي روحك شني بتلبسي ولو ناسيه حاجه ترتبي نفسك وتتفكيرها خير من تنكيت الدولاب تقول خاش في ثور فلهذا نظموا ارواحكم بكري بكري؛؛
- اخر نقطه تاخدي سله او بوكس كنتدرتك وتحطي مكياجك كله الي بتكميجي بيه ف مناسبتك من الالف للياء هذا ف حالة بتمكيجي بروحك لو بتمشي للمزين الافضل ترفعي مكياجك خاصة اسفجنة او فرش المكياج ضروري ترفعي امتاعك ما تخليش المزينه تستعمل ادواتها ف بشرتك لان الاسفنجه والفرشه خاطمه ع 100 وجه قبل والحركه هادي شفتها كدا مره ف مزينات معروفه للاسف الشديد وهذا اخطر شي هو انتقال البكتيريا من واحده لواحده ادمر بشرتك تدمير؛؛
ملاحظة صغيره ف حالة بتحولي شعر وجهك ب اي طريقة كانت الي بشرتها حساسه الافضل قبل مناسبتها ب اسبوع اما الي بشرتها عاديه تحول الشعر من وجهها قبل مناسبتها ب 3ايام اقل باش ترتاح البشره؛؛
وهذا بوست ع ترتيباتي انا شخصياً قبل اي مناسبه بصراحه انا انحب النظام ف كل شي والي ينظم روحه مايتعب وديما يجهز قبل الكل حلو النظام يحسسك براحه اكثر لما تبدا حاجتك منظمه ومرتبه سواء ف بيتك او ف غرفتك او ف حياتك تلقي روحك 10/10 ،،
وبس حبيباتي اتمني الافاده للجميع دومتم بود اوووهبكم امووواه
