الستيت هذا ب الذات ركزو فيه لكل بنوته سئلتني ع الخاص وف التعليقات شني تشري العروس من مكياج مواد تنظيف كريمات ترطيب انا ح نتكلم من ناحيه هاذي فقط لان مستلزمات العروس هلبا ف للبس والبتات وغيره وطبعاً هادي مسآلة اذواق وميزانيه مانقدرش ندخل فيها يعني ح نتكلم من ناحية المكياج وماتابعه اتمني الافادة لكل بنوته مقبله ع زواج،،
أولا / مواد التنظيف:
مواد التنظيف المتعارف عليها هي:-
شامبو شعر+ بلسم شعر+ شامبو جسم+ سكراب الجسم+ ليفة جسم+ رشادة السكراب امتاع الرجلين+ كياسة جسم+ معجونك+ فرشة معجون+ مزيل العرق بالنسبه للكميه ع حسب امكانيتك طبعاً وميزانيتك بس من وجهة نظري انا انك تاخدي مبدئياً معاك كل حاجه منها 2 كويس ما تكثريش اكثر من هكي لان كل حاجه ليها صلاحيه واكيد بعد الزواج بتشري ف الامر مخير ليكم،،
- بالنسبه للماركات مواد التنظيف هذا شي اختياري بنعطيكم كدا ماركة من تجربتي الشخصيه ب النسبه لشامبو الشعر انا انفضل اتكون ماركة طبيه زي فيشي او بيوكست روعه وريحته خيال وحتي لوريال وزيرو حلوات اما شامبو الجسم من اروع روايح الشامبو لوكس واو وتقعد الريحه ف الجسم وحتي نيفيا وازارو روعه اما ف عرايس ياخدو ب الست يعني مجموعه تكون مع بعضها وانا شخصياً انفضلها ومن اروعها فكتوريا سكرت. بدي شوب. نوكس. نينا ريتشي. اتجفينشي. وطبعاً الامر مخير ليكم؛؛
- بالنسبه لمعجون الاسنان ع قد ماجربت احسنهم عندي كرست فعلاً يبيض السنون ويعطيهم لمعه حلوه او معجون طبي اسمه دايموند يهبل ويخلي للثه لونها وردي؛؛مزيل العرق انا شخصياً مانحبش الديدرونت يعني الاسبراي لان يدير ف اسوداد ف نستخدم ف دوف زي الكريم يهبل ويقعد 24ساعه او من ماركه طبيه فيشي او بيوكست روعه،،
- زيت للشعر يمنع الرطوبه بعد الاستشوار ف كذا ماركة حلوه والافضل انك تاخدي سيروم اخف من الزيت واحسن مايزيت الشعر من ضمن الماركات.لوريال.ويلا.زيرو .ماي فير.كرستال،،
تانياً /كريمات الترطيب والروائح:
وجهة نظري انه كريمات الترطيب الجسم تاخديها ست مع بعضه احلا وتكون ريحته مركزه اكثر وخاصةً اتجي ب البدي شاور معاها يعني شامبو الجسم وافضل ماركات ف الحاجات هادي معروفه فكتوريا سكرت.بدي شوب.نوكس. وفي كدا ريحه يجي معاها ست كامل الامر مخير ليكم ومسآلة اذواق؛؛
اما الي تبي تاخد ب القطعه ف كريمات الترطيب لاتحصي ولا تعد وانا ع طول افضلهم عندي لوشن فازلين الجديد ب الكاكاو والصبار او بدي شوب فيه حتي ب النكهات وريحتهم ف ب الفواكه والياسمين؛؛
- بالنسبه للروايح بنبدا ب الفرنسي اقواهم شنايل حبيبة قلبي بكل انواعها عندي وخاصة شنايل فايف رهيبه وريحتها تقعد ع طول اليوم. قوتشي خاصة قوتشي قوتشي فلورا رهيبه وقويه.ايف سان لوراين انا تعجبني القديمه سينما احلا من ايلي الاخيره واقوي. نينا ريتشي حلوه بجميع اصدارتها خاصة الاخيره ريتشي ريتشي. لانكوم حلوه وقويه. تجفينشي حلوه.كليفن كلاين تشكي تشكي خفيفه امتاع انهار. ونحب روايح فكتوريا سكرت. بدي شوب. اتش اند ام. ماركس. هادي كلها روايح خفيفه امتاع نهار ولوشن امتاعها حلو.
- اما للروايح الخليجي انموت ف ريحة كلمات خيال وقويه ورهيبه وخودو الاصليه لو حبيتو تجربوها. وطبعاً الحب كله (مسك الطهاره)هدا موصي عليه حتي رسولنا الكريم يستخدم لجميع انحاء الجسم وحتي الاماكن الحساسه يا بنات ريحته فوق فوق فوق الخيال ريحته قويه وتقعد ف الجسم والملابس بس خودو الاصلي من عبدالصمد القريشي وفي حاجه تانيه اسمها(المخمريه) هادي في منها للجسم وللشعر حي حي حي ع الريحه الخيال يا بنات تدهني منها ف جسم وشويه من تحت لشعرك معاش تستحقي ولا ريحه معاهم بجد يرايت تاخدو منهم لانهم رهيبات ريحتهم بشكل لايوصف،،
ثالثا /المكياج:
بنقول لكل بنوته خاصةً ف المكياج ماتكثر وتاخد الي يلزمها لان المكياج ليه صلاحيه معينه وينتهي فلهذا حرام تاخدي كميات بعدها تلوحيها انجو للاساسيات؛؛
- أول شي تاخدو ست فرش مكياج حلو وفيه كل انواع الفرش بجد يسهلكم ف استخدام المكياج ومن افضل الماركات هي سيقما. ريل تكنيك.كوستال.كركتر. ميكب فورايفر.فلورمار.مكياجي.ماك.اتش اند ام.وكدا ماركة حلوه،، واحلا اسفنجه لدمج الاساس هي البيوتي بلندر.ريل تكنيكـ.انقلوت.كريولاين ،،
- 2البيز او البرايمر هذا تاخده الي بشرتها دهنيه تستحقه اكثر من الي بشرتها جافه سادها كريم الترطيب قبل المكياج من احلا ماركات للبيز او البرايمر هما ماك. ميكب فورايفر. انقلوت. كريولاين. كولستار. نيكس. بينفيت. سماش بوكس. قوش. ميبلين. نيكس وطبعاً يكفي تاخدو واحد من الماركات هادي مش لازم كلهم وبعد مايكمل الاول خودي تاني،،
الي بشرتها جافه تاخد برايمر خاص ب بشرتها في كريولاين متوفر. وحتي ميكب فورايفر. او تاخدو كريمة ترطيب قبل المكياج ف كدا ماركة ممتازة من ضمنها
لوريال. بوندس. بدي شوب. نيفيا. جونسون. فيشي. كلارنس. كلينك. لانكوم. ديور. كريولاين. استي لودر وكدا ماركه حلوه الامر مخير ليكم،، - كريمة الاساس والباودر وهادي بنقول ع افضل الماركات من الثقيل الي الخفيف يعني تاخدو كريم للمناسبات وكريم للطلعات العشيه او زيارات بما انك عروسه كريم للمناسبات لانها ثقيله وفل كفر ماتسخدموهاش كل يوم تسبب مشاكل ف البشره ردو بالكم منها؛؛
ـ استي لودر دبل وير. ديور. ميكب فورايفر. ماك. شنايل. كريولاين. جورجيو ارماني. جفنشي. نارس وكدا ماركه حلوه،،
ـ كريم الخفيف وللطلعات اليوميه زي ماقلت فيما سبق انفضل البي البي او السي سي منها:ـ ديبورا.ماكس فاكتر. ميبلين. برجوا. لوريال. نيكس. ريميل لندن. ريفيلون. ايلفين. ماك وكدا ماركه حلوه،،
ـ كونسيلر الي هو خافي العيوب احسن ماركات فيه هي كريولاين. ميبلين. ماك. فلورمار. قولدن روز. ميكب فورايفر. نيكس.نارس،، - الايشادو او ضلال العين من الافضل تاخدو باليت يعني باكو يجي فيه كل الالوان مثلاً زي انقلوت تاخدي باليت منهم وتركبي الالوان الي تعجبك احلا وانسب ومن احلا ماركات للضلال هي ماك. انقلوت. نيكس. ميكب فورايفر. فلورمار. برجوا. كريولاين. فورايفر52. ديبورا. بدي شوب. كولستال. سليك. دايموند. مكياجي. فاتنه. انستازيا. ميكب قيق. لوريال والماركات هادي فيها جميع درجات الالوان من الهادي الي القوي الشيمر والقلتر،،
- الايلاينر او جل ايلاينر او بنسل ايلاينر افضل الماركات فيهم.
أحسن قلم استخدمه ولونه اسود ما يسيحش هو انقلوت رقمه 01 حلو وحتي ميبلين الاصفر وبرجوا و قوش سوداهم حلو وع فكره برجوا حتي ف الالوان اقلام الملونه حلو هي وماركة فورايفر 52تابث ونيكس والوانهم حلوه حلوه الايلاينر منها ذابالم رهيب وانقلوت واتش اند ام وبرجوا.كريولاين ولليلا رهيب وثاااااااابت اما جل ايلاينر منها ماك.كريولاين.ميكب فورايفر.نيكس.انقلوتـ،، - المسكاره/من افضل الماركات للمسكاره هي ميبيلين.برجوا. لانكوم.ماكس فاكتر.ديور.ايف سان لوراين.بينفت.لوريال وماتكثروش منها خودو الي بتستعملوه لان المسكاره 6شهور وبتلوحيها بتنتهي صلاحيتها،،
- احمر الخدود/ف كدا ماركة حلوه منها نيكس.ريفيلون.فلورمار. كوستال.سليك. برجوا. شنايل. قولدن روز. مس روز. انقلوت وكدا ماركة حلوه،،
- الارواج والقلوسات/ف كدا ماركة حلوه منها ماك.انقلوت. فلورمار. ريفيلون.نيكس. برجوا. ميكب فورايفر. فورايفر52. كركتر. بدي شوب.اتش اند ام.شنايل. استي لودر. انستازيا. ديبورا وكدا ماركة حلوه،،
وهادي اهم مشتريات العروسه ب النسبه للمكياج ومواد التنظيف وكريمات الترطيب طبعاً حبيباتي مسآلة اذواق ولكن انا اذكرت اهم الماركات واحلاهم ومن الرخيص الي الغالي وعن تجربتي الشخصيه والامر مخير ليكم حبيت انفيديكم باش ماتنسوش شي وب النسبه للكميه زي ماقلت ما تبالغوش ف شراء لان ف حاجات اهم اكيد للبس والبتات والمصاريف يعني خودو الي لازمكم فقط وذكرو كل حاجه ليها صلاحيه وتنتهي،،
وبس دومتم بود حبيباتي ومبروك للعرايس والفال لكل بنوته تبي تتجوزج اوووهبكم اموووواه..
